އިރާޤުގެ ކުރުދިސްތާނުގެ ލީޑަރު މަސްއޫދު ބަރްޒާނީގެ ރިޔާސީ ބާރުތައް، އަންނަ ނޮވެމްބަރު މަހުން ފެށިގެން ދޫކޮށްލުމަށް ނިންމާފައިވާ ކަމަށް ކުރުދީންގެ ސަރުކާރުން ބުނެފި އެވެ.

އިރާޤްގެ މައި ސަރުކާރުގެ ކިބައިން މިނިވަންވުމަށް މަސައްކަތް ކުރަމުންދާ ކުރުދިސްތާނުގެ ސަރަޙައްދީ ސަރުކާރުން ހޮނިހިރު ދުވަހު ނެރުނު ބަޔާނުގައި ވަނީ، ނޮވެމްބަރު މަހުގެ އެއްވަނަ ދުވަހަށްފަހު ބަރްޒާނީގެ ރިޔާސީ ދައުރުގެ މުއްދަތު އިތުރު ނުކުރެއްވުމަށް ނިންމަވާފައިވާ ކަމަށެވެ.

ބަރްޒާނީގެ ރިޔާސީ ބާރުތައް ދޫކޮށްލެއްވުމަށް ނިންމަވާފައިވަނީ، އިރާޤްގެ މައި ސަރުކާރުގެ ކިބައިން މިނިވަންވެ، ކުރުދީންގެ ވަކި ދައުލަތެއް އުފެއްދުމަށް ފެންނަ ނުފެންނަ ވޯޓެއް ނެގުމާއި ގުޅިގެން ކުރުދީންގެ ސަރަޙައްދުތައް އިރާޤުގެ މައި ސަރުކާރުގެ ބާރުގެ ދަށަށް ގެނެސްފައިވަނިކޮށެވެ.

ވެރިކަމުގެ ބާރުތައް ވަކި ކުރުމުގެ ޕްލޭން ބަރްޒާނީ ވަނީ ކުރުދީންގެ ސަރަޙައްދީ ޤާނޫނު ހަދާ މަޖިލީހަށް ހުށަހަޅުއްވާފައެވެ. ޤާނޫނު ހަދާ މަޖިލީހަށް ބަރްޒާނީ ފޮނުއްވި ސިޓީފުޅުގައި ވަނީ، ރިޔާސީ ބާރުތައް ވަކިކޮށް، ސަރުކާރަށާއި، ޤާނޫނު ހަދާ މަޖިލީހަށް އަދި ޖުޑީޝަރީ އަށް ބާރުތައް ބަހާލުމަށް ހުށަހަޅުއްވާފައެވެ.

ބަރްޒާނީގެ ރިޔާސީ ދައުރު އޮކްޓޫބަރު މަހުގެ ނިޔަލަށް ހަމަވާއިރު، ހަމަ އެދުވަހު ރިޔާސީ އިންތިޚާބާއި ޤާނޫނު ހަދާ މަޖިލީހުގެ އިންތިޚާބު ބޭއްވުމަށް ވަނީ ތާވަލްކޮށްފައެވެ. އެހެންނަމަވެސް އެސަރަޙައްދުގެ މަސްރަޙު ގޯސްވެފައިވުމުން، އިންތިޚާބު ފަސްކުރުމަށް ފާއިތުވި ހަފްތާގައި ވަނީ ނިންމާފައެވެ.

ބަރްޒާނީގެ މޭސްތިރިކަމުގެ ދަށުން ކުރުދީންގެ މިނިވަން ދައުލަތެއް އުފެއްދުމަށް ސެޕްޓެމްބަރު މަހުގެ 25 ވަނަ ދުވަހު ނެގި ފެންނަ ނުފެންނަ ވޯޓަށް އީރާޤްގެ މައި ސަރުކާރުން ދިން ރައްދާއެކު، ކުރުދީން ވަނީ އިހުނަށްވުރެ ނިކަމެތިވެފައެވެ.

އެވޯޓަށް ހަތަރު ހަފްތާވެސް ނުވަނީސް، އީރާޤްގެ މައި ސަރުކާރުން ކުރުދިސްތާނުގައި ހިންގި އަސްކަރީ އޮޕަރޭޝަނުގައި، ތެލުގެ ގޮތުން މުއްސަނދި ސަހަރެއް ކަމަށްވާ ކިރްކުކް ވަނީ މައި ސަރުކާރުގެ ބާރުގެ ދަށަށް ގެންގޮސްފައެވެ. ކިރްކުކް އަކީ ކުރުދީންގެ ރޫހާނީ ވަޒަނުގެ ގޮތުގައި އަދި ކުރުދީންގެ މިނިވަން ދައުލަތެއްގައި އާމްދަނީގެ މައި ދޮރުގެ ގޮތުގައި ކުރުދީން ބަލާ ސަހަރެވެ. އިރާޤްގެ މައި ސަރުކާރުގެ ބާރުގެ ދަށަށް ކިރްކުކް ގެންދިއުމަކީ، ކުރުދީންގެ ވަކި ދައުލަތެއް އުފެއްދުމަށް ކުރާ މަސައްކަތާއި ދެކޮޅު ހަދާ އިރާޤްގެ މައި ސަރުކާރުން އެކަމާއި ދެކޮޅަށް އަޅާފައިވާ ގިނަ ފިޔަވަޅުތަކުގެ ތެރެއިން ކުރުދީން އެންމެ ހިތްދަތި ކުރުވި ފިޔަވަޅެވެ.

މިއަހަރުގެ ކުރީކޮޅު ބަރްޒާނީ ވަނީ، ނޮވެމްބަރު މަހު ބާއްވާ އިންތިޚާބުގައި ވާދަ ކުރެއްވުމުގެ ވިސްނުންފުޅު ނުގެންގުޅުއްވާކަން ހާމަކޮށްފައެވެ. އެހެންނަމަވެސް، ކުރުދީންގެ މިނިވަންކަމުގެ ފެންނަ ނުފެންނަ ވޯޓާއި ގުޅިގެން، ބަރްޒާނީގެ ވިސްނުންފުޅު ބަދަލުކުރައްވާނެ ކަމަށް ކުރުދީންގެ ބައެއް މީހުން އުއްމީދު ކުރިއެވެ.

ކުރުދިސްތާނުގެ ވެރިކަމުގައި 2005 ވަނަ އަހަރުގެ ފަހުން ހުންނެވި ބަރްޒާނީ ވަނީ، އެންމެ ފަހުން 2009 ވަނަ އަހަރު ބޭއްވި ކުރުދީންގެ އިންތިޚާބުވެސް ކާމިޔާބުކޮށްފައެވެ. އެހެންނަމަވެސް، 2013 ވަނަ އަހަރު ރިޔާސީ ދެވަނަ ދައުރުގެ މުއްދަތު ހަމަވުމަށްފަހު، ކުރުދީންގެ ވެރިކަމުގައި ބަރްޒާނީ ދެމިހުންނެވީ ދެފަހަރެއްގެ މަތިން މުއްދަތު އިތުރު ކުރުމަށްފަހު އެވެ.