ރޮހިންޖާ މުސްލިމުން އެނބުރި އަޔަނުދިނުމަށްޓަކައި މިޔަންމާގެ އަސްކަރިއްޔާ އިން މަސައްކަތްކޮށްފައިވޭ: އދ. ގެ ރިޕޯޓު

އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން އެގައުމުގެ ރޮހިންޖާ މުސްލިމުންނާ ދެކޮޅަށް ހިންގަމުންދާ ލާއިންސާނީ އަމަލުތަކުން ސަލާމަތްވުމަށް ބަންގްލަދޭޝްއަށް ދިޔަ މުސްލިމުން އެނބުރި މިޔަންމާ އަށް އަޔަނުދިނުމަށްޓަކައި މިޔަންމާގެ އަސްކަރިއްޔާ އިން "ތަރުތީބުވެގެން، ކޯޑިނޭޓެޑް ކުރެވިގެން އަދި ސިސްޓަމެޓިކް" ގޮތެއެްގައި މަސައްކަތް ކޮށްފައިވާ ކަމަށް އދ. ގެ އިންސާނީ ހައްގުތަކާ ބެހޭ އޮފީހުން ބުދަ ދުވަހު ބުނެފިއެވެ.

އދ. އިން ނެރުނު ރިޕޯޓެއްގައި ބުނީ ބަންގްލަދޭޝްއަށް އެތެރެވި ރޮހިންޖާ މުސްލިމުންނާ ކުރެވުނު އިންޓަވިއުތަކަށް ބަލާއިރު، ރޮހިންޖާ މުސްލިމުންނަށް މިޔަންމާގެ އަސްކަރިއްޔާ އިން ހަމަލާތަކެއް ދޭން ފެށީ މިޔަންމާގެ ފުލުހުންގެ ޕޯސްޓްތަކަށް އޮގަސްޓް 25 ވަނަ ދުވަހު ރޮހިންޖާގެ ހަތިޔާރު އެޅި ބަޔަކު ހަމަލާ ދިނުމުގެ ކުރިންކަން އެގޭ ކަަމަށެވެ.

ރިޕޯޓުގައި އިތުރަށް ބުނީ އިތުބާރު ހުރި މަސްދަރުތަކުން ލިބިފައިވާ މައުލޫމާތުތަކަށް ބަލާއިރު މިޔަންމާގެ އަސްކަރިއްޔާއިން ރޮހިންޖާ މުސްލިމުންގެ ތަންތަން ގަސްދުގައި ހަލާކުކޮށްލާފައިވާ ކަމަށް ބެލެވޭ ކަމަށާއި އަދި ރަކައިން ސްޓޭޓުގެ ބައެއް އަވަށްތައް އަންދާފައިވާ ކަމަށް ބެލެވޭ ކަމަށެވެ. މިހެން މިކަންކަން ކުރަނީ ނުވަތަ ކުރީ ރޮހިންޖާ މުސްލިމުން ރަކައިން ސްޓޭޓުން ބޭރުކުރުމަށާއި އަދި ދެން ރޮހިންޖާ މުސްލިމުން އިތުރަށް އެބައިމީހުންގެ ދެދޮރަށް އަޔަ ނުދޭން ކަމަށްވެ ސް ރިޕޯޓުގައި ބުނެފައިވެއެވެ.

އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ވަނީ މިޔަންމާގެ ރޮހިންޖާ މުސްލިމުންނާ ދެކޮޅަށް އާ އޮޕަރޭޝަނެއް ފަށާފައެވެ. މިޔަމަންމާގެ މުސްލިމުންނާ ދެކޮޅަށް އެގައުމުގެ ސަރުކާރުން ބާރުދީގެން، އަސްކަރިއްޔާއިން ދަނީ ބާރުގެ ބޭނުންކޮށް، މުސްލިމުން ގެދޮރުން ފައްސާލައި، ބައެއް މީހުން މަރައި، އަދި އަންހެން ކުދިންގެ އިއްފަަތް ފޭރިގަންނަމުންނެވެ. މިޔަންމާގެ އަސްކަރިއްޔާ އިން ފަށާފައިވާ އޮޕަރޭޝަނާ ބެހޭ ގޮތުން އދ. އިން ބުނެފައި ވަނީ އެއީ "ނަސްލެއް ނައްތާލުމުގެ" އޮޕަރޭޝަނެއް ކަމަށެވެ. އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ހިންގާ ލާއިންސާނީ އަމަލުތަކުން ސަލާމަތްވުމަށް މިހާތަނަށް 500،000 އަށް ވުރެ ގިނަ ރޮހިންޖާ މުސްލިމުން ބަންގްލަދޭޝްއަށް ހިޖުރަކޮށްފައި ވެއެވެ.

މިޔަންމާގައި 1.1 މިލިއަން ރޮހިންޖާ މުސްލިމުން އުޅެއެވެ. ގާތްގަނޑަކަށް އެހުރިހާ ރޮހިންޖާ މުސްލިމުން ދިިރިއުޅެނީ މިޔަންމާގެ ހުޅަނގު އައްސޭރިފަށުގެ ސްޓޭޓެއް ކަމަށްވާ ރަކައިން ސްޓޭޓުގައެވެ.