ގަދަ ހަތަރެއްގައި އޮންނަންޖެހެއޭ ބުނާ ޓީމުތަކަށް ޖާގަ ނުލިބިގެން އުޅެނީ ކްލަބް ގްރީން ސްޓްރީޓް އޭގެ ތެރެއަށް ވަދެގެން އުޅޭތީ ކަމަށް އެޓީމުގެ ކޯޗު ސޮބާހު މުހައްމަދު (ސޮބާ) ބުނެފި އެވެ.
މާލޭ ލީގުގައި މާޒޔާއާ ދެކޮޅަށް ގްރީން ނިކުންނަ މެޗުގެ ކުރިން ނޫސްވެރިންނަށް މައުލޫމާތު ދެމުން ސޮބާ ބުނީ ގަދަ ހަތަރެއްގައި ވަކި ޓީމުތައް ހިމެނެންޖެހޭ ކަމަށް ބައެއް ޓީމުތަކުން ބުނާ ކަމަށާއި، އެހެންނަމަވެސް އެޓީމުތަކަށް ގަދަ ހަތަރަކަށް ނޭރިގެން އުޅެނީ ގްރީންގެ ސަބަބުން ކަމަށެވެ.
ސޮބާ ބުނީ ގްރީން އޮންނަނީ ފަހަތުގައި ފާރެއްގޮތަށް އެތުރިގެން ނޫން ކަމަށާއި، ޕޮއިންޓްތައް ހޯދީ ރަނގަޅަށް މަސައްކަތްކޮށްގެން އެޓޭކިން ފުޓުބޯޅައަކާއެކުގައި ކަމަށެވެ.
ސޮބާ ބުނީ މާޒިޔާ އާއި ނިއުރޭޑިއަންޓް ފިޔަވައި ގްރީންއާއެކު ހަތަރު ޓީމެއް މާލޭ ލީގުގެ ގަދަ ހަތަރަކަށް ވާދަކުރަމުން އަންނަ ކަމަށެވެ. އެގޮތުން އޭނާ ބުނީ ގަދަ ހަތަރެއްގައި ހިމެނުމަށް ފަހު މެޗާ ހަމަޔަށް އަދި ފަހު ސިކުންތާ ހަމަޔަށްވެސް މަސައްކަތްކުރާނެ ކަމަށެވެ.
މާޒިޔާއާ ބެހޭގޮތުން ވާހަކަދައްކަމުން ސޮބާ ބުނީ އެޓީމު ލީގުގައި މިހާތަނަށް ދެ މެޗުން ބަލިވެފައިވީ ކަމުގައިވިޔަސް އެއީ އަދިވެސް ރާއްޖޭގައި އޮތް އެންމެ ވަރުގަދަ އެއް ކްލަބް ކަމަށާއި، އެހެންނަމަވެސް ގްރީން އޮތީ އެއްވެސް ގޮތަކަށް ދޫދޭ ގޮތަށް ނޫން ކަމަށެވެ.
ސޮބާ ބުނީ ޕޮއިންޓެއް ނަމަވެސް ހޯދައިގެން ގްރީން އަށް މާލޭ ލީގުގެ ގަދަ ހަތަރެއްގެ ޖާގައެއް ކަށަވަރުކުރެވިދާނެ ކަމަށާއި، މާޒިޔާ އަށް ސަސްޕެންޝަންގެ މައްސަލަތައްކުރިމަތިވި ނަމަވެސް އެއީ ގްރީން އަށް ލިބޭ އެޑްވާންޓޭޖެއް ކަމަށް އޭނާ ނުދެކޭ ކަމަށެވެ.
