ފީފާ ވޯލްޑް ކަޕުން ޕޮލެންޑް ޖާގަ ހޯދައިފި

އަންނަ އަހަރު ރަޝިއާގައި ބާއްވާ ފީފާ ވޯލްޑް ކަޕުން ޕޮލެންޑް ޖާގަ ހޯދައިފި އެވެ.

ދުނިޔޭގެ ތަށްޓަށް ފުޓްބޯޅަ މުބާރާތުގެ ޖާގަ ޕޮލެންޑް ކަށަވަރު ކުރީ، ޔޫރަޕްގެ ކޮލިފައިންގ ގްރޫޕް ސްޓޭޖްގެ ފަހު މެޗު ކާމިޔާބުކޮށް، ގްރޫޕް އީގެ އެއްވަނަ ހޯދައިގެންނެވެ.

ވޯލްޑް ކަޕް ކޮލިފައިންގ ގްރޫޕް އީގައި އާދީއްތަ ދުވަހުގެ ރޭ، އަމިއްލަ ދަނޑުގައި މޮންޓެނީގްރޯގެ މައްޗަށް ޕޮލެންޑް ކުރި ހޯދީ ހަތަރު ލަނޑު ދެ ލަނޑުން ނެވެ.

މިމެޗުގެ ހަވަނަ މިނެޓުގައި ޕޮލެންޑަށް ކުރި ހޯދައިދިނީ ކްރިޒިސްޓޯފް މަޒިންސްކީ އެވެ. އޭގެ ދިހަ މިނިޓު ފަހުން ޕޮލެންޑަށް ލީޑު ފުޅާ ކޮށްދިނީ ކަމިލް ގްރޮސިކީ އެވެ.

މިނަތީޖާގައި އޮވެ މެޗުގެ ފުރަތަމަ ހާފްގެ ކުޅުން ނިމުނުއިރު، ދެވަނަ ހާފްގައި މޮންޓެނީގްރޯ އިން ދެލަނޑު ޖަހާ ނަތީޖާ ހަމަހަމަ ކުރި އެވެ.

78 ވަނަ މިނެޓުގައި މޮންޓެނީގްރޯގެ ފުރަތަމަ ލަނޑު ޖަހައިދިނީ ސްޓެފަން މުގޯސާ އެވެ. 83 ވަނަ މިނިޓު ފަހުން އެޓީމަށް ނަތީޖާ ހަމަހަމަ ކޮށްދިނީ ޒަރްކޯ ތޮމަސެވިޗެވެ.

މޮންޓެނީގްރޯ އިން ނަތީޖާ ހަމަހަމަ ކުރިތާ 2 މިނިޓުވެސް ނުވަނީސް ބަޔާން މިއުނިކްގެ ފޯވާޑް ރޮބަޓް ލެވަންޑޮވްސްކީ ވަނީ ޕޮލެންޑަށް ދެވަނަ ފަހަރަށް ލީޑު ނަގައިދީފައިވެ އެވެ. ޕޮލެންޑްގެ ފަހު ލަނޑަކީ 87 ވަނަ މިނެޓުގައި މޮންޓެނީގްރޯގެ ފިލިޕް ސްޓޮޖްކޮވިޗް އަތުން ބައިކޮޅަށް ވަން ލަނޑެކެވެ.

މިރޭ މޮންޓެނީގްރޯ ކޮޅަށް ޖެހި ލަނޑާއެކު ޕޮލެންޑްގެ ކެޕްޓަން ލެވަންޑޮވްސްކީ، ވޯލްޑް ކަޕް ކޮލިފައިންގ ބުރު ނިންމާލީ ލަނޑު ލިސްޓުގެ ކުރީގައި އޮވެގެންނެވެ. ވޯލްޑް ކަޕް ކޮލިފައިންގ ޔޫރަޕްގެ ގްރޫޕް ސްޓޭޖްގައި ކުޅުނު 10 މެޗުން ލެވަންޑޮވްސްކީ ވަނީ 16 ލަނޑު ޖަހާފައެވެ.

މިގްރޫޕްގައި މިރޭ ދެން ކުޅުނު ދެމެޗު ވެސް ނިމުނީ އެއްވަރު ވެގެންނެވެ. އަމިއްލަ ދަނޑުގައި ރޮމޭނިއާ އާއި ދެކޮޅަށް ޑެންމާކް ކުޅުނު މެޗު އެއް ލަނޑު އެއް ލަނޑުން އެއްވަރުވިއިރު، ކަޒަކިސްތާނާއި އަރްމީނިއާ ބައްދަލު ކުރި މެޗުވެސް ނިމުނީ ހަމަ މިނަތީޖާ އިންނެވެ.

ފީފާ ވޯލްޑް ކަޕް ކޮލިފައިންގައި ގްރޫޕް އީގެ މެޗުތައް ކުޅެ ނިމިފައިވާއިރު، ގްރޫޕްގެ އެއްވަނަ ޕޮލެންޑް ހޯދީ 10 މެޗުން 25 ޕޮއިންޓް ހަމަކޮށް ގެންނެވެ. 20 ޕޮއިންޓާއެކު ގްރޫޕްގެ ދެވަނަ ހޯދައިގެން ޑެންމާކް ވަނީ ފީފާ ވޯލްޑް ކަޕް ކޮލިފައިންގެ ޕްލޭ އޯފްގެ ޖާގަ ކަށަވަރު ކޮށްފައެވެ. މިގްރޫޕްގައި ހިމެނޭ އެހެން ގައުމުތަކަށް ބަލާއިރު، ތިންވަނާގައިވާ މޮންޓެނީގްރޯ އަށް ލިބިފައިވަނީ 16 ޕޮއިންޓެވެ. 13 ޕޮއިންޓާއެކު ރޮމޭނިއާ މިގްރޫޕްގެ ހަތަރުވަނަ ހޯދިއިރު، ފަސްވަނާގައިވާ އަރްމީނިއާ އަށް ލިބިފައިވަނީ 7 ޕޮއިންޓެވެ. 3 ޕޮއިންޓާއެކު މިގްރޫޕްގެ ފުލުގައި ވަނީ ކަޒަކިސްތާނެވެ.

ޕޮލެންޑް އެންމެ ފަހުން ފީފާ ވޯލްޑް ކަޕްގައި ވާދަކޮށްފައި ވަނީ 2006 ވަނަ އަހަރު ޖަރުމަނުގައި ބޭއްވި މުބާރާތުގައެވެ. އަންނަ އަހަރުގެ މުބާރާތް ވެގެންދާނީ ޕޮލެންޑް ވާދަކުރާ 8 ވަނަ ވޯލްޑް ކަޕަށެވެ. ޕޮލެންޑް ވަނީ 1974 ވަނަ އަހަރު ހުޅަނގު ޖަރުމަނުގައި ބޭއްވި މުބާރާތާއި، 1982 ވަނަ އަހަރު ސްޕެއިންގައި ބޭއްވި މުބާރާތުގެ ތިންވަނަ ހޯދާފައެވެ.