ޒަމާނީ ފެންވަރަށް ތަރައްގީކުރަން ކަމަށް ބުނެ، ހާބަރު ފުޑް ކޯޓުތައް ހުސްކުރަން އަންގައިފި
19 ސެޕްޓެމްބަރު 2026 | ހޮނިހިރު 09:56މާލޭގެ ހުޅަނގު ދެކުނު ފަރާތުގައި ހިންގާ ހާބަރު ފުޑްކޯޓުތައް ހުރި ބިމުގައި ތަރައްޤީގެ އައު މަޝްރޫޢެއް ހިންގުމަށްޓަކައި، 90 ދުވަހުގެ ތެރޭގައި އެ ތަންތަން ހުސްކުރުމަށް އެސްޓީއޯއިން ވަނީ އަންގާފަ. 2018 ވަނަ އަހަރު 32 މިލިއަން ރުފިޔާ ޚަރަދުކޮށްގެން ހުޅުވި މި 26 ފުޑްކޯޓު ހުސްކުރަން އެންގީ އެއްބަސްވުމާ އެއްގޮތްވާ ގޮތުގެ މަތިން. މި ބަދަލަކީ މާލޭގެ ވެށި އިތުރަށް ފުރިހަމަކޮށް، ރައްޔިތުންނަށް ޒަމާނީ ފެންވަރުގެ އައު ޚިދުމަތްތަކެއް ފޯރުކޮށްދިނުމަށް އެޅި ފިޔަވަޅެއް.
މާލޭގައި ހުންނަ ހާބަރު ފުޑް ކޯޓުތައް | ރާއްޖެއެމްވީ
މާލޭގެ ހުޅަނގު ދެކުނު ފަރާތުގައި ހިންގަމުން އަންނަ ހާބަރު ފުޑްކޯޓުތައް ހުރި ބިން، ތަރައްޤީގެ އައު މަޝްރޫއަކަށް ބޭނުންވާތީ، 90 ދުވަހުގެ ތެރޭގައި އެ ސަރަހައްދު ހުސްކުރުމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން އަންގައިފި އެވެ.
އެސްޓީއޯ އިން ފުޑްކޯޓުތައް ހިންގާ ފަރާތްތަކަށް ފޮނުވި ރަސްމީ ލިޔުމުގައި ބަޔާންކޮށްފައި ވަނީ، 15 އޮކްޓޫބަރު 2022 ގައި ވެފައިވާ ކުއްޔަށް ދިނުމުގެ އެއްބަސްވުމުގެ 14 ވަނަ މާއްދާގެ (ހ) ގެ ދަށުން، ނޯޓިސް ލިބޭތާ ތިން މަސްދުވަހުގެ ތެރޭގައި އެ ތަންތަން ހުސްކުރަންޖެހޭނެ ކަމަށެވެ. އަދި މި މުއްދަތުގެ ތެރޭގައި އެ ތަންތަން އެސްޓީއޯއާ ހަވާލުކުރުމުން އެއްބަސްވުން ބާތިލުވާނެ ކަމަށް ވެސް އެ ލިޔުމުގައި ބުނެފައިވެ އެވެ.
މީގެއިތުރުން، ވިޔަފާރިތަކުން ނުދައްކާ ހުރި ކުއްޔާއި މަރާމާތުގެ ފީއެއް ވާނަމަ، އެ ފައިސާ ދައްކާ ހަލާސްކުރާނެ ގޮތުގެ ތަފުސީލުތައް ނޯޓިސްގެ މުއްދަތު ހަމަވުމުގެ ކުރިން ފޯރުކޮށްދޭނެ ކަމަށް ވެސް އެސްޓީއޯ އިން މައުލޫމާތުދެ އެވެ.
ދައުލަތުގެ މައި ވިޔަފާރި ކުންފުނި ކަމަށްވާ އެސްޓީއޯ އިން 32 މިލިއަން ރުފިޔާ އިންވެސްޓްކޮށްގެން ހެދި މި ފުޑްކޯޓުތަކަކީ 26 ޔުނިޓެއް ހިމެނޭހެން، އެކި ބޮޑުމިނުގެ ޖާގަތަކާ އެކު ތަރައްޤީކޮށްފައިވާ ތަނެކެވެ. މާލޭގެ ދެކުނު ހާބަރު ސަރަހައްދު ކުރިން އޮތް ގޮތް ބަދަލުކޮށް، ޒަމާނީ ފެންވަރަށް އެ ސަރަހައްދުތައް ތަރައްޤީކުރުމުގެ މަސައްކަތް އެސްޓީއޯއާ ސަރުކާރުން ހަވާލުކުރީ 13 ޖަނަވަރީ 2016 ގަ އެވެ.
މި މަސައްކަތް އެއްކޮށް ނިންމައި، އެ ސަރަހައްދުގައި ޚިދުމަތް ދޭން ފަށާފައިވަނީ 2018 ވަނަ އަހަރުގެ މޭ މަހުގެ ތެރޭގަ އެވެ. އަދި އެތަން ރަސްމީކޮށް ހުޅުވާފައިވަނީ ހަމަ އެ އަހަރުގެ ޖުލައި މަހުގެ 23 ވަނަ ދުވަހު އެވެ.
އައު ތަރައްޤީގެ މަޝްރޫޢަކަށްޓަކައި މި ސަރަހައްދު ހުސްކުރަން އަންގާފައިވާއިރު، މިއީ މާލޭގެ ވެށި އިތުރަށް ފުރިހަމަކޮށް، ރައްޔިތުންނަށް ޒަމާނީ ޚިދުމަތްތަކެއް ފޯރުކޮށްދިނުމުގެ މަޤްސަދުގައި ކުރިއަށްގެންދާ މަސައްކަތެކެވެ.
