އެމްއެންޑީއެފްގެ ''އެކްސަސައިޒް ޖައްރާފާ-2026'' ފަށައިފި
22 ނޮވެމްބަރު 2026 | އާދީއްތަ 07:08އެމްއެންޑީއެފް ފަޔަރ އެންޑް ރެސްކިޔު ސަރވިސްގެ އޮޕަރޭޝަނަލް ޕްލޭނަށް އަހުލުވެރިވުމަށް ބާއްވާ މި ތަމްރީނުތައް މާލެ ސަރަހައްދުގެ އެކި ރަށްތަކުގައި ކުރިއަށްދާނެ. ބޮޑެތި އަލިފާނުގެ ހާދިސާތަކުގައި ހަރަކާތްތެރިވުމުގެ ހުނަރާއި ވަސީލަތްތައް ބޭނުންކުރާނެ ގޮތް ދަސްކޮށްދޭ މި އެކްސަސައިޒް ކުރިއަށްދާއިރު، ސައިރަންއާއެކު ފަޔަރ ވެހިކަލްތައް މަގުތަކުގައި ހަރަކާތްތެރިވާނެ ކަމަށް އެމްއެންޑީއެފުން ބުނޭ. މި މަހުގެ 23 ގެ ނިޔަލަށް ކުރިއަށްދާ މި ހަރަކާތަކީ 2013 ވަނަ އަހަރުން ފެށިގެން ކޮންމެ އަހަރަކު ބާއްވަމުން އަންނަ ތަމްރީނެއް


އެމްއެންޑީއެފްގެ ''އެކްސަސައިޒް ޖައްރާފާ-2026'' ފެށި ރަސްމިއްޔާތުގެ ތެރެއިން | އެމްއެންޑީއެފް
އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ބާއްވާ ''އެކްސަސައިޒް ޖައްރާފާ-2026'' ފަށައިފި އެވެ.
މި މަހު 22 ވަނަ ދުވަހު ފެށި މި އެކްސަސައިޒް ބޭއްވުމުގެ މަގުސަދުތަކުގެ ތެރޭގައި ބޮޑެތި އަދި އުނދަގޫ އަލިފާނުގެ ހާދިސާތަކަށް އިޖާބަދީ، ފަޔަރ ފައިޓަރުން ހަރަކާތްތެރިވާއިރު، ފަޔަރ ފައިޓަރުންނަށް ލިބިފައިވާ އިލްމާއި ހުނަރާއި ވަސީލަތްތައް އޭގެ އެންމެ ފުރިހަމަ ގޮތުގައި ބޭނުންކޮށްގެން ހާދިސާތައް މެނޭޖްކުރާ މިންވަރު ދެނެގަތުމުގެ އިތުރުން، ފަޔަރ އިމަޖެންސީ އޮޕަރޭޝަން ޕްލޭނަށް ފަރިތަކުރުން ކަމަށް އެމްއެންޑީއެފުން ބުނެ އެވެ.
މި އެކްސަސައިޒް ފެށުމުގެ ގޮތުން އާދިއްތަ ދުވަހު ކަޅުތުއްކަލާކޮށީގައި ބޭއްވި ރަސްމިއްޔާތު ޝަރަފުވެރިކޮށްދެއްވީ ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ހިލްމީ އެވެ.
ނޮވެމްބަރު 22 އިން 23 އަށް ބާއްވާ މި އެކްސަސައިޒްގެ ތަމްރީނުތައް މާލެ، ހުޅުމާލެ، ވިލިމާލެ، ތިލަފުށި އަދި ކްރޮސް ރޯޑްސް މޯލްޑިވްސްގައި ކުރިއަށް ދާނެ އެވެ. އަދި އެމްއެންޑީއެފުން ބުނީ އެކްސަސައިޒް ކުރިއަށްދާ ވަގުތު މާލޭގެ މަގުތަކުގައާއި މާލޭ ސަރަހައްދުގައި ފަޔަރ ވެހިކަލްގެ ސައިރަން އެޅުމާ އެކު ހަރަކާތްތެރިވާނެ ކަމަށެވެ.
މި އެކްސަސައިޒަކީ އެމްއެންޑީއެފް ފަޔަރ އެންޑް ރެސްކިޔު ސަރވިސް އިން އަމަލުކުރަމުންދާ ފަޔަރ އިމަޖެންސީ އޮޕަރޭޝަނަލް ޕްލޭނަށް އަހުލުވެރިވުމުގެ ގޮތުން 2013 ވަނަ އަހަރުން ފެށިގެން ކޮންމެ އަހަރަކު ބާއްވަމުންގެންދާ އެކްސަސައިޒެކެވެ.











