ޅައިމަގަށް ނަގޫރޯޅިއެއް އަރައި ބޮޑެތި ގެއްލުންތަކެއް، މީހެއްގެ ބޯ ފަޅައިގެން ދިޔަ!
7 ނޮވެމްބަރު 2026 | ހޮނިހިރު 07:24ހޮނިހިރު ދުވަހުގެ ހެނދުނު ޅައިމަގަށް އެރި ނަގޫރޯޅީގައި ހަތަރު ގެއެއްގެ ފުރާޅު އެއްލާލައި، ގިނަ އަދަދެއްގެ ގަސްތަކާއި ފާރުތައް ވެއްޓި ބޮޑެތި ގެއްލުންތަކެއް ވަނީ ލިބިފައި. މި ހާދިސާގައި ވިއްސައިގެން ދިޔަ ޓިނުގަނޑަކުން ޖެހި މީހަކަށް އަނިޔާވެފައިވާއިރު، އެންޑީއެމްއޭ އާއި ކައުންސިލް ގުޅިގެން މިހާރު ދަނީ ލިބުނު ގެއްލުންތައް ވަޒަންކުރުމުގެ މަސައްކަތް ކުރަމުން
ޅައިމަގަށް ނަގޫރޯޅިއެއް އަރައި އެރަށަށް ބޮޑެތި ގެއްލުންތަކެއް ވަނީ ލިބިފައި | ސޯޝަލް މީޑިއާ
ށ. ޅައިމަގަށް ނަގޫރޯޅިއެއް އަރައި އެރަށުގެ ގެތަކަށް ބޮޑެތި ގެއްލުންތަކެއް ލިބި، މީހަކަށް އަނިޔާވެއްޖެ އެވެ.
އެ ރަށަށް ނަގޫރޯޅިއަރާފައިވަނީ ހޮނިހިރު ދުވަހުގެ ހެނދުނު 7:30 ހާއިރު އެވެ. އަދި ނަގޫރޯޅި އެރީ ރަށުގެ އުތުރު ފަރާތުން ކަމަށާއި ފައިބައިގެން ދިޔައީ ދެކުނު ފަރާތުން ކަމަށް މައުލޫމާތު ލިބެ އެވެ.
މި ހާދިސާއާއި ގުޅިގެން ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނީ، ޅައިމަގަށް ނަގޫރޯޅިއެއް އަރައި 4 ވަރަކަށް ގޭގެ ފުރާޅަށާއި ބައެއް ގުދަންތަކަށް ބޮޑެތި ގެއްލުންތަކެއް ވެފައިވާ ކަމަށެވެ.
ޅައިމަގަށް ނަގޫރޯޅިއެއް އަރައި ގެއެއްގެ ބޭރު ފާރުވެއްޓިފައި | ސޯޝަލް މީޑިއާ
މި ހާދިސާގައި ވިއްސައިގެން ދިޔަ ޓިނުގަނޑަކުން ޖެހި މީހެއްގެ ބޯ ފަޅައިގެން ގޮސް ސިއްހީ މަރުކަޒުގައި ފަރުވާދީފައިވާ ކަމަށް އެންޑީއެމްއޭއިން ބުނެ އެވެ. އަދި ނަގޫރޯޅީގެ ސަބަބުން ބޮޑެތި ގެއްލުންތަކެއް ލިބިފައިވާއިރު، ކައުންސިލްއާ ގުޅިގެން ލިބުނު ގެއްލުންތައް ދެނެގަތުމުގެ މަސައްކަތް ކުރަމުންދާ ކަމަށް އެ އޮތޯރިޓީން ބުނެ އެވެ.
ޅައިމަގަށް އެރި ނަގޫރޯޅިއާއެކު އަރައި ޓިނުގަނޑެއް ވިއްސައިގެން ގޮސްފައި
ޅައިމަގަށް ނަގޫރޯޅިއެއް އަރައި އެރަށަށް ބޮޑެތި ގެއްލުންތަކެއް ވަނީ ލިބިފައި
ސޯޝަލް މީޑިއާގައި އާއްމުވެފައިވާ ފޮޓޯތަކުން ފެންނަ ގޮތުގައި ޅައިމަގަށް އެރި ނަގޫރޯޅިއާއެކު އެރަށުގެ ބޮޑެތި ގަސްތައް ވަނީ ބިމާ ހަމަވެފަ އެވެ. ބޮޑެތި ބަބުކެޔޮ ގަސްތަކާއި، ރުށްތައް ވެއްޓިފައިވާއިރު، ބައެއް ގެތަކުގެ ފާރުތައް ވެއްޓިފައިވާއިރު، ބައެއް ގެތަކުގެ ފުރާޅުތައް ވަރަށް ދުރަށް އެއްލާލާފައިވެ އެވެ.
ޅައިމަގަށް ނަގޫރޯޅިއެއް އަރައި ބޮޑެތި ގަސްތައް ވެއްޓިފައި
ޅައިމަގަށް އެރި ނަގޫރޯޅިއާއެކު ސްކޫލުގެ ގޯތިތެރޭގައި ހުރި ގަހެއް ވެއްޓިފައި
ރާއްޖޭގެ ސަރަހައްދުގައި ހުޅަނގު މޫސުމުގެ ބާރު ގަދަވެފައިވާއިރު، ހުކުރު ދުވަހު ގއ. ކޮލަމާފުއްޓަށް ބޯކޮށް ވާރޭވެހި ގެތަކަށާއި މުއައްސަސާތަކަށް ފެންވަދެ، ކަރަންޓު ކެނޑި ބޮޑެތި ގެއްލުންތަކެއް ލިބިފައިވެ އެވެ.
