މިއަހަރުގެ އޮސްކާރ އެވޯރޑް ހަފްލާގައި ހޮލީވުޑްގެ މަޝްހޫރު ތަރި ވިލް ސްމިތު, އެވޯރޑް ހަފްލާ ހުށަހަޅައިދޭން ހުރި ކްރިސް ރޮކްގެ ކޯތާފަތް މަތީ ޖެހި މައްސަލާގައި ކުރިޔަށް އޮތް 10 އަހަރު ދުވަހު ބާއްވާ އޮސްކާރ އެވޯރޑްސްގައި އޭނާއަށް ބައިވެރިނުވެވޭގޮތަށް ހޮލީވުޑް ފިލްމް އެކަޑަމީން ނިންމައިފިއެވެ.
މީގެ 12 ދުވަސްކުރިން ހިނގައިދިޔަ މިހާދިސާއާ ގުޅޭގޮތުން އެކަޑަމީ އޮފް މޯޝަން ޕިކްޗަރ އާރޓްސް އެންޑް ސައިންސްގެ ބޯޑުން މިނިންމުން ނިންމާފައި މިވަނީ އެކަޑަމީން ވިލް ސްމިތު އިސްތިއުފާދިންތާ ހަފްތާއެއް ފަހުންނެވެ.
ލައިވްކުރަމުންދިޔަ މިހަފްލާގެ ތެރެއިން ވިލް ސްމިތު ހިންގި މިއަމަލާ ގުޅިގެން އެކަޑަމީގެ ރައީސް ޑޭވިޑް ރުބިންއާއި ޗީފް އެގްޒެކެޓިވް ޑޯވްން ހުޑްސަން ނެރެފައިވާ ބަޔާނުގައި ބުނެފައިވަނީ, 94 ވަނަ އޮސްކާރ އެވޯރޑް ހަފްލާއަކީ ގިނަ އަދަދެއްގެ ބަޔަކު ފާއިތުވި އަހަރު ކޮށްފައިވާ ވަރަށް ފުރިހަމަ މަސައްކަތްތަކެއް ފާހަގަކުރުމަށް ބޭއްވި ހަފްލާއެއްކަމަށެވެ. ނަމަވެސް ވިލް ސްމިތު މިހަފްލާގައި ހިންގާފައިވާ އަމަލުގެ ސަބަބުން އެކަންކަމަށް ހިޔަނިއެޅިފައިވާކަމަށާއި, މިއީ އެއްވެސް ގޮތަކަށް ބަލައިގަނެވޭނެ ކަމެއް ނޫންކަމަށެވެ.
އެކަޑަމީގެ ބަޔާނާ ގުޅިގެން ވިލް ސްމިތު ނެރެފައިވާ ބަޔާނުގައި ބުނެފައިވަނީ, އެކަޑަމީގެ ނިންމުން ގަބޫލުކުރާކަމަށާއި އެނިންމުމަށް އިހުތިރާމްކުރާކަމަށެވެ. ވިލް ސްމިތު ވަނީ އޭނާ އެވޯރޑް ހަފްލާގައި ކުރި ކަންތަކާ ގުޅިގެން ކްރިސް ރޮކްގެ ކިބައިންނާއި އޮސްކާރގެ ޕްރޮޑިއުސަރުންނާއި އެވޯރޑަށް ނޮމިނޭޓްވި ފަރާތްތަކުގެ ކިބައިންނާއި ބެލުންތެރިންގެ ކިބައިން މައާފަށް އެދިފައެވެ.
އޮސްކާރ އެވޯރޑް ހަފްލާތަކުން ބާކީކުރުމުގެ އިތުރުން އެކަޑަމީގެ ހުރިހާ އިވެންޓްތަކާއި ޕްރޮގްރާމްތަކުގައިވެސް ކުރިޔަށް އޮތް 10 އަހަރު ބައިވެރިނުވެވޭގޮތަށް އެކަޑަމީން ވަނީ ނިންމާފައެވެ.
ނަމަވެސް މި ދުވަސްތަކުގެ ތެރޭގައި ވިލް ސްމިތު އޮސްކާރއަށް ނޮމިނޭޓް ވާނެކަމެއް ނުވަތަ ނޫން ކަމެއް އެކަޑަމީން ހާމަކޮށްފައެއްނުވެއެވެ.
