ޑަބްލިއުއެޗްއޯގެ ގުޑްވިލް އެމްބެސެޑަރުކަން މުގާބޭ އެއްވެސް އިރެއްގައި ބޭނުންފުޅު ނުވޭ: ތަރުޖަމާނު
ޑަބްލިއުއެޗްއޯގެ ނިންމުމަށް ގިނަ ބަޔަކު ފާޑުކިޔާފައިވޭ
ރައީސް މުގާބޭ
ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ)ގެ ގުޑްވިލް އެމްބެސެޑަރަކަށް ޒިމްބާބްވޭގެ ލީޑަރު ރޮބާޓް މުގާބޭ އެއްވެސް އިރެއްގައި ވެވަޑައިގަންނަވަން ބޭނުންފުޅުގެން އެކަމަށް ނުދަންނަވާ ކަމަށް އޭނާގެ ތަރޖަމާނު ވިދާޅުވެއްޖެއެވެ.
އަންގާރަ ދުވަހު މުގާބޭގެ ތަރުޖަމާނު ޖޯޖް ޗަަރަމްބާ ވިދާޅުވީ ޑަބްލިއުއެޗްއޯގެ ގުޑްވިލް އެމްބެސެޑަރުކަން ދެއްވިއަސް، ގަބޫލުފުޅު ވެސް ނުކުރައްވާނެ ކަމަށެވެ. ރަސްމީގޮތުން ޑަބްލިއުއެޗްއޯގެ ގުޑްވިލް އެމްބެސެޑަރުކަމާ ހަވާލުވެވަޑައިގަތުމަށް މުގާބޭ އަށް ޑަބްލިއުއެޗްއޯ އިން ނުވެސް ދަންނަވާ ކަމަށް ވެސް އޭނާ ވިދާޅުވިއެވެ.
ޑަބްލިއުއެޗްއޯގެ ގުޑްވިލް އެމްބެސެޑަރަކަށް ޒިމްބާބްވޭގެ ޚުދުމުޚިުތާރު ލީޑަރު މުގާބޭ ހަމަޖެއްސެވުމަށް އެއިދާރާއިން ނިންމި ނިންމުން ބަދަލު ކުރުމުގެ މަސައްކަތް ފަަށައިފި ކަމަށް އާދީއްތަ ދުވަހު އެ އިދާރާއިން ވަނީ ބުނެފައެވެ.
ޑަބްލިއުއެޗްއޯ އިން ހިންގާ ގައިންގަޔަށް ނާރާ ބަލިތަކުގެ ކެމްޕެއިންގެ ގުޑްވިލް އެމްބެސެޑަރަކަށް މުގާބޭ ހަމަޖެއްސެވުމަށް ނިންމީ އެޖަމިއްޔާގެ ޑިރެކްޓަރ ޖެނެރަލް ޑރ. ޓެޑްރޯސް އަދަނޮމް ގެބްރެޔޭސަސް އެވެ. ޑރ. ޓެޑްރޯސްގެ މިނިންމެވުމަށް ގިނަ ބަޔެއްގެ ފާޑު ކިޔުންތައް އަމާޒުވެފައިވެ އެވެ. ގުޑްވިލް އެމްބެސަޑަރަކަށް މުގާބޭ ހަމަޖެއްސެވުމަށް ނިންމެވިކަން އިއުލާން ކުރައްވަމުން ޑަބްލިއުއެޗްއޯގެ ޑިރެކްޓަރ ޑރ ޓެޑްރޮސް ވަނީ ޒިމްބާބްވޭގެ ސިއްހީ ނިޒާމަށް ވަރަށް ބޮޑަށް ތައުރީފް ކުރައްވާފައެވެ. އެގޮތުން ޒިމްބާބްވޭ އަކީ ސަރުކާރުގެ ސިޔާސަތުތަކުގެ ތެރެއިން ހުރިހާ ރައްޔިތުންނަށް ސިއްހީ ޚިދުމަތް ފޯރުކޮށްދޭ ގައުމެއް ކަމަށް ވިދާޅުވެފައި ވެއެވެ.
އެހެންނަމަވެސް މުގާބޭގެ 37 އަހަރުވީ ދިގު ވެރިކަމުގެ ތެރޭގައި އެގައުމުގެ ސިއްހީ ޚިދުމަތްތެރިންނަށް ގަވާއިދުން މުސާރަ ނުދިނުމާއި، އެކަށިގެންވާ މިންވަރަށް ބޭހުގެ ބާވަތްތައް ނުލިބުން ފަދަ މައްސަލަތަކާ ގުޅިގެން ސިއްހީ ނިޒާމް ބަލިކަށިވެފައިވާ ކަމަށް ފާޑުކިޔާ ފަރާތްތަކުން ބުނެއެވެ. އަދި ޔުނިވާސަލް ހެލްތު ސިސްޓަމް ނުވަތަ ތަފާތުކުރުމެއް ނެތި އެންމެންނަށް ދައުލަތުން އެއަށް ވުރެ މާ ފުރިހަމައަށް ބޭސްފަރުވާ ކޮށްދޭ ގައުމުތަށް އެބަހުރި ކަމަށް ވެސް ފާޑުކިޔާ ފަރާތްތަކުން ބުނެފައި ވެއެވެ.
