ދާދިފަހުން ނެގިގެންދިޔަ ކުރުދީންގެ މިނިވަންކަމުގެ ފެންނަ ނުފެންނަ ވޯޓުން ނުކުތް ނަތީޖާ މަޑުޖައްސާލައި އިރާގްގެ މައި ސަރުކާރާއެކު މަޝްވަރާތަކަށް ދިއުމަށް ކުރުދީންގެ ސަރަހައްދީ ސަރުކާރުން ހުށަހަޅައިފިއެވެ.
ސަރުކާރުން ނެރެފައިވާ ބަޔާނެއްގައި ބުނެފައިވަނީ "އިތުރު ހަމަނުޖެހުންތަކާ ކުރިމަތިލުންތައް ހިނގިޔަ ނުދިނުމަށް" ހަމަލާ ބަދަލުކުރުން ހުއްޓާލުމަށް ހުށަހަޅާފައިވާނެ ކަމަށެވެ.
މިދިޔަ ހަފްތާގައި ހަމަލާތައް ފެށިގެން ދިޔައީ، ތެލުގެ ގޮތުން މުއްސަނދި ކިރްކުކާއި ކުރުދީން ކޮންޓްރޯލް ކުރަމުންދިޔަ އިތުރު ސަރަހައްދުތައް އިރާގު ސަރުކާރުގެ ފައުޖުތަކުން ހިފުމާ ގުޅިގެންނެވެ.
އެކަން ހިނގާފައިވަނީ ކުރުދީން ވަކި ދައުލަތެއް ގާއިމްކުރުމަށް ފެނޭތޯ ބެލުމަށް އެ ސަރަހައްދުގައި ނެގި ފެންނަ ނުފެންނަ ވޯޓަށްފަހުއެވެ.
"ހުއްޓުމެއްނެތި ކުރާ ހަނގުރާމަޔަކުން އެއްވެސް ބަޔަކަށް ނަސްރެއް ނުލިބޭނެ،އޭގެ ބަދަލުގައި މަސްލަހަތު ގެއްލި ގައުމުދާނީ ހަމަނުޖެހުމަކަށް "ސަރުކާރުގެ ބަޔާނުގައިވެއެވެ.
އިރާގް އަދި ޕެޝްމާގާ ހަނގުރާމަވެރިންނާ ދެމެދު އޮކްޓޯބަރު މަހުގެ 16 ވަނަ ދުވަހު ފެށިފައިވާ ހަމަލާތަކާ ކުރިމަތިލުންތައް ދިގު ދެމިގެންދާ ލޭ އޮހޮރުވުމަކަށް ވެގެން ހިނގައިދާނެކަމަށް ބަޔާނުގައި ބުނެފައިވެއެވެ.
އިރާގުގެ ސަރުކާރުން ބުނާގޮތުގައި މިނިވަން ދައުލަތެއް ގާއިމް ކުރުމަށް ކުރުދީން ނެގި ވޯޓަކީ ޣައިރު ގާނޫނީ ވޯޓެކެވެ. އަދި މައްސަލަ ހައްލުކުރުމަށް މަޝްވަރާއަށްވަނީ ގޮވާލާފައެވެ.
އިރާގުގެ ބޮޑުވަޒީރު ހައިދަރު އަލް އަބާދީ މިދިޔަ މަހުވަނީ ވޯޓުން ނުކުތް ނަތީޖާ ބާތިލް ކުރުމަށް ކުރުދިސްތާނުގެ ސަރަހައްދީ ސަރުކާރަށް ބާރު އަޅުއްވާފައެވެ.
އަބާދީ ވިދާޅުވެފައިވަނީ އެ ވޯޓަކީ އިރާގުގެ ރައްޔިތުންގެ މެދުގައި ސުލްހައަށް ހުރަސްއެޅި ސަރަހައްދަށް ނުރައްކާވާނެ ކަމެއްކަމަށެވެ. އަދި އެ ސަރަހައްދު އިރާގުގެ މައި ސަރުކާރުގެ ދަށަށް ގެންދާނެ ކަމަށްވެސް ވަނީ ވިދާޅުވެފައެވެ.
އިރާގުގެ އުތުރުގެ ސަރައްދުގައި އޮންނަ ކުރިދިސްތާނުން ވަކި ދައުލަތެއް ގާއިމް ކުރުމަށް ފެނޭތޯ ނެގި ވޯޓްގައި އެ ސަރަހައްދުގެ ރައްޔިތުންގެ ބޮޑު އަޣްލަބިއްޔަތެއްވަނީ މިނިވަން ދައުލަތެއް ގާއިމް ކުރުމަށް ފެންނަ ކަމަށް ވޯޓް ދީފައެވެ.
އިލެކްޓޯރަލް ކޮމިޝަނުން ބުނެފައިވާ ގޮތުގައި 3.3 މިލިއަން މީހުންގެ ތެރެއިން 92 އިންސައްތަ މީހުން ވަނީ ވަކި ދައުލަތެއް ގާއިމް ކުރުމަށް ތާއީދުކޮށްފައެވެ.
އިންތިޚާބުގައި ކުރުދީންނާއި ކުރުދީން ނޫން މީހުންވެސް ވޯޓްލާފައިވެއެވެ.
