ލަންކާ އާއި ގަތަރުގެ ގުޅުން ބަދަހި ވަނީ

އުނދަގޫ ދަނޑިވަޅެއްގައި ގަތަރާ އެކު އޮތަތީ ސްރީލަންކާއަށް ޝުކުރު އަދާކުރާ ކަމަށް ގަތަރުގެ ޚާރިޖީ ވަޒީރު ޝެއިޚް މުހައްމަދު ބިން އަބްދުއްރަހްމާން އަލްޘާނީ ވިދާޅުވެއްޖެއެވެ.

އަންގާރަ ދުވަހު ލަންކާގެ ރައީސް މައިތިރިޕާލާ ސިރިސޭނާއާ އެކު ގަތަރުގެ ވެރިރަށް ދޯހާގައި ބޭއްވި ބައްދަލުކުރެއްވުމުގައި ގަތަރުގެ ޚާރިޖީ ވަޒީރު ވިދާޅުވީ ސިރިސޭނާ އާއި ލަންކާގެ ވިޔަފާރި ވަފުދު ގަތަރަށް ކުރެއްވި ދެ ދުވަހުގެ ރަސްމީ ދަތުރުފުޅުގެ ސަބަބުން ދެޤައުމުގެ ގުޅުން، ޚާއްސަކޮށް ވިޔަފާރީގެ ދާއިރާއިން ކުރިއަށް އޮތްތަނުގައި އިތުރުވެގެންދާނެ ކަމަށެވެ.

މި ބައްދަލުކުރެއްވުމުގައި ސިރިސޭނާ ވިދާޅުވީ ބައިނަލްއަޤްވާމީ މައްސަލަތަކާއި ދޭދޭ ޤައުމުތަކުގެ މެދުގައި އުފެދޭ މައްސަލަތަކުގައި ލަންކާއިން ގެންގުޅޭނީ މެދުމިނުގެ ސިޔާސަތެއް ކަމަށާއި، ހުރިހާ ޤައުމަކާ ގުޅިގެން އެކުވެރިކަމާ އެކު މަސައްކަތްކުރުމަށް ލަންކާ އިން އިސްކަންދޭ ކަމަށެވެ. މިދަތުރުފުޅުގައި ސިރިސޭނާ ވަނީ ގަތަރުގެ އިންވެސްޓަރުންނަށް ލަންކާގައި ހުރި އިންވެސްޓްމަންޓް ފުރުސަތުތަކުގެ މައުލޫމާތު ދެއްވާފައެވެ.

ގަތަރަކީ ދުނިޔޭގެ އެންމެ މުއްސަނދި ޤައުމެވެ. ދާދިފަހުން ގަލްފްގައި ހިމެނޭ ބައެއް ޤައުމުތަކުން ސައޫދީއާ ގުޅިގެން ގަތަރާ އެކު އޮންނަ ގުޅުން ކަނޑާލާފައިވާއިރު، ގަތަރުން ގެންދަނީ އޭޝިއާގައި ހުރި އެޤައުމަށް ވާގިވެރިވާ ޤައުމުތަކާ އެކު ވިޔަފާރީގެ ގުޅުން ބަދަހިކުރަމުންނެވެ. ރާއްޖެއަކީ އޭޝިއާ ސަރަހައްދުން ގަތަރާ ގުޅުން ކަނޑާލި ހަމައެކަނި ޤައުމެވެ.