މިޔަންމާގައި ހިނގަމުންދާ ހަމަނުޖެހުންތަކުން ސަލާމަތްވުމަށް ބޯޓެއްގައި ދަތުރު ކުރަމުންދިޔަ ރޮހިންޖާ މުސްލިމުން ތިބި ބޯޓެއް ބަންގްލަދޭޝް ކައިރިން ބަންޑުން ޖަހާލައި މަދުވެގެން 12 މީހުން މަރުވެއްޖެ ކަމަށް އޮފިޝަލުން ބުނެފިއެވެ.

އަދީއްތަ ދުވަހުގެ ފަހުގެ ވަގުތެއްގައި ހިނގި މިހާދިސާގައި ނަފް ކޯރުގެ ތެރެއަށް އެތައް ބަޔަކުވަނީ ގެއްލިފައެވެ. ބެލެވިފައިވާ ގޮތުގައި ކުޑަކުދިންނާއެކު ބޯޓުގައި 100 މީހުން ތިބޭނެއެވެ.

މީހުން ހޯދުމުގެ މަސައްކަތް މިހާރު ދަނީ ކުރަމުންނެވެ.

މިޔަންމާގެ ރަޚައިން ސްޓޭޓްގައި އަސްކަރިއްޔާ އިން ހިންގަމުންދާ އޮޕަރޭޝަނާއެކު ހިންގަމުންދާ އަނިޔާވެރި އަމަލުތަކުން ސަލާމަތް ވުމަށް ބަންގްލަދޭޝްއަށް އެރުމަށް މަސައްކަތް ކުރި މިޔަންމާގެ އެތައް ބަޔަކު ވަނީ މަރުވެފައެވެ.

އާދީއްތަ ދުވަހު ބަންޑުން ޖަހާލި ބޯޓުން ދަތުރުކުރި މީހުންގެ ސީދާ އަދަދުވަނީ ސާފުވާގޮތް ނުވެފައެވެ. ބަންގްލަދޭޝްގެ ސަރަހައްދީ ރޮނގު ބަލަހައްޓާ ގާޑުން ވެސް ދެމުން ގެންދަނީ އަންދާސީ އަދަަދު ތަކެކެވެ. ގާޑުން ބުނަމުން ދަނީ 40 އާ 100 އާ ދެމެދުގެ އަދަދަކަށް މީހުން ތިބޭނެ ކަމަށެވެ.

އޮފިޝަލުން ބުނެފައިވަނީ މިހާތަނަށް ފެނިފައިވަނީ 10 ކުއްޖަކާ އަންހެނަކާއި ފިރެހެނެއްގެ ހަށިގަނޑު އެކަނި ކަމަށެވެ.

މިއީ މިޔަންމާއިން ބަންގްލަދޭޝްއަށް ހިޖުރަ ކުރުމަށް މަސައްކަތް ކުރާ ރޮހިންޖާ ރެފިއުޖީންނަށް ސިލްސިލާކޮށް ދިމާވަމުންދާ ހާދިސާތަކުގެ ތެރެއިން އެންމެ ފަހުން ހިނގި ހާދިސާއެވެ. ސެޕްޓެމްބަރު މަހުގެ ފަހު ކޮޅު ހިނގި މިބާވަތުގެ ހާދިސާއެއްގައި 60 މީހުން މަރުވި ކަމަށްވަނީ ބެެލެވިފައެވެ.

އެތައް ބަޔަކު އެއްގަމު މަގުން ސަރަހައްދީ ރޮނގު ހުރަސްކޮށް ބަންގްލަދޭޝްއަށް ވަންނައިރު އަނެއްބަޔަކު ދަނީ ކުދިކުދި މަސްބޯޓް ތަކުގައި ކަނޑު ހުރަސްކޮށް އެ ގައުމަށް ވަނުމަށް މަސައްކަތް ކުރަމުންނެވެ.