އެސްޓީއޯގެ ފައިދާ 23 އިންސައްތަ އިތުރުވެ 400 މިލިއަނަށް!

ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން 2026 ވަނަ އަހަރުގެ ތިންވަނަ ކުއާޓަރުގެ މާލީ ރިޕޯޓު އާންމުކޮށްފި އެވެ.

މި ރިޕޯޓުގައިވާ ގޮތުން ޖުލައި މަހުން ފެށިގެން ސެޕްޓެމްބަރު މަހުގެ ނިޔަލަށް އެ ކުންފުންޏަށް އާމްދަނީގެ ގޮތުގައި 6.48 ބިލިއަން ރުފިޔާ ލިބިފައިވެ އެވެ. މިއީ އޭގެ ކުރީ ކުއާޓަރާ އަޅާބަލާއިރު 7 އިންސައްތައިގެ ދަށްވުމެއް ނަމަވެސް، ދުނިޔޭގެ ބާޒާރުގައި ތެލުގެ އަގަށް އައި ބަދަލުތަކާއެކު ވެސް ކުންފުނީގެ ފައިދާ ވަނީ އިތުރުވެފަ އެވެ. އެގޮތުން ތިންވަނަ ކުއާޓަރުގެ ހިންގުމުގެ ފައިދާ ވަނީ 23 އިންސައްތަ އިތުރުވެ 400 މިލިއަން ރުފިޔާއަށް އަރާފަ އެވެ.

ކުންފުނީގެ މާލީ ހާލަތަށް ބަލާއިރު، ޓެކްސްއަށް ކަނޑުމަށްފަހު ސާފު ފައިދާގެ ގޮތުގައި 281 މިލިއަން ރުފިޔާ ވަނީ ލިބިފަ އެވެ. މިއީ 2025 ވަނަ އަހަރުގެ މި މުއްދަތުގައި ލިބުނު 186 މިލިއަން ރުފިޔާއާ އަޅާބަލާއިރު ބޮޑު ކުރިއެރުމެކެވެ. ހިއްސާއަކަށް ޖެހުނު ފައިދާ 249 ރުފިޔާގައި ހުރިއިރު، ކުންފުނީގެ ރިޒާވް ވަނީ 6.28 ބިލިއަން ރުފިޔާއަށް އިތުރުވެފަ އެވެ. މީގެ އިތުރުން އެސްޓީއޯގެ ހިއްސާގެ އަގު ވެސް ވަނީ މި ކުއާޓަރުގައި 12.7 އިންސައްތަ މައްޗަށް ގޮސްފަ އެވެ. ކުއާޓަރު ނިމުނުއިރު ހިއްސާއެއްގެ ބާޒާރު އަގަކީ 2,400 ރުފިޔާ އެވެ.

މި މުއްދަތުގެ ތެރޭގައި އެސްޓީއޯގެ ބޯޑުން ވަނީ ކުންފުނީގެ ކުރިމަގަށް މުހިންމު ނިންމުންތަކެއް ނިންމާފަ އެވެ. އޭގެ ތެރޭގައި ރިސޯޓުތަކަށް ބޭނުންވާ ތެޔޮ ރައްކާކުރާނެ އިންފްރާސްޓްރަކްޗަރ ގާއިމުކުރުމާއި، ކޮންސްޓްރަކްޝަން ސޮލިއުޝަންސްގެ ދަށުން ރިއަލް އެސްޓޭޓް މަސައްކަތްތަކަށް ޚާއްސަ ޔުނިޓެއް އުފެއްދުން ހިމެނެ އެވެ. އަދި ހަވީރީ މަގުގައި ނިޕޯން ޕެއިންޓްގެ ޚާއްސަ ޝޯރޫމެއް ހުޅުވުމަށާއި، ރެޑީމިކްސް ކޮންކްރީޓްގެ ޚިދުމަތް ފުޅާކުރުމަށް ޕަވަރމިކްސްގެ ވަސީލަތްތައް ތަރައްގީކުރުމަށް ވެސް ވަނީ ފާސްކޮށްފަ އެވެ.

ކުންފުނީގެ އިންސާނީ ވަސީލަތްތަކަށް ބަލާއިރު، ތިންވަނަ ކުއާޓަރު ނިމުނުއިރު މުވައްޒަފުންގެ ޖުމްލަ އަދަދަކީ 1,895 އެވެ. މީގެ ތެރެއިން 70 އިންސައްތައަކީ ދިވެހިންނެވެ. މުވައްޒަފުން ތަމްރީނުކުރުމަށް މި ކުއާޓަރުގައި އެކަނިވެސް 2.7 މިލިއަނަށްވުރެ ގިނަ ރުފިޔާ ހޭދަކޮށްފައިވެ އެވެ. އަދި ކުންފުނީގެ އިޖުތިމާއީ ޒިންމާގެ ދަށުން ކްލަބް މޯލްޑިވްސް ކަޕަށް ވީއޭއާރް ސިސްޓަމް ތައާރަފުކުރުމަށް 215,000 ރުފިޔާގެ އެހީތެރިކަން ފޯރުކޮށްދިނުމާއި، ތަފާތު ރަށްރަށުގެ ތައުލީމީ އަދި އިޖުތިމާއީ ކަންކަމަށް އެހީތެރިކަން ދީފައިވާކަން ރިޕޯޓުގައި ފާހަގަކޮށްފައިވެ އެވެ.

މަޝްރޫއުތަކުގެ ތެރެއިން ހުޅުމާލޭގައި ތަރައްގީކުރާ މަލްޓި-ޕާޕަސް ވެއަރހައުސްގެ ފުރަތަމަ ތިން ފަންގިފިލާގެ ކޮންކްރީޓް މަސައްކަތް ނިމިފައިވާއިރު، ފުނަދޫ ޓާމިނަލްގެ ފަޔަރ ސޭފްޓީ މަޝްރޫއު ވަނީ ޓެސްޓްކުރުމުގެ މަރުހަލާގަ އެވެ. އަދި ރަށްރަށުގައި ގާއިމުކުރާ މޮޑިއުލަރ ފިއުލް ސްޓޭޝަންތަކުގެ ފުރަތަމަ ފިޔަވަހީގެ 86 އިންސައްތަ މަސައްކަތް ވަނީ ނިމިފަ އެވެ. މީގެ އިތުރުން އިއާދަކުރަނިވި ހަކަތައަށް އަމާޒުކޮށްގެން ސޯލާ އިންސްޓަލޭޝަން މަޝްރޫއެއް ވެސް އެސްޓީއޯއިން ވަނީ ފަށާފަ އެވެ.

އެސްޓީއޯގެ މިހާރުގެ މިލްކުވެރިކަމަށް ބަލާއިރު، ދިވެހި ސަރުކާރުގެ 81.63 އިންސައްތަ ހިއްސާ އޮންނައިރު، އާންމު ރައްޔިތުންގެ ހިއްސާއަކީ 18.37 އިންސައްތަ އެވެ. ކުންފުނީގެ މެނޭޖިންގ ޑިރެކްޓަރުގެ މަގާމުގައި ޝިމާދު އިބްރާހީމް ހުންނެވިއިރު، ބޯޑު ޗެއާމަނަކީ އާމިރު މަންސޫރު އެވެ. މި ކުއާޓަރުގެ ތެރޭގައި ބޯޑު މެންބަރު ދާނިޝް މުހައްމަދު އަމީން ވަނީ މަގާމުން އިސްތިއުފާ ދެއްވާފަ އެވެ.