ބަންގްލަދޭޝްގައި ރޮހިންޖާ މުސްލިމުންނަށް އެހީ ފޯރުކޮށްދެމުންދާ ތިން އެންޖީއޯއެއްގެ މަސައްކަތް ހުއްޓުވައިފި

ބަންގްލަދޭޝްގައި ރޮހިންޖާ މުސްލިމުންނަށް އެހީ ފޯރުކޯށްދެމުންދާ ތިން އެންޖީއޯއެއްގެ މަސައްކަތް، ނަހަމަ ކަންކަން ހިންގަމުންދާތީ ކަމަށް ބުނެ ބަންގްލަދޭޝްގެ ސަރުކާރުން ހުއްޓުވައިފިއެވެ.

މިޔަންމާ އިން އެގައުމުގެ ރޮހިންޖާ މުސްލިމުންނާ މެދު ހިންގަމުންދާ ލާއިންސާނީ އަމަލުތަކާ ހެދި ގައުމު ދޫކޮށް ބަންގްލަދޭޝް އަށް ދަނީ އެތައްހާސް ރެފިއުޖީނެއް ހިޖުރަކުރަމުންނެވެ.

ރިޕޯޓުތައް ބުނާގޮތުން ބަންގްލަދޭޝް އިން މަސައްކަތް ހުއްޓުވި ތިން އެންޖީއޯ އަކީ މުސްލިމު އެއިޑް ބަންގްލަދޭޝް، އިސްލާމިކް ރިލީފް އަދި އައްލާމާ ފަޒްލުﷲ ފައުންޑޭޝަނެެެވެ.

ވެރިކަން ކުރާ ބަންގްލަދޭޝް އަވާމި ލީގް ޕާޓީ ގެ، ގާނޫނު ހަދާ މަޖިލީހުގެ މެމްބަރެއް ކަމަށްވާ މަހްޖަބީން ހާލިދް މީޑިއާ އަށް ވިދާޅުވީ މަނާ ކުރި ތިން އެންޖީއޯ އިން ދިޔައީ އެހީ ފޯރުކޮށްދިނުމުގެ އިތުރުން ސިއްރު އޮޕަރޭޝަންތައް ހިންގަމުންނެވެ. އެކަމަނާ އިތުރަށް ވިދާޅުވެފައި ވަނީ އެހީގެ ކަންކަން ކުރިއަށް ގެންދާ އިތުރު އެންޖީއޯތަކެއްގެ މަސައްކަތް ވެސް ހުއްޓުވާފައިވާ ކަމަށެވެ. އެ އެންޖީއޯތަކުގެ މަސައްކަތްެ ވެސް ހުއްޓުވާފައި ވަނީ ރަނގަޅު އުސޫލުތަކުގެ ތެރެއިން ކަންކަން ކުރިއަށް ނުގެންދާތީ ކަަމަށެވެ.

އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ވަނީ މިޔަންމާގެ ރޮހިންޖާ މުސްލިމުންނާ ދެކޮޅަށް އާ އޮޕަރޭޝަނެއް ފަށާފައެވެ. މިޔަމަންމާގެ މުސްލިމުންނާ ދެކޮޅަށް އެގައުމުގެ ސަރުކާރުން ބާރުދީގެން، އަސްކަރިއްޔާއިން ދަނީ ބާރުގެ ބޭނުންކޮށް، މުސްލިމުން ގެދޮރުން ފައްސާލައި، ބައެއް މީހުން މަރައި، އަދި އަންހެން ކުދިންގެ އިއްފަަތް ފޭރިގަންނަމުންނެވެ. މިޔަންމާގެ އަސްކަރިއްޔާ އިން ފަށާފައިވާ އޮޕަރޭޝަނާ ބެހޭ ގޮތުން އދ. އިން ބުނެފައި ވަނީ އެއީ "ނަސްލެއް ނައްތާލުމުގެ" އޮޕަރޭޝަނެއް ކަމަށެވެ. އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ހިންގާ ލާއިންސާނީ އަމަލުތަކުން ސަލާމަތްވުމަށް މިހާތަނަށް 500،000 އަށް ވުރެ ގިނަ ރޮހިންޖާ މުސްލިމުން ބަންގްލަދޭޝްއަށް ހިޖުރަ ކޮށްފައި ވެއެވެ.

އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން އެގައުމުގެ ރޮހިންޖާ މުސްލިމުންނާ ދެކޮޅަށް ހިންގަމުންދާ ލާއިންސާނީ އަމަލުތަކުން ސަލާމަތްވުމަށް ބަންގްލަދޭޝްއަށް ދިޔަ މުސްލިމުން އެނބުރި މިޔަންމާ އަށް އަޔަނުދިނުމަށްޓަކައި މިޔަންމާގެ އަސްކަރިއްޔާ އިން "ތަރުތީބުވެގެން، ކޯޑިނޭޓެޑް ކުރެވިގެން އަދި ސިސްޓަމެޓިކް" ގޮތެއެްގައި މަސައްކަތް ކޮށްފައިވާ ކަމަށް އދ. ގެ އިންސާނީ ހައްގުތަކާ ބެހޭ އޮފީހުން ބުދަ ދުވަހު ވަނީ ބުނެފައެވެ.