ތިލަފުށި ޕޯޓާއެކު މުދާ އަވަހަށް ބޭލި، ދިރިއުޅުމުގެ ޚަރަދުތަކަށް ބޮޑު ލުޔެއް ލިބޭނެ: މިނިސްޓަރު ސައީދު
2 އޮކްޓޯބަރު 2026 | ހުކުރު 08:00މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުން މުދާ ހުސްކުރުމުގެ ދަތިތަކަށް ހައްލުލިބި، ތަކެތީގެ އަގު ހެޔޮވާނެ ކަމަށް އިކޮނޮމިކް މިނިސްޓަރު ވިދާޅުވެއްޖެ. މި މަޝްރޫއުގެ ފުރަތަމަ ފިޔަވަހި އަންނަ އަހަރުގެ ނޮވެމްބަރުގައި ހުޅުވުމަށް އަމާޒު ހިފާފައިވާއިރު، ބަނދަރުގެ ޖާގައިގެ ދަތިކަމަށް ހައްލު ހޯދުމަށް މި މަހުގެ 28 ގައި ތިލަފުށީގައި އޮޕަރޭޝަންތައް ފެށުމަށް ވަނީ ނިންމާފައި
ތިލަފުށީގައި ހުންނަ ލޯކަލް ކޮންޓޭނަރު ޑީޕޯ: ވިޔަފާރި ބަނދަރު ތަަރައްގީކުރަނީ 10 ހެކްޓަރުގެ ބޮޑު ސަރަހައްދެއްގައި | އެމްޕީއެލް
މާލޭ ވިޔަފާރި ބަނދަރު ކ. ތިލަފުއްޓަށް ބަދަލުކުރުމަށް ހިންގާ ބިޔަ މަޝްރޫއު ނިމުމާއެކު އާންމު ދިރިއުޅުމުގެ ޚަރަދުތައް ކުޑަވެ، ތާޒާކަންމަތީގައި ކާބޯތަކެތި ލިބެން ފަށާނެކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވީ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއު ކުރިއަށްދާ ގޮތް ބައްލަވައިލެއްވުމަށް ރައީސް ޑރ. މުހައްމަދު މުއިއްޒު ތިލަފުއްޓަށް އިއްޔެ ކުރެއްވި ޒިޔާރަތުގައި މީޑިއާއާ ވާހަކަދައްކަވަމުންނެވެ.
މިނިސްޓަރު ސައީދު ފާހަގަކުރެއްވި ގޮތުގައި ރާއްޖޭގައި ބައެއް ބާވަތުގެ މުދަލުގެ އަގު އިންތިހާއަށް އުފުލޭ މައިގަނޑު އެއް ސަބަބަކީ މާލޭ ވިޔަފާރި ބަނދަރަށް ކައިރިކުރާ ބޯޓުތަކުން މުދާ ހުސްކުރުމަށް ދިގު މުއްދަތެއް ހޭދަވުމެވެ. އެގޮތުން މިހާރު މުދާ ހުސްކުރުމަށް 7 ދުވަހާއި 14 ދުވަހާ ދެމެދުގެ މުއްދަތެއް ހޭދަވި ނަމަވެސް، ތިލަފުށީ ޕޯޓު ހުޅުވުމާއެކު އެންމެ ދުވަހެއްގެ ތެރޭގައި މުދާތައް ހުސްކޮށް ނިންމާލެވޭނެ ކަމަށް މިނިސްޓަރު ވިދާޅުވި އެވެ.
މިކަމުގެ އާހިރު ނަތީޖާއަކަށް ވާނީ އާންމު ރައްޔިތުން ގޭގޭގައި ދިރިއުޅުއްވާ ބޭފުޅުންގެ ކޮސްޓް އޮފް ލިވިންއަށް ވަރަށް ބޮޑު ލުޔެއް ލިބިގެންދިއުން. ކާބޯތަކެތި، ތަރުކާރީ މިހެން ގޮސް އެކި ބާވަތްބާވަތް ތާޒާކަންމަތީގައި ބޯޓުފަހަރުން ގެނެސް ވަގުތުން ބޭލޭނެމުހައްމަދު ސައީދު
މި މަޝްރޫއުގެ ސަބަބުން އެންމެ ބޮޑު ހިތްހަމަޖެހުމެއް ލިބޭނީ ދިވެހި ވިޔަފާރިވެރިންނަށް ކަމަށް ފާހަގަކުރައްވަމުން މިނިސްޓަރު ވިދާޅުވީ، ރާއްޖެއަށް ގެންނަ މުދާ ބޭލުމުގައި ޒަމާނުއްސުރެ ވާރުތަވަމުން އައި ދަތިތަކަށް ހައްލު ހޯއްދަވައިދެއްވުމަކީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފުރަތަމަ ދުވަހުން ފެށިގެން ވެސް އެންމެ އިސްކަންދެއްވި އެއް އަމާޒު ކަމަށެވެ. މީގެއިތުރުން މުޅި މަޝްރޫއު ނިމޭއިރު، މާލޭގެ ބާޒާރުގައި މިހާރު ހިންގާ އަތޮޅު ފިހާރަތަކާއި ގުދަންތައް ވެސް ތިލަފުއްޓަށް ބަދަލުކޮށް، ފްރީ ޒޯންތައް ގާއިމްކުރެވިގެންދާނެ ކަމަށް ވެސް އޭނާ ވިދާޅުވި އެވެ.
ސައީދު ވިދާޅުވީ ސަރުކާރުގެ އަމާޒަކީ މި މަޝްރޫއުގެ ފުރަތަމަ ފިޔަވަހީގެ މަސައްކަތް ނިންމައި، އަންނަ އަހަރުގެ ނޮވެމްބަރު މަހުގެ 11 ވަނަ ދުވަހު ތިލަފުށި ޕޯޓު ރަސްމީކޮށް ހުޅުވުމެވެ. އަދި މުޅި މަޝްރޫއުގެ މަސައްކަތް އެއްކޮށް ނިންމަން ތާވަލުކޮށްފައި ވަނީ ނޮވެމްބަރު 2028 އަށެވެ.
އެހެންނަމަވެސް، މާލޭ ވިޔަފާރި ބަނދަރުގެ ޖާގައާއި ވަސީލަތްތަކުގެ ދަތިކަމަށް އަވަސް ހައްލެއް ހޯދުމުގެ ގޮތުން، މި މަހުގެ 28 ވަނަ ދުވަހު ތިލަފުށީގައި ޕޯޓު އޮޕަރޭޝަންތައް ފެށުމަށް އެމްޕީއެލް އިން ވަނީ ނިންމާފަ އެވެ.
ތިލަފުއްޓަށް ޕޯޓު ބަދަލުކުރުމުގެ މަސައްކަތުގެ ތެރެއިން، އެތެރޭގެ އުޅަނދުފަހަރަށް ހާއްސަ ކީ-ވޯލްގެ ފުރަތަމަ 100 މީޓަރުގެ މަސައްކަތް މިހާރު ވަނީ އެއްކޮށް ނިމިފަ އެވެ. އަދި އެތެރޭގެ ކީ-ވޯލްގެ ހިއްކި ސަރަހައްދު ބެކްފިލް ކުރުމުގެ ގާތްގަނޑަކަށް 40 އިންސައްތަ މަސައްކަތް ވެސް މިހާރު ވަނީ ފުރިހަމަކޮށްފަ އެވެ.
