އަންހެން ކުދިން ބާރުވެރިކުރުވަން ދުރުވިސްނޭ ސިޔާސަތުތަކެއް ތަންފީޒު ކުރާނަން: ރައީސް މުއިއްޒު
11 އޮކްޓޯބަރު 2026 | އާދީއްތަ 09:14ބައިނަލްއަގުވާމީ އަންހެން ކުދިންގެ ދުވަހާ ގުޅިގެން ރައީސުލްޖުމްހޫރިއްޔާގެ ދެކަނބަލުން ދެއްވި މެސެޖުގައި، އަންހެން ކުދިން ބާރުވެރިކުރުވައި އެކުދިންގެ ހައްގުތައް ރައްކާތެރިކުރުމަށް ބައިނަލްއަގުވާމީ މުޖުތަމައާއެކު ރާއްޖެއިން އަބަދުވެސް މަސައްކަތްކުރާނެކަމުގެ ޔަގީންކަން ވަނީ ދެއްވާފައި. މީގެ އިތުރުން، އަންހެން ކުދިންނަށް ތައުލީމާއި އެކި ދާއިރާތަކުން ފުރުސަތުތައް ފަހިކޮށްދިނުމަކީ ގައުމުގެ މުސްތަގުބަލަށް ކުރެވޭ މުހިންމު އިންވެސްޓެއްކަން އެ ދެކަނބަލުން ފާހަގަކުރެއްވި
ސަރުކާރުން އަލަށް ފެށި "ރައްޔިތުންގެ އަޑު" ސިލްސިލާގައި ރައީސް މުއިއްޒު ރައްޔިތުންނާ ބައްދަލު ކުރައްވަނީ. | ރައީސް އޮފީސް
ސަރުކާރުގެ އަމާޒަކީ ޒުވާން އަންހެނުންނާއި އަންހެންކުދިންގެ ގާބިލުކަން އެންމެ ފުރިހަމަ ގޮތުގައި ހިފުމަށް ދުރުވިސްނޭ ސިޔާސަތުތައް ތަންފީޒުކޮށް، އެފަދަ ފުރުސަތުތައް ފަހިކޮށްދިނުން ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ.
ބައިނަލްއަގުވާމީ އަންހެން ކުދިންގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ، ދުނިޔޭގެ އެކި ކަންކޮޅުތަކުގައިވާ އަންހެން ކުދިންގެ ހައްގުތައް ކުރިއެރުވުމަށާއި ރައްކާތެރި ކުރުމަށް ރާއްޖެއިން އަބަދުވެސް ބައިނަލްއަގުވާމީ މުޖުތަމައާއެކު ދެމިއޮންނާނެ ކަމަށެވެ.
ރައީސް މުއިއްޒު ވިދާޅުވީ، އަންހެން ކުދިންނާއި ޒުވާން އަންހެނުން ބާރުވެރިކުރުވައި، އެކުދިންގެ ގާބިލުކަން އެންމެ ފުރިހަމައަށް ހިފުމަށް މަގުފަހިކޮށްދިނުމަކީ ސަރުކާރުގެ މުހިންމު އަމާޒެއް ކަމަށެވެ. އަދި މުސްތަގުބަލުގެ ލީޑަރުންގެ ގޮތުގައި އެކުދިން ބިނާކުރުމަށާއި، ރައްކާތެރި އަދި އެހީތެރި މާހައުލެއްގައި ގައުމީ ތަރައްގީއަށް މާނަހުރި ޚިދުމަތްތަކެއް ކުރުމަށް ފުރުސަތު ހޯދައިދިނުމަށް އެކަށައަޅަންޖެހޭ ސިޔާސަތުތައް ކުރިއެރުވުމުގައި މި ސަރުކާރުން އަބަދުވެސް ދެމިއޮންނާނެ ކަމަށް އެމަނިކުފާނު ވިދާޅުވި އެވެ.
މިފަދަ އުންމީދުތައް ހަގީގަތަކަށް ހެދުމަށްޓަކައި އާއިލާތަކާއި މުޖުތަމައުތަކުން ފެށިގެން، ކަމާބެހޭ އެންމެހައި ފަރާތްތައް ޝާމިލުވާ ގޮތަށް މުޅި މުޖުތަމައުގެ އެއްބާރުލުން ބޭނުންވާކަން ރައީސް މުއިއްޒު ފާހަގަކުރެއްވި އެވެ. އަދި މިއަދު އަންހެން ދަރިންނަށް ކުރާ އިންވެސްޓަކީ، އެންމެންނަށްވެސް ހަމަހަމަ، އެންމެން ޝާމިލުވާ، އަދި ފާގަތި މުސްތަގުބަލެއް ބިނާކުރުމަށް ކުރެވޭ އިންވެސްޓެއް ކަމަށްވެސް އެމަނިކުފާނު ވިދާޅުވި އެވެ.
މީގެ އިތުރުން މި ދުވަހާ ގުޅިގެން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ދެއްވި މެސެޖުގައި، ރާއްޖެއާއި ދުނިޔޭގެ އެކި ކަންކޮޅުތަކުގައިވާ އަންހެން ކުދިންގެ ހިތްވަރާއި، އުންމީދުތަކާއި، ނިމުމެއްނެތް ގާބިލުކަން ވަނީ ފާހަގަކުރައްވާފަ އެވެ. އަންހެން ކުދިންނަކީ ލީޑަރުންނާއި، އައު އީޖާދުތައް އުފައްދާ އަދި ހެޔޮ ބަދަލުތައް ގެނެސްދޭ ބައެއްކަން ފާހަގަކުރައްވައި، އެކުދިންގެ އަޑާއި، ހުނަރާއި އިސްނެގުމަކީ ވަރުގަދަ އަދި ވިލުންވެރި މުޖުތަމައުތަކެއް ބިނާކުރުމަށް ވަރަށް ބޮޑު އެހީތެރިކަމެއް ފޯރުކޮށްދޭ ކަންކަން ކަމަށް އެކަމަނާ ވިދާޅުވި އެވެ.
ސާޖިދާ ވިދާޅުވީ، އަންހެން ކުދިން ބާރުވެރިކުރެވިއްޖެނަމަ އެކުދިން ހަމައެކަނި ބަދަލުކޮށްލަނީ އަމިއްލަ ދިރިއުޅުން ނޫން ކަމަށާއި، އެކުދިން އުފުލަނީ މުޅި ގައުމުގެ މުސްތަގުބަލު ކަމަށެވެ.
އެގޮތުން ތައުލީމާއި، އާންމު ޚިދުމަތްތަކާއި، ވިޔަފާރިވެރިކަމާއި، ކުޅިވަރާއި އަދި މުޖުތަމަޢުގެ އިސްފަންތީގައި އަންހެން ކުދިންނާއި ޒުވާން އަންހެނުން އަދާކުރަމުންދާ ފާހަގަކޮށްލެވޭ ފަދަ މުހިންމު ދައުރު ރާއްޖެއިން ފެންނަމުންދާ ކަމަށް ސާޖިދާ ވިދާޅުވި އެވެ. އަދި އެކުދިންގެ އަގުނުކުރެވޭ ފަދަ ޚިދުމަތްތަކާއި ކާމިޔާބީތަކަކީ ވަރުގަދަ އަދި ދެމެހެއްޓެނިވި ގައުމެއް ބިނާކުރުމުގައި މުހިންމު ދައުރެއް އަދާކުރާ ކަންކަން ކަމުގައި އެކަމަނާ ވިދާޅުވި އެވެ.
