ރައީސް ޔާމީން ގެންނަވަމުންދާ ތަރައްޤީ ބަލައިނުގަންނަނީ ކީއްވެ؟

އުސް އިމާރާތްތައް އަރައިގެން އަންނަ މަންޒަރާއި، ބްރިޖުގެ ތަނބުތައް ކަނޑުން އުފުލިގެންދާ މަންޒަރު އެބަ ފެނެއެވެ. އެއާޕޯޓުގެ އާ ރަންވޭއާއި އެއާޕޯޓަށް އަންނަމުންދާ ހެޔޮ ބަދަލުތައްވެސް ފެނިގެން އެބަދެއެވެ. އުމްރާނީ ތަރައްގީގެ މަގުތައް ކޮށި، ބަލަން ބޭނުންނުވާ މީހުންނަށް ވެސް އެމަންޒަރު އެބަ ދައްކައެވެ. އައިޖީއެމްއެޗްގެ 25 ބުރީގެ އިމާރާތް އަރައިގެންދާ މަންޒަރު ބަލަން ބޭނުންނުވި ފަރާތްތަކަށް އެ މަންޒަރުވެސް ދައްކައިފިއެވެ. ހުޅުލެއާއި މާލެއާ ދެމެދު އަޅާ ބްރިޖުގެ އުސް ތަނބުތަކާ ދިމާލަށް ބަލަން ބޭނުން ނުވިޔަސް އެ މަންޒަރު ވެސް އެބަ ފެނެއެވެ. ރަށްރަށުގެ ބަނދަރާއި މަގުތަކާއި ނަރުދަމާގެ ނިޒާމުތައް ވެސް އެދަނީ ޤާއިމް ކުރަމުންނެވެ.

ރައީސް އަބްދުﷲ ޔާމީންގެ ވެރިކަމަށް ހަތަރު އަހަރު ފުރެންދާއިރު އުމްރާނީ ތަރައްގީގެ ރޮނގުގައި ރާއްޖެ ކުރިއަރަމުން އަންނަކަމީ ދެބަސްވެވެން ނެތް ހަގީގަތެކެވެ. ބޮޑެތި މަޝްރޫއުތަކެއް ގައުމުގައި ހިނގަމުންދާކަމީ ސަރުކާރަށް ހިތްހަމަޖެހުމެވެ. 2018 އާ ދިމާލަށް ބާލީސް ބާއްވާލައިގެން ސަރުކާރުގެ ވެރިން ނިދަނީ މި ތަރައްގީގެ ސަބަބުން ވޯޓް ލިބޭނެ ކަމުގެ އުންމީދުގައެވެ. އެހެންނަމަވެސް، ހަމަ ހަގީގަތުގައި މި ސަރުކާރުގެ ތަރައްގީ ރައްޔިތުން ބަލައިގަނޭތޯ ސުވާލު ކޮށްލަންޖެހެއެވެ.

ރައީސް ޔާމީން ބައިވެރިވެވަޑައިގަންނަވާ ޖަލްސާއަށް މީހުން ގެންދަންޖެހެނީ މަޖުބޫރުކޮށްގެންނެވެ. ސިވިލް ސަރވިސް މުވައްޒަފުންނާއި، ދައުލަތުގެ ކުންފުނިތަކުގެ މުވައްޒަފުންނަށް ކަރުދާސްކޮޅެއްގައި ސްޓާފް އައިޑީ އާއި އިންނަންޖެހޭ ގޮނޑީގެ ނަމްބަރު ދީގެންނެވެ. ޖަލްސާއަށް ދިއުމުގެ ކުރިން އޮފީހަށް ވަދެ ފިންގަރ އިން ކުރަންޖެހެއެވެ. ހާޒިރީ މާކު ކުރެވެއެވެ. ފާޅުގައި މިކަންތައް ކުރަމުންދާ ކަމަށް ޕީޕީއެމާއި ކުންފުނިތަކުގެ ވެރިން އެއްބަސް ވެސް ވަނީއެވެ. ރައީސް ޔާމީން މިވަރުގެ ތަރައްގީއެއް ގެންނަމުންދާއިރު، އަމިއްލަ އަށް ފެނިގެން، އެއްވެސް މަޖުބޫރުކަމެއް ނެތި ޖަލްސާއަށް މީހުން ނުދަނީ ކީއްވެ ހެއްޔެވެ؟ އަޅުގަނޑު ހިތުން މިއީ ކޮންމެހެން ވެސް ކޮށްލުން ރަނގަޅު ސުވާލެކެވެ. މިއީ ޖަވާބު ބޭނުންވާ ވެސް ސުވާލެކެވެ.

ރައީސް ޔާމީނެވެ. ޕީޕީއެމްގެ އިސްވެރިންނެވެ. ސަރުކާރުގެ ބޮޑުންނެވެ. ޖަލްސާއަށް މީހުން ނުދަނީ އިންސާފު ނެތީމައެވެ. މަޖުބޫރުކޮށްގެން ޖަލްސާއަށް މީހުން ގެންދަން ޖެހެނީ ގައުމުގައި އަދާލަތު ނެތީމައެވެ. ތިޔަ ގެންނަވާ ތަރައްގީ ރައްޔިތުން ބަލައިނުގަންނަނީ ހަމަހަމަކަމެއް ނެތީމައެވެ. ޖަލްސާގެ އިންތިޒާމްތަކުގައި މިނިސްޓްރީތަކާއި ކުންފުނިތަކުގެ މުދާ ބޭނުންކުރާތީއެވެ. ކޮރަޕްޝަނާއި ފަސާދަައިގެ ސަޓަނިގަނޑަކަށް މުޅި ދައުލަތް ބަދަލުކޮށްލެވިފައިވާތީއެވެ. ހުރިހާ މަންޒަރެއްވެސް ރައްޔިތުންނަށް އެބަ ފެނެއެވެ. ހުރިހާ އަޑެއްވެސް އެބަ އިވެއެވެ. ރައްޔިތުންގެ ބަސް އިއްވާ ދުވަހު، ވޯޓް ފޮށިން މީގެ ޖަވާބު ދޭނެއެވެ. ލޯކަލް ކައުންސިލް އިންތިޚާބަކީ މިކަމުގެ އަލިގަދަ ހެއްކެކެވެ.

މިއަދު މަޖުބޫރު ކޮށްގެން މުވައްޒަފުންތައް ޖަލްސާއަށް ގެންދެވިދާނެއެވެ. ފަގީރުކަމުގެ ނާޖާއިޒު ފައިދާ ނެގިދާނެއެވެ. ކުލި ދައްކާ ދައްކާ ހަފުސްވާ ދިރިއުޅުމެއްގައި އުޅޭ ބަޔަކު ވަޒީފާއަށްޓަކައި ޖަލްސާތަކަށް ދާނެއެވެ. ވަޒީފާގެ ހައްގުގައި ގޮނޑި ހޫނުކޮށްލަން ހިނގައިދާނެއެވެ. ވަޒީފާ ގެއްލިއްޖެނަމަ ދެން ވާނެ ނިކަމެތި ގޮތް އެނގޭތީއެވެ. ހާލުގައި ޖެހިގެން ދާނެ ތަނެއް ނެތްކަން އެންމެންނަށް އެބަ އެނގެއެވެ. ހައްގެއް ގެއްލިގެން އެ ހައްގުގެ ވާހަކަ ދެއްކޭކަށް ނެތެވެ. އިންސާފުގެ ވާހަކަ ދައްކާ މީހާއަކީ ޣައްދާރަކަށްވަނީއެވެ. ނިކަމެތިންގެ ރުއިމުގެ އަޑު އަހާނެ ކަންފަތެއް ހުރި ނަމަ، ފްލެޓްތައް ބެހުމުގައި އިންސާފުވެރިވީސްކަން ކަށަވަރެވެ. މީހުން ދިރިމިއުޅޭ ނިކަމެތި ހާލު ވެރިންނަށް ފެންނަ ނަމަ، ހަމަހަމަކަމާއި އިންސާފުވެރިކަން އެކަމުގައި އިސްކުރީހެވެ.

ރައީސް ޔާމީނެވެ. އުސް އިމާރާތްތަކާއި ކޮންކްރީޓުން ގެންނަ ތަރައްގީއަށްވުރެ ރައްޔިތުންނަށް އިންސާފުވެރިކަން މިއަދު މާ މުހިންމެވެ. ހައްގުތަކާއި މިނިވަންކަން ކަށަވަރުވެފައި އޮތުން މުހިންމެވެ. ގާނޫނަށް ބޯލަނބާ ވެރިންތަކަކާއި ގާނޫނު ނަގަހައްޓާނެ ވެރިކަމެއް މާ މުހިންމެވެ. ނުހައްގު ދައުވާތައް އުފުލި، އުމުރު ދުވަސް ހުރަގޭގައި އޮންނަން ނުޖެހޭނެ ދުވަހެއް ދެކެން ރައްޔިތުން ބޭނުމެވެ. ޖަލުގެ ތޭރިތަކުގެ ފަހަތުގައި ދެވެމުންދާ ބޮޑެތި އަނިޔާތައް ހުއްޓުވަން ބޭނުމެވެ. އިދާރީ އިންތިޒާމްތަކުގައި ހަމައާއި އިންސާފު އޮންނަން ބޭނުންވެއެވެ. އެއްވެސް ބިރެއް، ޖެހިލުމެއް ނެތި އިންސާފު ހޯދަން ދެވޭނެ ދުވަހެއް އައުން ރައްޔިތުން އެދެއެވެ. އަނިޔާ ލިބިފައިވާ މީހާއަށް މުއައްސަސާތަކުން އިންސާފު ލިބޭނެ ކަމުގެ އިތުބާރު އެބަ ބޭނުންވެއެވެ. ރައްޔިތުންގެ ފުށުން ފެށިގެން އަންނަ ވެރިކަމަކީ ރައްޔިތުންގެ ހައްގުގައި ދެމިއޮންނަ ވެރިކަމަކަށް ވުމުގެ އުންމީދު ގައުމުގައި މާބޮޑެވެ.

މިގައުމު މިއޮއްހާ ޒަމާން ވަންދެން ދެމި އޮތީ މިފަދަ އުންމީދުތައް ރައްޔިތުން ކުރާތީއެވެ. ރައްޔިތުން ގައުމާ މެދު ދެކޭ ހުވަފެންތަކުގެ ސަބަބުންނެވެ. މިއީ މަޖުބޫރުކޮށްގެން ބިރުދައްކައިގެން ރައްޔިތުންގެ ކިބައިން ނިގުޅައިގަނެވޭނެ އެއްޗެއް ނޫނެވެ. އުސް އިމާރާތްތަކާއި ބްރިޖް މަތިން ރައްޔިތުން ދަތުރުކުރާނެއެވެ. އެ ތަރައްގީ ބަލައިވެސް ގަންނާނެއެވެ. އެހެން ނަމަވެސް، ބްރިޖު މައްޗަށް ފައި އަޅާއިރު އެތަނުގެ ކޮންކްރީޓްގަނޑުގެ ނަމުގައި ހިންގާފައިވާ ޚިޔާނާތާއި، ވެރިންގެ ބަނޑަށް ދިޔަވަރު އަބަދުގެ އަބަދަށް ރައްޔިތުން ހަނދާން ކުރާނެއެވެ. އައިޖީއެމްއެޗްގެ 25 ބުރީގެ އިމާރާތަށް އަރާއިރު، އެތަން އިމާރާތްކުރުމުގެ ނަމުގައި މުއްސަނދިވި އެންމެންގެ ނަންތައް ރައްޔިތުން ހަނދާން އާކުރާނެއެވެ. މިއަދު އިންސާފު ނުލިބުނަސް، އެމީހުން ފަހާ ރައްޔިތުން ދުވާނެ ދުވަހެއް އަންނާނެއެވެ.

ތަރައްގީގެ ތަފާއްޔެއް ލޯމަތީގައި އަޅައިގެން ރައްޔިތުން ތިއްބަސް، ނިކަން ރަނގަޅަށް ވާނުވާ އެނގެއެވެ. ދިވެހިންނަކީ ގުނބޯތަކެއް ކަމަށް ހީކުރެވުމަކީ ވެރިންގެ ގަމާރުކަމެވެ.