ރަށްރަށުގެ ތަރައްގީއަށް ކޮންމެ އަހަރަކު ފައިސާ ބަޖެޓް ކުރި ނަމަވެސް މި ފައިސާ ހުންނަނީ ކޮންމެ އަހަރެއް ނިމޭއިރު ކޮންމެވެސް ވިޔާނުދާ ކަމަކަށް ހަރަދުކޮށްފައި: މެންބަރު ޝަމްހީދު
11 އޮކްޓޯބަރު 2026 | އާދީއްތަ 12:37ރާއްޖޭގެ އެތެރޭގެ އިގުތިސާދު ހިންގުމުގެ އެއްވެސް ސިޔާސަތެއް މި ސަރުކާރުގައި ނެތް ކަމަށް ވިދާޅުވެ، ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ފާޑުވިދާޅުވެއްޖެ. މީގެ އިތުރުން، ތަރައްގީގެ މަޝްރޫއުތަކަށް ބަޖެޓުކުރާ ފައިސާ ބޭރުގެ ކުންފުނިތަކަށް ހޭދަކުރާތީ، ރާއްޖޭގެ އިގުތިސާދުގައި ފައިސާ އެނބުރޭނެ ގޮތެއް ނެތްކަން އޭނާ ފާހަގަކުރެއްވި
ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު | ރާއްޖެ އެމްވީ
ރަށްރަށުގެ ތަރައްގީއަށް ކޮންމެ އަހަރަކު ފައިސާ ބަޖެޓް ކުރި ނަމަވެސް މި ފައިސާ ހުންނަނީ ކޮންމެ އަހަރެއް ނިމޭއިރު ކޮންމެވެސް ވިޔާނުދާ ކަމަކަށް ހަރަދުކޮށްފައި ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި ވާހަކަދައްކަވަމުން މެންބަރު ޝަމްހީދު ވިދާޅުވީ، ރައީސް ޑރ. މުހައްމަދު މުއިއްޒުގެ ސަރުކާރުގައި ދިވެހިރާއްޖޭގެ އެތެރޭގެ އިގުތިސާދު ހިންގުމުގެ އެއްވެސް ސިޔާސަތެއް ނެތް ކަމަށެވެ. އަދި ފައިސާ ހަރަދުކުރުމުގައި ހުރިހާ ކަމެއް ވެސް ގުޅިފައި ވަނީ ބޭރުގެ ކުންފުންޏަކަށް ކަމަށް ނަމަވެސް އެއީ ކިހިނެއް ވެގެން ކަމެއް ނޭނގޭ ކަމަށް މެންބަރު ޝަމްހީދު ވިދާޅުވި އެވެ.
ނިމިދިޔަ 2 އަހަރުގެ ބަޖެޓް ބަލާލުމުން ވެސް ފެންނަނީ އަހަރު ނިމޭއިރު ކޮންމެވެސް ވިޔާނުދާ ކަމަކަށް ހަރަދުކޮށްފައިވާ މަންޒަރު ކަމަށް މެންބަރު ޝަމްހީދު ވިދާޅުވި އެވެ.
މިދިޔަ 2 ބެޖްޓު އަޅުގަނޑުމެން ބަލާލާއިރު، އަޅުގަނޑުމެންނަށް މިފެނުނީ ރައްޔިތުންގެ ތަރައްގީއަށް ކޮންމެ އަހަރަކު ފައިސާ މި ޖައްސަވަނީ އެންގޭތޯ އަހަރު ނިމޭއިރު މި ފައިސާތައް މިހުންނަނީ ކޮންމެވެސް މިކަހަލަ ވިޔާނުދާ ކަމަކަށް ނޭނގުމުގައި ހަރަދުކޮށް ނިންމާފައި. މިއަހަރު ވެސް ބަޖެޓްގައި ޖެއްސެވި 8 ބިލިއަނެއް ކަންނޭނގެ ރާއްޖޭގެ ރަށްރަށުގެ ތަރައްގީއަށް، މިދިޔަ އަހަރު 12 ބިލިއަން. އެ 12 ބިލިއަން ތެރެއިން ވެސް ހައުސިންގ އަޅަން 3 ބިލިއަންނާއި މިހުރިހާ އެއްޗެއް ވެސް ހަރަދު ކުރީ ކޮންމެވެސް ތަނަކުން ސޮފްޓްވެޔަރ އެއް ގަންނަން އަނެއް ތަނަކުން ގައު އަޅާ ކުންފުންޏެއް ހަދައިގެން ހަމަ ބޭރުން ކޮންމެވެސް މުދަލެއް ގެންނަންޑރ. އަހުމަދު ޝަމްހީދު
ޝަމްހީދު ވިދާޅުވީ މިއަހަރު ވެސް ޕީއެސްއައިޕީއަށް ކަނޑައެޅި ބަޖެޓުގެ 4 ބިލިއަން ރުފިޔާ އަދި ހޭދަނުކުރާ ކަމަށެވެ. އަދި މި ގައުމު މިގޮތަށް ހިންގާހާ ހިނދަކު ދިވެހިރާއްޖޭގެ އެތެރޭގެ އިގުތިސާދު ވެސް އަދި ޑޮލަރުގެ މައްސަލަ ވެސް ހައްލު ނުވާނެ ކަމަށް މެންބަރު ޝަމްހީދު ވިދާޅުވި އެވެ.
މީގެ އިތުރުން، ދިވެހިރާއްޖޭގައި ފަހަގެ ތާރީހުގައި ބަޖެޓް ކުރަނީ ރާއްޖެއަށް ލިބޭ އާމްދަނީ އަދި ރިކަރަންޓް ހަރަދު ގާތްގަނޑަކަށް އެއް އަދަދަކަށް ކަމަށާއި އެހެންވީމަ ފަހުގެ ތާރީހުގައި ލޯނު ދައްކަނީ ލޯނު ނަގައިގެން ކަމަށް މެންބަރު ޝަމްހީދު ވިދާޅުވި އެވެ. އެހެންކަމުން ރާއްޖެ ހިންގަނީ ޑެފެސިޓް ބަޖެޓެއްގައިކަން މެންބަރު ޝަމްހީދު ފާހަގަކުރެއްވި އެވެ. އަދި މި މައްސަލަ މިއަދު މާބޮޑަށް ބޮޑުވެފައި މިވަނީ މިސަރުކާރުގެ ސިޔާސަތުތަކާއެކު ކަމަށް މެންބަރު ޝަމްހީދު ވިދާޅުވި އެވެ.
އަޅުގަނޑުމެންނަށް ވަރަށް ސާފުކޮށް ފެންނަން އެބަހުރި ސަރުކާރުގެ ސިޔާސަތުތަކުގެ ތެރެއިން އަޅުގަނޑުމެންނަށް މުސްތަގުބަލުގައި ލިބެން ހުރި ފައިސާ ވެސް އަޅުގަނޑުމެންނަށް ޑިސްކައުންޓް ރޭޓެއްގައި އަޅުގަނޑުމެން ހޯދާފައި އެހުރީ އޭގެ ތެރޭގައި ރިސޯޓުތައް 99 އަހަރަށް އެކްސްޓެންޝަންގައި ލިބެން ޖެހޭ 5 މިލިއަން ޑޮލަރު އަޅުގަނޑުމެން މިއަދު ޑޮލަރެއް ބޭނުންވީމަ މިހަދާ ގޮތަކީ ޑިސްކައުންޓް އަޅުވާލަނީޑރ. އަހުމަދު ޝަމްހީދު
މިއަދު ފެނިގެން ދަނީ ދައުލަތަށް ނަފާއެއް ނުލިބޭ އިންވެސްޓްމަންޓެއް ކުރާ މަންޒަރު ކަމަށާއި، ކޮންމެވެސް ވަރަކަށް ނަފާއެއް ލިބޭ އިންވެސްޓްމަންޓެއް ކުރަންވެއްޖެ ކަމަށް މެންބަރު ޝަމްހީދު ވިދާޅުވި އެވެ. ހަމައެއާއެކު، ދިވެހިރާއްޖޭގެ އިގުތިސާދުގެ ތެރޭގައި ފައިސާ އެނބުރާނެ އެއްވެސް ގޮތެއް މިސަރުކާރުގެ ސިޔާސަތުތަކުގެ ތެރޭގައި ނެތް ކަމަށް މެންބަރު ޝަމްހީދު ވިދާޅުވި އެވެ.
