ބަހްރެއިންގެ އެކްޓިވްސްޓް ރަޖަބް ދޫކޮށްލުމަށް އދން ގޮވާލައިފި

މިދިޔަ ހަފްތާގައި ދެ އަހަރު ދުވަހުގެ ޖަލުހުކުމެއް އިއްވައި ޖަލަށްލާފައިވާ އިންސާނީ ހައްގުތަކަށް މަސައްކަތް ކުރާ އެކްޓިވިސްޓް، ނަބީލް ރަޖަބް " އެއްވެސް ޝަރުތެއްނެތި ވަގުތުން" ދޫކޮށްލުމަށް އދގެ އިންސާނީ ހައްގުތަކާ ބެހޭ އޮފީހުން ބަހްރެއިނަށް ގޮވާލައިފިއެވެ.

ޑެމްކޮރަސީއަށް ގޮވާލާ 2011 ވަނަ އަހަރު ފެށި ހަރަކާތްތަކުގައި އިސް ދައުރެއް އަދާ ކުރި ރަޖަބްއަށް މިދިޔަ ހޯމަ ދުވަހު ހުކުމް ކޮށްފައިވަނީ އެގައުމުގެ އިދާރަތަކާމެދު ނުބައި މައުލޫމާތު ފެތުރިކަމަށް ބުނެއެވެ.

ޖެނީވާގައި ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައި އދގެ އިންސާނީ ހައްގުތަކާ ބެހޭ އޮފީހުގެ ތަރުޖަމާނު ލިޒް ތްރޮސެލް ވިދާޅުވީ ބަހްރެއިންގައި އިންސާނީ ހައްގުތަކަށް މަސައްކަތްކުރާ ފަރާތްތަކަށް އެއްވެސް ދައުވާއެއް އައިސްފާނެ ކަމުގެ ބިރެއް ނެތި މަސައްކަތް ކުރުމުގެ ފުރުސަތު ދޭން ޖެހޭނެކަމަށެވެ.

އެކަމަނާ ވިދާޅުވީ ސަރުކާރަށް ފާޑުކިޔުމަކީ ކުށަކަށް ވެގެން ނުވާނެ ކަމަށެވެ.

" އަޅުގަނޑުމެންނަށް އެނގޭ 2016 ންފެށިގެން ރަޖަބް ހުރީ ބަންދުގައި ކަން. ބަހްރެއިންގެ އިދާރާތަކަށް އަޅުގަނޑުމެން ގޮވާލަން އެއްވެސް ޝަރުތަކާ ނުލައި އޭނާ ދޫކޮށްލަން" އެކަމަނާ ވިދާޅުވިއެވެ.

ރިޕޯޓުތައް ބުނާގޮތުން ރަޖަބް ގެ މައްޗަށް ދައުވާ އުފުލުނީ "ހަގީގަތާ ހިލާފު ޚަބަރާއި، ބަޔާނާއި، ވާހަކަތައް ބަހްރެއިންގެ ދާހިލީ ކަންކަމާއި ބެހޭގޮތުން ފެތުރުމާއި" ގުޅިގެން ކަމަށްވާއިރު އޭނާ ފަތުރާ ވާހަކަތަކުގެ ސަބަބުން ގައުމުގެ ޝަރަފާއި އިއްޒަތަށް އުނިކަން ލިބިގެންދާ ކަމަށް އެގައުމުގެ އިދާރާތަކުންވަނީ ބުނެފައެވެ.

ރަޖަބް ގެ މައްޗަށް އިއްވާފައިވާ ހުކުމް އިސްތިއުނާފު ކުރުމުގެ ފުރުސަތު އެބައޮތެވެ.

މި ހުކުމާ ގުޅިގެން ބަހްރެއިންގެ އިންސާނީ ހައްގުތަކަށް މަސައްކަތް ކުރާ ފަރާތްތަކާއި ބައިނަލްއަގްވާމީ ފަރާތްތަކުންވެސް ވަނީ އޭނާގެ މައްޗަށް ކުރެވިފައިވާ ހުކުމަށް ފާޑުކިޔާފައެވެ.

އޭގެތެރޭގައި "ބަހްރެއިން އިންސްޓިޓިއުޓް ފޯ ރައިޓްސް އެންޑް ޑިމޮކްރަސީ"، އެމްނެސްޓީ އިންޓަނޭޝަނަލް އަދި އެމެރިކާ ހިމެނެއެވެ. އެފަރާތްތަކުން ބުނަމުން ދަނީ ބަހްރެއިންގެ ސަރުކާރުން ހިޔާލުފާޅު ކުރުމަށް ފުރުސަތު ނުދޭ ކަމަށާއި އެނާ މިހާރުން މިހާރަށް ދޫކޮށްލަން ޖެހޭ ކަމަށެވެ.

އުމުރުން 52 އަހަރުގެ ރަޖަބް ގެ މައްޗަށް ހުކުމް ކުރެވިފައިވަނީ ޣައިރު ހާޒިރުގައެވެ. ރަޖަބް ވަނީ މިދިޔަ އޭޕްރިލް އިން ފެށިގެން ހޮސްޕިޓަލުގައި އެނދުމަތި ކުރެވިފައެވެ.

ފާއިތުވި އަހަރުތަކުގައި "ހުއްދަ ނުހޯދާ" މުޒާހަރާތައް ކުރިކަމަށް ބުނެ ރަޖަބް ވަނީ އެކިފަހަރު މަތިން ހައްޔަރު ކުރެވިފައެވެ.