ސައިނާގައި ދިން ހަމަލާތަކެއްގައި މިސްރު ސިފައިންގެ ތިން މީހަކު މަރާލައިފި

މިސްރުގެ ސައިނާ ޕެނިންސޫލާގައި އިސްލާމިކް ސްޓޭޓްގެ ހަނގުރާމަވެރިން ކަމަށް ބެލެވޭ ބަޔަކު ދިން ހަމަލާތަކެއްގައި މިސްރު ސިފައިންގެ ތިން މީހަކު މަރާލައިފި އެވެ.

މިސްރުގެ ސަލާމަތީ އަދި ސިއްހީ އޮފިޝަލުންނާއި ހަވާލާދީ އެސޯސިއޭޓެޑް ޕްރެސް (އޭޕީ) އިން ބުނީ، ސައިނާ ޕެނިންސޫލާގައި ހަމަނުޖެހުން ބޮޑު އުތުރުގެ ސަރަޙައްދުގައި ހުރި މިސްރުގެ އަސްކަރީ 6 ޗެކްޕޮއިންޓަކަށް ހަމަލާދީފައިވާ ކަމަށެވެ. އަދި މިހަމަލާތަކުގައި މިސްރުގެ ސިފައިންގެ 3 މީހަކު މަރުވެ، 11 މީހަކު ޒަޚަމްވެފައިވާ ކަމަށް އޭޕީން ރިޕޯޓް ކޮށްފައިވެއެވެ.

ސައިނާ ޕެނިންސޫލާގެ އުތުރުގައި ޝެއިޚް ޒްވެއިދު އަވަށުގެ ކައިރީގައި އާދީއްތަ ދުވަހު ދިން ހަމަލާގައި މަރުވި މީހުންގެ އަދަދު އިތުރުވުން އެކަށީގެންވާ ކަމަށް ރިޕޯޓްތައް ބުނެ އެވެ.

ނަން ހާމަކުރަން ނޭދޭ އޮފިޝަލަކާއި ހަވާލާދީ އޭޕީ އިން ބުނީ، މިއީ އިސްލާމިކް ސްޓޭޓްގެ ހަނގުރާމަވެރިންގެ ހަމަލާތަކެއް ކަމަށް ބެލެވޭ ކަމަށާއި، އަސްކަރީ ޗެކްޕޮއިންޓް ތަކަށް ހަމަލާދީފައިވަނީ ފުލުފުލުގައި ކަމަށެވެ.

ފަލަސްތީނުގެ ޣައްޒާ އަދި އިޒްރޭލާއި ސަރަހައްދީ ރޮނގު ހިއްސާކުރާ، ސައިނާގެ އުތުރުގައި ގާއިމްވެފައިވާ ހަނގުރާމަވެރިންނާއި މިސްރުގެ ސަލާމަތީ ފައުޖުތަކާއި ދެމެދު ދޭތެރެދޭތެރެއިން ކުރިމަތިލުންތައް ހިނގައެވެ.

އެހެންނަމަވެސް، 2013 ވަނަ އަހަރު މިސްރުގެ ރައީސް މުޙައްމަދު މުރްސީގެ މުސްލިމް ބްރަދަހުޑްގެ ވެރިކަން އެޤައުމުގެ އަސްކަރިއްޔާގެ ބަޣާވާތަކުން ވައްޓާލިފަހުން އެސަރަޙައްދުގައި ހަނގުރާމަވެރިންނާއި މިސްރުގެ އަސްކަރިއްޔާގެ ފައުޖުތަކާއި ދެމެދު ހިނގާ ކުރިމަތިލުންތައް ވަނީ އިތުރުވެފައެވެ.

އެސަރަޙައްދުގައި ހަމަލާތައް އާއްމުވެފައިވާއިރު، ގިނަ ހަމަލާތަކުގެ ޒިންމާ ނަގާފައިވަނީ އިސްލާމިކް ސްޓޭޓްގެ ހަނގުރާމަވެރިންނާއި ގުޅުން އޮންނަ މިސްރުގެ ހަނގުރާމަވެރި ގްރޫޕަކުންނެވެ.