ހަތިޔާރު އެޅި ހުރިހާ ޖަމާއަތެއް ކިރްކުކުން ބޭލުމަށް އިރާގްގެ ބޮޑުވަޒީރު ގޮވާލައްވައިފި
19 އޮކްޓޯބަރު 2017 | ބުރާސްފަތި 01:30ކިރްކުކް އިރާގް ސަރުކާރުގެ ކޮންޓްރޯލްގެ ދަށަށް ގެންދެވިފައިވަނީ ހަމަލާ ބަދަލުކޮށްގެން
ރުޅިވެރިކަން ފަތުރައި ނަސްލީ ތަފާތުކުރުން ގެންގުޅޭ ފަރާތްތައް ބެލުމަށްވެސް އަބާދީ ގޮވާލެއްވި
ހަތިޔާރު އެޅި އެންމެހާ ޖަމާއަތްތައް ކިރްކުކުން ބާލައި ސަލާމަތީ ކަންކަން ބެލެހެއްޓުން ފުލުހުންނާއި ކައުންޓަރ ޓެރެރިޒަމް ޔުނިޓާ ހަވާލުކުރުމަށް އިރާގުގެ ބޮޑުވަޒީރު ހައިދަރު އަލް އަބާދީ ބުދަ ދުވަހު ގޮވާލައްވައިފިއެވެ.
އަބާދީ ނެރުއްވި ބާޔާނެއްގައިވަނީ "ކިރްކުކްގެ ސަލާމަތީ ކަންކަން އޮތީ ކައުންޓަރ ޓެރެރިޒަމް ޔުނިޓްތަކުގެ އެހީތެރިކަމާއެކު ފުލުހުންގެ ކޮންޓްރޯލްގެ ދަށުގައި" ކަމަށް ވިދާޅުވެފައެވެ.
މީގެއިތުރުން އަބާދީގެ ބަޔާނުގައިވަނީ ހަތިޔާރު އެޅި އެއްވެސް ޖަމާއަތެއް އެ ޕްރޮވިންސަށް ވަނުން ހުއްޓުވައި ރުޅިވެރިކަން ފަތުރައި ނަސްލީ ތަފާތުކުރުން ގެންގުޅޭ ފަރާތްތައް ބެލުމަށް ގޮވާލައްވާފައެވެ.
ވޭތުވެ ދިޔަ ދެ ދުވަހެއްގެ ތެރޭގައި އެ ސިޓީއަށް ހަތިޔާރުއެޅި ގިނައަދެދެއްގެ ޖަމާއަތްތައް ވަދެފައިވާއިރު ކުރުދީން ތިބީ ކަންބޮޑުވުމެއްގައެވެ.
ކުރުދިސްތާނުން އެ ސަރަހައްދުގެ މިނިވަންކަމަށް ފެނޭތޯ ބެލުމަށް ސެޕްޓެމްބަރު މަހު ނެގި ފެންނަ ނުފެންނަ ވޯޓަށްފަހު ދެ ފަރާތުގެ މެދުގައިވަނީ ކުރުދީންގެ މުސްތަގްބަލާމެދު ނުތަނަވަސްކަން އުފެދިފައެވެ.
ބަޣްދާދުން ބޭނުންވަނީ ކުރުދިޝް ޕެޝްމާގާ ހަނގުރާމަވެރިން 2014 ވަނަ އަހަރު އައިއެސްއާ ހަނގުރާމަކޮށް އަތުލާފައިވާ ތެޔޮ އުފައްދާ ސަރަހައްދުތައް އަނބުރާ ހޯދުމަށެވެ.
ކިރުކުކަކީ ވަކިވެފައިވާ ކުރުދިސްތާނުގެ ބައެއް ނޫނެވެ.
