ސިޓީއަށް މެސީ ގެންނަން ބޭނުން: އަގުއޭރޯ

މެންޗެސްޓާ ސިޓީއަށް ބާސެލޯނާއަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީ ގެންނަން ބޭނުންވާ ކަމަށް އެ ޓީމުގެ ފޯވާޑް ސާޖިއޯ އަގުއޭރޯ ބުނެފިއެވެ.

ބުދަ ދުވަހުގެ ރޭ އާޖެންޓީނާއަށް ވޯލްޑް ކަޕްގެ ޖާގައެއް ކަށަވަރު ކޮށްދިން މެސީ ސިޓީއަށް ގެންނަން ބޭނުންވާ ކަމަށް "ޓީވައިސީ ސްޕޯޓްސް" އާ ވާހަކަ ދައްކަމުން އަގުއެރޯ ވަނީ ބުނެފައެވެ. މޭކަށިގަނޑަށް ލިބުނު އަނިޔާއެއްގެ ސަބަބުން މި މެޗުގައި ނުކުޅެވުނު އަގުއޭރޯ، ސިޓީއަށް މެސީ ގެންނަން ބޭނުންވާ ކަމަށް ބުނިއިރު މެސީ ބާސާއާއެކު ހަދާފައިވާ ކޮންޓްރެކްޓް އަދި އާކޮށްފައެއް ނުވެއެވެ.

ބާސާއާއެކު އޭނާ ހަދާފައިވާ ކޮންޓްރެކްޓްގައި ބާކީ އެއް އަހަރު އޮތް އިރު އަންނަ ޖެނުއަރީ މަހުގެ ކުރިން އޭނާ އާ ކޮންޓްރެކްޓެއްގައި ސޮއި ނުކޮށްފިނަމަ އެހެން ކްލަބުތަކުން މެސީ އަށް ކޮންޓްރެކްޓް ހުށަހެޅުމުގެ ފުރުސަތު ހުޅުވިގެން ދާނެއެވެ.

އަގުއޭރޯ ބުނެފައިވަނީ މެސީ ގެނައުމުގައި ސިޓީއަށް ފައިސާއަކީ އެއްވެސް މައްސަލަ އަކަށް ނުވާނެ ކަމަށާއި އެހެނަސް ބާސާގެ ނިޝާނެއް އެ ކްލަބުން ގެނައުމަކީ ނުވާނެ ކަމެ ކަމަށެވެ. އެގޮތުން ކްރިސްޓިއާނޯ ރޮނާލްޑޯ އާއި ލިއޮނެލް މެސީ އަކީ އެ ދެ ކުޅުންތެރިން ކުޅޭ ކްލަބުތަށް ރަމްޒުކޮށްދޭ އެންމެ ވަރުގަދަ ނިޝާންތަށް ކަމަށާއި އެހެންކަމުން ތަފާތު ކްލަބަކަށް އެފަދަ ކުޅުންތެރިން ގެނައުމަށް ކުރެވޭ މަސައްކަތުގެ ނަތީޖާ ނުފެންނާނެ ކަމަށެވެ.

ހަމައެހެންމެ ސިޓީއަށް މެސީ ގެންނަން ބޭނުންވާ ކަމަށާއި އޭނާއަކީ ކޮންމެ ދަނޑިވަޅެއްގައިވެސް މެޗު ބަދަލުކޮށްލުމުގެ ހުނަރު ލިބިފައިވާ ކުޅުންތެރިއެއް ކަމަށް އަގުއޭރޯ ބުނެފައިވެއެވެ. އޭނާ އާއި ކުރިމަތިވި އެކްސިޑެންޓާ ބެހޭގޮތުން އަގުއޭރޯ ބުނެފައިވަނީ ހުސް ދެ ދުވަސް ލިބުމުން އޭނާ ނިންމީ އެމްސްޓަޑެމްއަށް ދާން ކަމަށާއި އެފަދަ ނުރައްކާތެރި ކަމަކާއި ދިމާވެދާނެ ކަމަށް ދުވަހަކުވެސް ގަބޫލް ނުކުރެވޭ ކަމަށެވެ. އަގުއޭރޯ ވަނީ އާދިއްތަ ދުވަހުގެ މެޗުގައި އޭނާ ފެނިދާނޭ ކަމުގެ އިޝާރާތެއް ވެސް ދީފައެވެ.

ސިޓީގެ ތާރީޚުގައި އެންމެ ގިނަ ލަނޑު ޖަހާފައިވާ އެރިކް ބްރޫކްގެ 177 ލަނޑުގެ ރެކޯޑާއި އަރާ ހަމަކުރަން އަގުއޭރޯ އަށް ބޭނުން ވަނީ އެންމެ ލަނޑެކެވެ.

މެންޗެސްޓަރ ސިޓީ މިވަގުތު އޮތީ ލަނޑުގެ ތަފާތުން އިނގިރޭސި ޕްރިމިއަރ ލީގު ތާވަލްގެ ކުރީގައެވެ. ލީގުގެ ދެވަނާގައިވާ މެންޗެސްޓަރ ޔުނައިޓެޑް އަދި ސިޓީ އަށް ވެސް ލިބިފައި ވަނީ 19 ޕޮއިންޓެވެ. ޔުނައިޓެޑަށް ފައިދާ 19 ލަނޑު އޮތްއިރު، ސިޓީ އަށް ފައިދާ 20 ލަނޑު އެބައޮތެވެ.

އިނގިރޭސި ޕްރިމިއަރ ލީގުގައި ހޮނިހިރު ދުވަހު ސިޓީ ނުކުންނާނީ ސްޓޯކް ސިޓީއާ ދެކޮޅަށެވެ.