ދުނިޔޭގެ ޞިއްހަތު ޖަމިއްޔާ (ޑަބްލިއުއެޗްއޯ) ގެ ގުޑްވިލް އެމްބެސެޑަރގެ މަގާމަށް ޒިމްބާބްވޭގެ ޚުދުމުޚްތާރު ރައީސް ރޮބަޓް މުގާބޭ ހަމަޖެއްސުމަށްފަހު، ފާޑުކިޔުންތަކާއި ގުޅިގެން އެމަގާމުން ވަކިކޮށްފި އެވެ.
ނަން-ކޮމިއުނިކަބަލް (ގައިން ގަޔަށް ނާރާ) ބަލިތަކަށް ހޭލުންތެރިކަން އިތުރުކުރުމަށް ހިންގާ ކެމްޕެއިންގެ ގުޑްވިލް އެމްބެސެޑަރަކަށް މުގާބޭ ހަމަޖެއްސެވިކަން އިޢުލާން ކޮށްފައިވަނީ މިދިޔަ ބުދަ ދުވަހު އުރުގުއާއީގައި ބޭއްވި ޑަބްލިއުއެޗްއޯގެ ބައްދަލުވުމެއްގައެވެ.
މުގާބޭވެސް ބައިވެރިވަޑައިގެންނެވި ނަން-ކޮމިއުނިކަބަލް ޑިޒީޒަސް (އެންސީޑީ) އާއިގުޅޭ މަތީ ފަންތީގެ ބައްދަލުވުމުގައި އެކަން އިޢުލާން ކޮށްދެއްވީ ޑަބްލިއުއެޗްއޯގެ ޑިރެކްޓަރ ޖެނެރަލް ޑރ. ޓެޑްރޮސް އެވެ.
މުގާބޭ އެމަގާމަށް ހަމަޖެއްސުމާއި ގުޅިގެން ބައިނަލްއަޤްވާމީ ފާޑުކިޔުންތައް އަމާޒުވެފައިވަނިކޮށް، އެނިންމުން އަނބުރާ ގެންދަވާ ގުޑްވިލް އެމްބެސެޑަރގެ މަގާމް މުގާބޭގެ އަތްޕުޅުން އަތުލައްވާފައިވަނީ އެމަގާމަށް ހަމަޖެއްސެވިތާ 4 ދުވަސް ވެސް ނުވަނީހެވެ.
ޑަބްލިއުއެޗްއޯގެ އިސްވެރިޔާ ޑރ. ޓެޑްރޮސް ޓްވިޓަރ މެދުވެރިކޮށް އާދީއްތަ ދުވަހު އާއްމުކޮށްފައިވާ ބަޔާނުގައި ވަނީ، އެންސީޑީގެ އެފްރިކާ ބައްރުގެ ގުޑްވިލް އެމްބެސެޑަރަކަށް ރޮބަޓް މުގާބޭ ހަމަޖެއްސެވުމާއިގުޅިގެން ކުރިމަތިވި ފާޑުކިޔުންތަކާއި ގުޅިގެން އެނިންމެވުމާއިމެދު އަލުން ވިސްނާވަޑައިގެންފައިވާ ކަމަށެވެ.
އެބަޔާނުގައި ވަނީ، ގުޑްވިލް އެމްބެސެޑަރަކަށް މުގާބޭ ހަމަޖެއްސެވުމާއި ގުޅިގެން އެކި ފަރާތްތަކުން ފާޅުކޮށްފައިވާ ކަންބޮޑުވުންތައް ކަނުލައި އަޑުއައްސަވައި، އެފަރާތްތަކުގެ ޝަކުވާތައް ބަލައިގެންފައިވާ ކަމަށެވެ. އަދި އެކަމާއި ގުޅިގެން ޒިމްބާބްވޭގެ ސަރުކާރާއިވެސް މަޝްވަރާކޮށްފައިވާ ކަމަށާއި، މުގާބޭ އެމަގާމުން ވަކިކުރަން ނިންމާފައިވަނީ ޑަބްލިއުއެޗްއޯ އަށް އެންމެ މަސްލަހަތު ހުރި ގޮތަށް ބެލުމަށްފަހުގައި ކަމަށެވެ.
އުމުރުފުޅުން 93 އަހަރުގެ ރޮބަޓް މުގާބޭ، ޑަބްލިއުއެޗްއޯގެ ގުޑްވިލް އެމްބެސެޑަރަކަށް ހަމަޖެއްސުމަކީ، އެޖަމިއްޔާގެ އެހެން މެމްބަރު ގައުމުތަކާއި، އެހީދޭ ފަރާތްތަކަށް ސިހުން ލިބިގެންދިޔަ ނިންމެވުމެކެވެ.
ޑަބްލިއުއެޗްއޯގެ ނިންމުމަށް ޒިމްބާބްވޭގައި އިންސާނީ ޙައްޤުތަކަށް މަސައްކަތްކުރާ ފަރާތްތަކުން ފެށިގެން، ދުނިޔޭގެ ބޮޑެތި ބާރުތަކާއި ހަމަޔަށް ފާޑު ކިޔާފައިވެއެވެ. އެގޮތުން ޒިންމާބްވޭގެ އިންސާނީ ޙައްޤުތަކަށް މަސައްކަތް ކުރާ ވަކީލަކު ވަނީ، މުގާބޭގެ އަމިއްލަފުޅު ގައުމުގެ ޞިއްހީ ނިޒާމް ހަލާކުކޮށްފައިވާ ގުޑްވިލް އެމްބެސެޑަރަކު ހުރުމާއިމެދު ދެކެނީ ކިހިނެއްތޯ ޑަބްލިއުއެޗްއޯ އާއި ސުވާލު ކުރައްވާފައެވެ.
މީގެ އިތުރުން، ޒިމްބާބްވޭގެ ބައެއް އާއްމުން ވަނީ، މުގާބޭގެ އާލާސްކަންފުޅަށް ޒިމްބާބްވޭގެ ސިއްހީ ނިޒާމްގެ ބޭނުން ނުކުރައްވާ، ސިއްހީ ފަރުވާ ހޯއްދެއްވުމަށް ޤައުމުން ބޭރަށް ވަޑައިގެންނެވުމަކީ، ޒިމްބާބްވޭގެ ސިއްހީ ނިޒާމުގެ ދުޅަހެޔޮކަން ހުރި މިންވަރު ވަޒަންކޮށްދޭ ކަމެއް ކަމަށް ބުނެ، ސޯޝަލް މީޑިއާގައި ޚިޔާލު ފާޅުކޮށްފައެވެ.
ނޫފެ އިތުރުން ޒިމްބާބްވޭގެ ސިއްހީ ނިޒާމުގެ ފެންވަރު ދަށް ކަމުން، މުގާބޭ ސިއްހީ ފަރުވާ އަށް ވަޑައިގަންނަވަނީ ސިންގަޕޫރަށް ކަމަށް ބުނެ ބައެއް އާއްމުން ހިތްހަމަނުޖެހުން ފާޅުކޮށްފައިވެއެވެ.
ޑަބްލިއުއެޗްއޯގެ މިނިންމުމާއި ގުޅިގެން އިނގިރޭސިވިލާތުގެ ސަރުކާރުން ވަނީ، މިއީ ހައިރާންކަމާއި މާޔޫސްކަން ގެނުވި ނިންމުމެއް ކަމަށް ވިދާޅުވެ، އެނިންމުމުގެ ސަބަބުން ޑަބްލިއުއެޗްއޯގެ މަސައްކަތްތަކަށް ހިޔަނި އެޅޭނެ ކަމުގެ އިންޒާރު ދީފައެވެ.
މީގެ އިތުރުން ކެނަޑާގެ ބޮޑުވަޒީރު ޖަސްޓިން ޓްރުޑެއޫ ވަނީ، އޭނާ އަށް ހީފުޅުކުރެއްވުނީ އެއީ "އޭޕްރީލް ފޫލް" ޖޯކެއްގެ ގޮތުގައި ކަމަށް ވިދާޅުވެފައެވެ.
އެމެރިކާގެ ޚާރިޖީ ވުޒާރާއިން ވަނީ، ޑަބްލިއުއެޗްއޯގެ ނިންމުމާއި، އިންސާނީ ޙައްޤުތަކާއި އިންސާނީ ކަރާމާތަށް އިހްތިރާމް ކުރުމަށް އދ. އިން ގެންގުޅޭ ފިކުރާއި ސާފުކޮށް ފުށުއަރާ ކަމަށް ބުނެފައެވެ.
ޒިމްބާބްވޭގެ އިންސާނީ ޙައްޤުތަކުގެ ހާލަތާއި ގުޅޭ ގޮތުން އެމެރިކާ އަދި ވިލާތުގެ އިއްތިހާދުން އަބަދުވެސް މުގާބޭގެ ސަރުކާރަށް ފާޑުކިޔައެވެ.
ޑަބްލިއުއެޗްއޯގެ ގުޑްވިލް އެމްބެސަޑަރަކަށް މުގާބޭ ހަމަޖެއްސެވުމުގެ ނިންމެވުމަށް ފާޑު ކިޔާ ބައިނަލްއަޤްވާމީ ޖަމާއަތްތަކުގެ ތެރޭގައި ވެލްކަމް ޓްރަސްޓް، އެންސީޑީ އެލަޔަންސް، ޔޫއެން ވޮޗް، ވޯލްޑް ހާރޓް ފެޑެރޭޝަން އަދި އެކްޝަން އަގައިންސްޓް ސްމޯކިންގ ހިމެނެއެވެ.
