ލަންކާގެ އަސްކަރިއްޔާއަށް 7000 ސިފައިން ހޯދަނީ
20 އޮކްޓޯބަރު 2017 | ހުކުރު 09:59މިއީ ލަންކާގެ އަސްކަރިއްޔާ ތަރައްޤީކުރުމަށް ކުރަމުންދާ މަސައްކަތުގެ ބައެއް
ލަންކާ ސިފައިންގެ ޚާއްސަ ފައުޖުގެ ސިފައިން
30 އަހަރަށްވުރެ ދިގު މުއްދަތަކަށް ދެމިގެންދިޔަ ލަންކާގެ ދާޚިލީ ހަނގުރާމަ 2009 ވަނަ އަހަރު ނިމުނުފަހުން ލަންކާގެ އެއްގަމު ސިފައިންގެ ލަޝްކަރަށް ގެންނަ ތަރައްޤީގެ ތެރެއިން އިތުރު 7000 ސިފައިން ހޯދުމަށް ނިންމައިފިއެވެ.
ލަންކާގެ އަސްކަރިއްޔާއިން ބުނީ ލަންކާގެ އެއްގަމު ސިފައިންގެ ލަޝްކަރަށް އިތުރު 7000 ސިފައިން ހޯދަން ނިންމީ އާރމީގެ އެންމެ އިސްވެރިޔާ ލެފްޓިނަންޓް ޖެނެރަލް މަހޭޝް ސެނަނަޔަ އެއްގަމު ސިފައިންގެ ލަޝްކަރަށް ގެންނަވާ ބަދަލުތަކުގެ ތެރެއިންކަމަށެވެ. މި ސިފައިން ނެގުމަށް ނިންމާފައިވަނީ ކޮމާންޑޯ، ސްޕެޝަލް ފޯސަސް އަދި އިންފެންޓްރީ ރެޖިމެންޓްތަކަށްކަމަށް އަސްކަރިއްޔާއިން ބުނެއެވެ. އަދި ސިފައިން ނެގުމުގައި އަންހެން ސިފައިންނާއި ފިރިހެން ސިފައިން ނަގާނެކަމަށް އަސްކަރިއްޔާގެ ތަރުޖަމާނު ވިދާޅުވިއެވެ. ލަންކާގެ އެއްގަމު ސިފައިންގެ ލަޝްކަރަށް ގިނަ އަދަދަކަށް މީހުން ހޯދިނަމަވެސް، ކަނޑުގެ ސިފައިންނާއި ވައިގެ ސިފައިންގެ ލަޝްކަރަށް މިހާ ގިނަ އަދަދެއްގެ ސިފައިން އިތުރުކުރުމުގެ ވިސްނުމެއް މިވަގުތު ނެތްކަމަށް އަސްކަރިއްޔާއިން ބުނެއެވެ.
ލަންކާގެ ދާޚިލީ ހަނގުރާމަ ނިމުމަށްފަހު ގިނަ އަދަދެއްގެ ސިފައިން ފުލުހުންގެ ވަޒީފާއަށާއި މަދަނީ ވަޒީފާތަކަށް ބަދަލުވިއެވެ. ލަންކާގެ ދާޚިލީ ހަނގުރާމައިގެ ދުވަސްވަރު ލަންކާގެ ސިފައިންގެ ޚާއްސަ ފައުޖުތަކަކީ ދުނިޔޭގެ އެންމެ ވަރުގަދަ ޚާއްސަ ފައުޖުތަކުގެ ތެރޭގައި ހިމެނޭ ބައެކެވެ.
