ކީވާއި ކަޅު ކަނޑަށް ރަޝިއާގެ ވަރުގަދަ ހަމަލާތަކެއް، މުހިންމު ބުރިޖަކާއި މިސައިލް އުފައްދާ ކާރުޚާނާއަކަށް ގެއްލުންދީފި
8 ނޮވެމްބަރު 2026 | އާދީއްތަ 09:10ޔޫކްރެއިންގެ އަސްކަރީ ސާމާނު އުފުލާ ބުރިޖަކާއި މިސައިލް އުފައްދާ ކާރުޚާނާއަކަށް ރަޝިއާއިން ވަރުގަދަ ހަމަލާތަކެއް ދީފި. މީގެ އިތުރުން ކަރަންޓު އުފައްދާ މަރުކަޒުތަކަށާއި ކަޅު ކަނޑުން ދަތުރުކުރި އާގުބޯޓަކަށް ވެސް ހަމަލާދީފައިވާ ކަމަށް ރަޝިއާގެ ދިފާޢީ ވުޒާރާއިން ބުނެއޭ. ނަމަވެސް، މި ގެއްލުންތަކާ ގުޅޭގޮތުން ޔޫކްރެއިނުން އަދި ވަކި އެއްޗެއް ބުނެފައެއް ނުވޭ
ޔޫކްރެއިންގެ ރަށަކަށް ރަޝިއާއިން ދިން މިސައިލާއި ޑްރޯން ހަމަލާތަކެއްގައި އިމާރާތެއްގައި ރޯވި އަލިފާންގަނޑު ނިއްވައިލަން އަލިފާން ނިއްވާ ޓީމެއްގެ މެންބަރުން މަސައްކަތް ކުރަނީ | ރޮއިޓަރސް
ޔޫކްރެއިންގެ އަސްކަރީ އަދި ސިނާއީ ދާއިރާގެ މަރުކަޒުތަކަށާއި، ހަކަތައާއި ދަތުރުފަތުރާ ގުޅޭ އުމްރާނީ ވަސީލަތްތަކަށް އަމާޒުކޮށް، ވެރިރަށް ކީވާއި އެ ސަރަހައްދުގެ ވަށައިގެންވާ ރަށްތަކަށް ރޭގަނޑުގެ ވަގުތެއްގައި ވަރުގަދަ ހަމަލާތަކެއް ދީފައިވާ ކަމަށް ރަޝިއާއިން ބުނެފި އެވެ. މި ހަމަލާތަކަކީ އެ ޤައުމުގެ އަސްކަރީ ގާބިލިއްޔަތު ކަން ބަލިކަށިކޮށްލުމުގެ މަގުސަދުގައި ދިން ހަމަލާތަކެއް ކަމަށް ރަޝިއާގެ ދިފާޢީ ވުޒާރާއިން ބުންޏެވެ.
ވެރިރަށް ކީވްގައި ދިން ހަމަލާތަކުގައި އެ ސިޓީގެ މުހިންމު ބުރިޖެއް ކަމަށްވާ 'ނޯދަން ބްރިޖް' އަށް ހަމަލާ އަމާޒުވެފައިވާ ކަމަށް ރަޝިއާގެ ދިފާޢީ ވުޒާރާއިން ބުންޏެވެ. މި ބުރިޖަކީ ޔޫކްރެއިންގެ ހަތިޔާރު އެޅި ފައުޖުތަކަށް ބޭނުންވާ ހަތިޔާރާއި އަސްކަރީ ސާމާނުގެ އިތުރުން އަސްކަރީ އުޅަނދުފަހަރު އުފުލުމަށް ބޭނުންކުރަމުންދިޔަ މަގެއް ކަން އެ ވުޒާރާއިން ފާހަގަކުރި އެވެ. ހަމަމިއާއެކު، ޔޫކްރެއިނުން 'ފްލެމިންގޯ' މަރުކާގެ ކްރޫޒް މިސައިލް އުފައްދާ ކަމަށް ބުނާ 'މެރިޑިއަން' ކާރުޚާނާއަށް ވެސް މި ހަމަލާތަކުގައި ގެއްލުންދީފައިވާ ކަމަށް ރަޝިއާގެ ދިފާޢީ ވުޒާރާއާ ހަވާލާދީ މީޑިއާ ރިޕޯޓުތަކުން ބުންޏެވެ.
މި ހަމަލާތަކުގައި ކީވް ސަރަހައްދުގެ ހަކަތައާއި ސިނާއީ ގިނަ ވަސީލަތްތަކަކަށް ބޮޑެތި ގެއްލުންތަކެއް ލިބިފައިވާ ކަމަށް ރަޝިއާގެ ދިފާޢީ ވުޒާރާއިން ބުންޏެވެ. މި ގޮތުން ގެއްލުން ލިބުނު ތަންތަނުގެ ތެރޭގައި ކަރަންޓު އުފައްދާ މަރުކަޒަކާއި، ކަރަންޓު ސަބްސްޓޭޝަނެއްގެ އިތުރުން ހަތިޔާރާއި ވަޒަން އުފައްދާ ކާރުޚާނާއެއް ހިމެނޭ ކަމަށް ވެސް އެ ވުޒާރާއިން ބުންޏެވެ. ނަމަވެސް، ޔޫކްރެއިންގެ އެއްވެސް ރަސްމީ އިދާރާއަކުން މި ކަން ކަށަވަރު ކޮށްދީފައެއް ނުވެ އެވެ.
ކީވްގެ އިތުރުން، ޔޫކްރެއިން ޜިތޯމިރް ސަރަހައްދުގައި ހުރި ކަރަންޓު ސަބްސްޓޭޝަނަކަށް ވެސް ރަޝިއާގެ ފައުޖުތަކުން ހަމަލާތައް އަމާޒުކޮށްފައިވާ ކަމަށް ރިޕޯޓުތައް ބުނެ އެވެ. މިއާއެކު، ޔޫކްރެއިނަށް އަސްކަރީ ސާމާނާއި އަސްކަރީ އަދި މަދަނީ ބޭނުންތަކަށް އެއްފަހަރާ ބޭނުންކުރެވޭ މުދާ އުފުލަމުންދިޔަ ކަމަށް ބުނާ ކާގޯ އުޅަނދަކަށް ކަޅު ކަނޑުގެ ތެރެއިން ހަމަލާދީފައިވާ ކަމަށް ވެސް ރަޝިއާއާ ހަވާލާދީ މީޑިއާ ރިޕޯޓުތަކުން ބުންޏެވެ.
މަސްދަރު: ރޮއިޓަރސް
