އެސްޓީއޯ ހިންގުމުގެ ފައިދާ ފުރަތަމަ ކުއާޓަރާ އަޅާބަލާއިރު 12 އިންސައްތަ ދަށަށް ހިނގައްޖެ

ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ އެސްޓީއޯ ހިންގުމުގެ ފައިދާ ފުރަތަމަ ކުއާޓަރާ އަޅާބަލާއިރު 12 އިންސައްތަ ދަށަށް ހިނގައްޖެ އެވެ.

2026 ވަނަ އަހަރުގެ ދެވަނަ ކުއާޓަރުގައި އާމްދަނީގެ ގޮތުގައި 6.98 ބިލިއަން ރުފިޔާ ލިބިފައިވާއިރު މިއީ އޭގެ ކުރީ ކުއާޓަރާ އަޅާބަލާއިރު 27 އިންސައްތައިގެ ކުރިއެރުމެކެވެ. އާމްދަނީ އިތުރުވުމުގެ މައިގަނޑު ސަބަބަކީ ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން ތެލުގެ ވިޔަފާރިން ލިބުނު އާމްދަނީ އިތުރުވުމާއި، ތެޔޮ ނޫން އެހެނިހެން ދާއިރާތަކުން ކުންފުންޏަށް ލިބުނު ކުރިއެރުމެވެ. ކުންފުނީގެ ޖުމްލަ އާމްދަނީގެ 86 އިންސައްތައަކީ ތެލުގެ ވިޔަފާރިން ލިބުނު އާމްދަނީ ކަމަށްވާއިރު، ބާކީ 14 އިންސައްތައަކީ އެހެނިހެން ވިޔަފާރިތަކުން ލިބުނު އާމްދަނީ އެވެ.

އެސްޓީއޯއިން އާންމުކޮށްފައިވާ އެ ކުންފުނީގެ މާލީ ރިޕޯޓުން ދައްކާގޮތުން މި ކުއާޓަރުގައި އެސްޓީއޯގެ ސާފު ފައިދާގެ ގޮތުގައި 280 މިލިއަން ރުފިޔާ ވަނީ ރިކޯޑު ކުރެވިފަ އެވެ. މިއީ 2026 ވަނަ އަހަރުގެ ފުރަތަމަ ކުއާޓަރުގައި ލިބުނު 276 މިލިއަން ރުފިޔާއާ އަޅާބަލާއިރު އެއް އިންސައްތައިގެ ކުރިއެރުމެކެވެ. ނަމަވެސް، ތެޔޮ ގަތުމަށް ހިނގި ޚަރަދު ބޮޑުވުމުގެ ސަބަބުން ހިންގުމުގެ ފައިދާ ނުވަތަ އޮޕަރޭޓިންގ ޕްރޮފިޓް ވަނީ ކުރީ ކުއާޓަރާ އަޅާބަލާއިރު 12 އިންސައްތަ ދަށަށް ގޮސްފައެވެ. އެގޮތުން ފުރަތަމަ ކުއާޓަރުގައި ހިންގުމުގެ ފައިދާގެ ގޮތުގައި 368 މިލިއަން ރުފިޔާ ލިބުނު ނަމަވެސް، ދެވަނަ ކުއާޓަރުގައި މި އަދަދު ހުރީ 324 މިލިއަން ރުފިޔާގަ އެވެ. ކުންފުނީގެ ހިއްސާއަކަށް ޖެހުނު ފައިދާ ނުވަތަ އާނިންގްސް ޕަރ ޝެއަރ ވެސް ވަނީ 245 ރުފިޔާއިން 248 ރުފިޔާއަށް އުފުލިފަ އެވެ.

ކުންފުނީގެ ހިއްސާގެ ބާޒާރަށް ބަލާއިރު، 2026 ވަނަ އަހަރުގެ ދެވަނަ ކުއާޓަރުގައި އެސްޓީއޯގެ ހިއްސާގެ އަގު ވަނީ ފާއިތުވި ފަސް ކުއާޓަރުގެ ތެރޭގައި އެންމެ މަތީ މިންވަރަށް އުފުލިފަ އެވެ. އެގޮތުން ހިއްސާއެއްގެ އެންމެ މަތީ އަގު 2,749 ރުފިޔާއަށް އެރިއިރު، އެންމެ ދަށް އަގަކީ 1,850 ރުފިޔާ އެވެ. ކުއާޓަރު ނިމުނުއިރު ހިއްސާގެ ބާޒާރުގެ އަގު ހުރީ 2,130 ރުފިޔާގަ އެވެ. މިއީ ކުރީ ކުއާޓަރާ އަޅާބަލާއިރު 6.5 އިންސައްތައިގެ ކުރިއެރުމެކެވެ. ހިއްސާގެ އަގު އުފުލުމާއެކު ކުންފުނީގެ މާކެޓް ކެޕިޓަލައިޒޭޝަން ވަނީ 2.40 ބިލިއަން ރުފިޔާއަށް އަރާފައެވެ. މި ކުއާޓަރުގައި ޖުމްލަ 76 މުއާމަލާތެއްގެ ދަށުން 1,028 ހިއްސާ ވަނީ ބަދަލުކޮށްފަ އެވެ.

ކުންފުނީގެ ޖުމްލަ މިލްކިއްޔާތު ނުވަތަ ނެޓް ވޯތު ވަނީ 6.08 ބިލިއަން ރުފިޔާއަށް އިތުރުވެފަ އެވެ. ކުންފުނީގެ ރިޒާވްގައި 6 ބިލިއަން ރުފިޔާ ހުރިއިރު، ހިއްސާއަކަށް ޖެހޭ މުދަލުގެ އަގު ނުވަތަ ނެޓް އެސެޓް ޕަރ ޝެއަރ ހުރީ 5,399 ރުފިޔާގަ އެވެ. މީގެ އިތުރުން، ކުންފުނީގެ މުދަލާއި ވަސީލަތްތައް އިތުރުކުރުމަށް ކުރެވުނު އިންވެސްޓްމަންޓްތަކާއެކު، ޕްރޮޕަޓީ، ޕްލާންޓް އެންޑް އިކުއިޕްމަންޓްގެ އަގު ވަނީ 2.93 ބިލިއަން ރުފިޔާއަށް އުފުލިފަ އެވެ. މިއީ މައިގަނޑު ގޮތެއްގައި ކުންފުނީގެ އޮޕަރޭޝަންތަކަށް ބޭނުންވާ އުޅަނދުފަހަރާއި މެޝިނަރީ ގަތުމަށް ކުރެވުނު ޚަރަދުތަކެވެ.

ކުންފުނީގެ ކޭޝްފްލޯއަށް ބަލާއިރު، ހިންގުމުގެ ދާއިރާއިން 382 މިލިއަން ރުފިޔާގެ ފައިސާ ކުންފުންޏަށް ވަދެފައިވެ އެވެ. އިންވެސްޓްމަންޓްތަކަށް 267 މިލިއަން ރުފިޔާ ޚަރަދުކޮށްފައިވާއިރު، ލޯނުތަކާއި މާލީ އެހެނިހެން ކަންކަމުން 196 މިލިއަން ރުފިޔާ ވަނީ ލިބިފަ އެވެ. ކުއާޓަރު ނިމުނުއިރު ކުންފުނީގެ އަތުގައި ނަގުދު ފައިސާގެ ގޮތުގައި 862 މިލިއަން ރުފިޔާ ހުއްޓެވެ. މިއީ ކުރީ ކުއާޓަރުގެ ނިޔަލަށް ހުރި 551 މިލިއަން ރުފިޔާއާ އަޅާބަލާއިރު ކުރިއެރުމެކެވެ.

އެސްޓީއޯގެ މިހާރުގެ ހިއްސާގެ އޮނިގަނޑަށް ބަލާއިރު، ދިވެހި ސަރުކާރުގެ 82 އިންސައްތަ ހިއްސާ އޮންނައިރު، ބާކީ 18 އިންސައްތަ ހިއްސާއަކީ އާންމު ރައްޔިތުންގެ ހިއްސާ އެވެ.