ތަކެތީގެ އަގު ބޮޮޑުވެގެން އުޅެނީ ޕޯޓުގައި މުދާ ތާށިވުމުން ދިމާވާ މައްސަލަތަކުގެ ސަބަބުން: ރާއީ

ރާއްޖޭގެ ބާޒާރުގައި ތަކެތީގެ އަގު ބޮޑުވަމުންދަނީ މާލޭ ޕޯޓުގައި މުދާ ކްލިއަރ ކުރުމުގައި ދިމާވާ ލަސްތަކާއި، ޕޯޓު ތެރޭގައި މުދާ ތާށިވުމުގެ ސަބަބުން ކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ ވިދާޅުވެއްޖެ އެވެ.

ބުދަ ދުވަހުގެ ރޭ އެމްޑީޕީން ބޭއްވި "ހަރުގެ" ޖަލްސާގައި ވާހަކަދައްކަވަމުން ރާއީ ވިދާޅުވީ، ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކާއެކު ސިންގަޕޫރު، ދުބާއީ އަދި ސްރީލަންކާ ފަދަ ގައުމުތަކުން ރާއްޖެއަށް އެތެރެކުރާ މުދަލުގެ އަގު އަދި ނާލުގެ އަގު އުފުލޭ ކަމަށެވެ. ނާލުގެ އަގު އުފުލުމުގެ ނޭދެވޭ އަސަރު މުޅި ރާއްޖެއަށް ކުރާ ކަމަށާއި، މިކަމަށް ދާއިމީ ހައްލެއް ހޯދުމަށް އެންމެ ފުރަތަމަ މަސައްކަތް ކުރީ 2008 ވަނަ އަހަރު އޭރުގެ އެމްޑީޕީ ސަރުކާރުގައި ކަން ރާއީ ފާހަގަކުރެއްވި އެވެ. މާލޭ ޕޯޓަށް ދިމާވެފައިވާ ތޮއްޖެހުމުގެ މައްސަލަ ހައްލުކުރުމަށްޓަކައި، ރާއްޖޭގެ އުތުރާއި ދެކުނުގައި އޭރު ޕޯޓުތައް ގާއިމުކުރެވުނުކަން ފާހަގަކުރައްވަމުން ރާއީ ވިދާޅުވީ، ހިތަދޫ ޕޯޓްސް ލިމިޓެޑާއި ކުޅުދުއްފުށި ޕޯޓްސް ލިމިޓެޑް ތަރައްގީކޮށް، އެ ތަންތަނަށް ގެންދާ މުދަލުން 30 އިންސައްތަ ޑިއުޓީ މާފުކޮށްދިނުމުގެ ސިޔާސަތެއް އެކުލަވާލި އެމްޑީޕީ ސަރުކާރުން ކަމަށެވެ.

އޭރު އެކުލަވާލި ސިޔާސަތެއް މާލޭގައި ޕޯޓުގެ ކޮންޖެސްޓް ހައްލުކުރުމުގެ ގޮތުން ގެނައި ވަގުތީ ބަދަލެއް ރާއްޖޭގެ އެކި ކަންކޮޅުތަކުގައި ޕޯޓުތައް ތަރައްގީކުރުން. 2008 އަހަރުން ފެށިގެން 2013 ވަނަ އަހަރާއި ހަމައަށް ގާތްގަނޑަކަށް މަހެއްގެ މައްޗަށް 100 ކޮންޓެއިނަރަށް ވުރެ އިތުރުވަމުން ދިޔައީ މި ޕޯޓަށް ޓްރާންޝިޕްމަންޓް ގޮތުގައި ގެންދާތީ

މަކުނުދޫ ދާއިރާގެ ކުރީގެ މެންބަރު ރާއީ

2008 ވަނަ އަހަރުން ފެށިގެން 2013 ވަނަ އަހަރުގެ ނިޔަލަށް މަހެއްގެ މައްޗަށް ގާތްގަނޑަކަށް 100 ކޮންޓެއިނަރަށް ވުރެ ގިނައިން ޓްރާންޝިޕްމަންޓްގެ ގޮތުގައި އެ ޕޯޓުތަކަށް ގެންދިޔަ ކަމަށާއި މާލޭގެ ވިޔަފާރިވެރިން ވެސް އުތުރާއި ދެކުނުގެ ޕޯޓުތަކުގެ ބޭނުން ހިފުމުގެ ނަތީޖާއެއްގެ ގޮތުން އެމްޕީއެލްގެ ރެވެނިއު ދިޔައީ ދުވަހެއް ދުވަހަކަށް މަތިވަމުން ކަމަށެވެ. ރާއީ ވިދާޅުވި ގޮތުގައި އެމްޕީއެލްގެ އަހަރީ ފައިދާގެ ގޮތުގައި އޭރު 100 މިލިއަނާއި 300 މިލިއަނުން ދިޔައީ ފައިދާ ލިބެމުންނެވެ. ނަމަވެސް، މިދިޔަ އަހަރު އެމްޕީއެލްގެ ސާފު ފައިދާ 10 މިލިއަން ރުފިޔާއަށް ދަށްވެފައިވާކަން ފާހަގަކުރައްވަމުން ރާއީ ވިދާޅުވީ، މާލޭގެ މަޖީދީމަގުގައި ހުންނަ ސައި ހޮޓަލަކަށް ވެސް އެއަށް ވުރެ ބޮޑު ފައިދާއެއް ލިބޭނެ ކަމަށެވެ. މިހާރު ލިބޭ ފައިދާއަކީ ވެސް ކެރޭނު ހަލާކުވުން ފަދަ އެކި އުޒުރުތައް ދައްކައިގެން، ޕޯޓުގައި ހުންނަ މުދާތައް ހިފަހައްޓައިގެން ނަގާ ޖޫރިމަނާއިން ލިބޭ ފައިސާ ކަމަށް އޭނާ ތުހުމަތު ކުރެއްވި އެވެ.

މުދާ ކްލިއަރ ކުރުމުގައި ދިމާވާ ލަސްތަކުގެ ސަބަބުން، މުދަލުގެ އަގު އުުފުލެމުން އަންނަ ކަމުގެ ކަންބޮޑުވުން ފާޅުކުރައްވަމުން ރާއީ އިތުރަށް ވިދާޅުވީ، ނިމިދިޔަ އެމްޑީޕީ ސަރުކާރުން ގުޅީފަޅުގައި ޕޯޓު ތަރައްގީކުރުމަށް ބޭރުގެ ތަޖުރިބާކާރުންގެ ލަފަޔާއެކު ދުރުރާސްތާގެ ހަރުދަނާ ޕްލޭނެއް އެކުލަވާލާފައިވާ ކަމަށެވެ. ނަމަވެސް، ރައީސް ޑރ. މުހައްމަދު މުއިއްޒު އެއްވެސް ޕްލޭނެއް ނެތި، ޕޯޓުގެ މައްސަލައަށް ވަގުތީ ހައްލެއް ހޯދުމުގެ ގޮތުން ޕޯޓު ތިލަފުއްޓަށް ބަދަލުކުރަން ނިންމެވުމަކީ ކަންބޮޑުވާ ކަމެއް ކަމަށް އޭނާ ވިދާޅުވި އެވެ.