މިމަހުގެ 31 ގައި ނެރުމަށް ތައްޔާރު ވަމުން އަންނަ ދިވެހި ފިލްމު "ބޮސް" ގެ ތީމް ލަވަތައް ލޯންޗުކުރުމުގެ މަސައްކަތް ކުރަމުން އަންނަ ކަމަށް ޑައިރެކްޓަރ ފާތިމަތު ނަހުލާ ބުނެފިއެވެ.

ނަހުލާ ރާއްޖެއެމްވީއަށް ބުނީ ތީމް ލޯންޗު ކުރާނީ ފޭސްބުކް މެދުވެރިކޮށް ކަމަށެވެ.

"ބޮސް" ގައި ހިމެނޭ 6 ލަވަ މިހާރު ވަނީ ރިލީޒް ކޮށްފައެވެ. ނަހުލާބުނީ "ބޮސް" ގެ އިތުރު 2 ލަވައަކީ ފިލްމުގެ ތީމް ލަވަތައްކަމަށާއި  މިހަފްތާ ތެރޭގައި  ރިލީޒް ކޮށް ނިމޭނެ ކަމަށެވެ. އެ 2 ލަވައަކީ ލަވަކިޔުންތެރިޔާ އިބްރާހިމް އަލީ އަދި އަބްދުލް ޣަނީ (ތޭރަވާ) ކިޔާފައިވާ 2 ލަވައެވެ.

"ބޮސް" ގެ  5 ޝޯ މިހާތަނަށް ވަނީ ފުލްވެފައެވެ.

ނަހުލާ ބުނީ މި ފިލްމުގެ ފުރަތަމަ ޝޯގެ ޓިކެޓު ވިއްކަނީ 200 ރުފިޔާއަށް ކަމަށާއި އެހެން ޝޯތަކަށް ޓިކެޓު ވިއްކަނީ 100 ރުފިޔާ އަށް ކަމަށެވެ. ނަހުލާ ބުނީ ފުރަތަމަ ޝޯގައި ޝޯބަލަން ވަންނަ ކޮންމެ ފަރާތަކަށް ވެސް ކޮންމެވެސް ކަހަލަ ހަދިޔާއެއް ލިބޭނެ ކަމަށާއި އެ ހަދިޔާ ލިބޭނީ ފިލްމުގެ ތަރިންނާއި ފިލްމަށް ލަވަކިޔައިދީފައިވާ ފަރާތްތަކުގެ އަތުން ކަމަށެވެ.

މި ފިލްމަށް އޮންލައިން ބުކިންވެސް ހެދޭނެއެވެ. އެގޮތުން މި ފިލްމުގެ ވެބްސައިޓް www.bos-themovie.com މެދުވެރިކޮށް ޓިކެޓް އޮންލައިންކޮށް ބުކްކުރުމުގެ ފުރުސަތު ލިބިގެންދާނެ ކަމަށް ނަހުލާ ބުންޏެވެ.

"ބޮސް"ގެ ލީޑް ރޯލުން ފެނިގެން ދަނީ އަލަށް ތައާރަފުވާ މުހައްމަދު ޔުނާންއާ އެކު އައްޒަ އެވެ.ފިލްމްގެ އިތުރު ކާސްޓުންގެ ތެރޭގައި އިބްރާހީމް ޖިހާދު (ޖިމީ)، ފާތުމަތު އާޒިފާ (އަޒޫ)، އަލީ އާޒިމް (ދޮންއައްޔަ) އަދި އަލީ ޝަމީލް ހިމެނެ އެވެ.

"ބޮސް" ގައި ހިމެނެނީ 6 ލަވައެވެ. މި ލަވަތައް ކިޔާފައި ވަނީ މުހައްމަދު އަބްދުލް ޣަނީ (ތޭރަވާ) އާއި، އިބްރާހިމް ޒައިދު އަލީ (ކުޑައިއްބެ) އަދި ޝަލަބީ އިބްރާހިމާއި، ހަމޫދުގެ އިތުރުން ރާފިޔަތު ރަމީޒާ، މާއިން ރަޝީދާއި، ފާތިމަތު އަޝްފާއެވެ. މި ފިލްމުގެ ޕްރޮޑިއުސަރަކީ މަޝްހޫރު ބަތަލާ އައިޝަތު ރިޝްމީއެވެ.