ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ)ގެ ގުޑްވިލް އެމްބެސެޑަރަކަށް ޒިމްބާބްވޭގެ ޚުދުމުޚުތާރު ލީޑަރު ރޮބަޓް މުގާބޭ ހަމަޖައްސައިފިއެވެ.
ވާރލްޑް ހެލްތު އޯގަނައިޒޭޝަންގެ ގުޑްވިލް އެމްބެސެޑަރަކަށް މުގާބޭ ހަމަޖައްސާފައިވަނީ، ނަން-ކޮމިއުނިކަބަލް (ގައިންގަޔަށް ނާރާ) ބަލިތަކާއި ދެކޮޅަށް ހިންގާ ކެމްޕެއިނަށެވެ.
ޑަބްލިއުއެޗްއޯގެ އިސްވެރިޔާ ޑރ. ޓެޑްރޮސް އަދަނޮމް ގެބްރެޔޭސަސް ވަނީ ޒިމްބާބްވޭގެ ޞިއްޙީ ނިޒާމަށް ތައުރީފް ކުރައްވާފައެވެ. އިތިއޯޕިއާއަށް ނިސްބަތްވެވަޑައިގަންނަވާ ޑރ. ޓެޑްރޮސް އަކީ ޑަބްލިއުއެޗްއޯގެ އެފްރިކާ ބައްރަށް އުފަން ފުރަތަމަ އިސް ވެރިޔާއެވެ.
އެބޭފުޅާ އެމަގާމަށް އިންތިޚާބުވެފައިވަނީ، އެމަގާމުގައި ކުރިން ހުންނެވި މާގަރެޓް ޗަން، 10 އަހަރަށްފަހު މިދިޔަ ޖޫން މަހު އެމަގާމުން ވަކިވުމާއި ގުޅިގެންނެވެ. ޑަބްލިއުއެޗްއޯގެ އިސް ވެރިޔާގެ މަގާމަށް ޑރ. ޓެޑްރޯސް އިންތިޚާބުވީ އެޖަމިއްޔާ ސިޔާސީ ނުފޫޒުން މިނިވަން ކުރުމުގެ މެންޑޭޓާއި އެކުގައެވެ.
އެހެންނަމަވެސް މުގާބޭގެ 37 އަހަރުވީ ދިގު ވެރިކަމުގެ ތެރޭގައި އެޤައުމުގެ ޞިއްޙީ ޚިދުމަތްތެރިންނަށް ޤަވާއިދުން މުސާރަ ނުދިނުމާއި، އެކަށިގެންވާ މިންވަރަށް ބޭހުގެ ބާވަތްތައް ނުލިބުން ފަދަ މައްސަލަތަކާއި ގުޅިގެން ޞިއްޙީ ނިޒާމް ބަލިކަށިވެފައިވާ ކަމަށް ފާޑުކިޔާ ފަރާތްތަކުން ބުނެއެވެ.
އުމުރުފުޅުން 93 އަހަރުގެ ރޮބަޓް މުގާބޭ، ޑަބްލިއުއެޗްއޯގެ ގުޑްވިލް އެމްބެސެޑަރަކަށް ހަމަޖެއްސުމަކީ، އެޖަމިއްޔާގެ އެހެން މެމްބަރު ގައުމުތަކާއި، އެހީދޭ ފަރާތްތަކަށް ސިހުން ލިބިގެންދިޔަ ނިންމެވުމެކެވެ.
އާއްމު ގޮތެއްގައި މިފަދަ ޖަމިއްޔާތަކުން ގުޑްވިލް އެމްބެސެޑަރުންގެ ގޮތުގައި ކަނޑައަޅާ ފަރާތްތަކަކީ ދުނިޔެއަށް ދިމާވެފައިވާ އެކި ކަހަލަ މައްސަލަތަކަށް ހައްލު ހޯދުމާއި، އެފަދަ ކަންކަމަށް ހޭލުންތެރިކަން އިތުރު ކުރުމަށް ރަމްޒީ މަސައްކަތްތަކެއް ކުރައްވާ ބައެކެވެ. އެހެންނަމަވެސް، ސިއްޙީ ހިދުމަތުގެ ނިޒާމް ރޫޅިފައިވުމާއި، އިންސާނީ ޙައްޤުތަކުގެ ހާލަތާއި ގުޅިގެން ގިނަ ފާޑުކިޔުންތަކެއް އަމާޒުވެފައިވާ ޒިންމާމްބޭގެ ޚުދުމުޚުތާރު ރައީސް ރޮބަޓް މުގާބޭއަށް މިމަގާމް ދިނުމަކީ، ގަބޫލު ކުރެވޭނެ ނިންމުމެއް ނޫން ކަމަށް ބައެއް ފަރާތްތަކުން ބުނެއެވެ.
ޑަބްލިއުއެޗްއޯގެ ގުޑްވިލް އެމްބެސެޑަރެއްގެ ގޮތުގައި މުގާބޭ ބައިވެރިވާނީ ނަން-ކޮމިއުނިކަބަލް (ގައިންގަޔަށް ނާރާ) ބަލިތަކާއި ގުޅޭ ކެމްޕެއިން ތަކުގައެވެ. ނަން-ކޮމިއުނިކަބަލް ބަލިތަކަކީ، ދިގު މުއްދަތަކަށް ދެމިގެންދާ އަދި، ބަލި ހާލަތަށް ގިނަ ދުވަހުން ބަދަލު އަންނަ، ގައިންގަޔަށް ނާރާ ބަލިތަކެވެ. އެފަދަ ބަލިތަކުގެ ތެރޭގައި ހިމެނެނީ ހިތް ހުއްޓުމާއި ސްޓްރޯކް ޖެހުންފަދަ ހިތުގެ ބަލިތަކާއި، ކެންސަރު، އަދި ނޭވާލާ ނިޒާމުގެ ބަލިތަކާއި ހަކުރު ބަލި ފަދަ ބަލިތަކެވެ.
ދުނިޔޭގައި އެންމެ ގިނައިން މީހުން މަރުވާ ކަމަށް ރެކޯޑް ކުރެވިފައިވަނީ ނަން-ކޮމިއުނިކަބަލް ބަލިތަކުގެ ސަބަބުންނެވެ. އެގޮތުން އަހަރެއްގެ މައްޗަށް މަރުވާ މީހުންގެ 63 އިންސައްތަ އަކީ އެފަދަ ބަލިތަކާއި ގުޅިގެން ދުނިޔެ ދޫކުރާ މީހުންނެވެ. މިފަދަ ބަލިތަކާއި ގުޅިގެން ކޮންމެ އަހަރަކު 36 މިލިއަނަށްވުރެ ގިނަ މީހުން މަރުވާއިރު، އޭގެ ތެރެއިން 80 އިންސައްތަ އަކީ، ދަށް އަދި މެދު ފަންތީގެ އާމްދަނީ ލިބޭ ފަގީރު ގައުމުތަކުން މަރުވާ މީހުންނެވެ.
