މިނިސްޓަރު ސައީދުގެ އިތުބާރު ނެތްކަމުގެ މައްސަލަ އެމްޑީޕީގެ ފަރާތުން މަޖިލީހަށް!
1 އޯގަސްޓު 2026 | ހޮނިހިރު 12:39އިގްތިސާދީ ހާލަތު ގޯސްވެ ޑޮލަރުގެ އަގު އުފުލުމާއި، ދައުލަތުގެ މާލިއްޔަތަށް އިހުމާލުވުމުގެ އިތުރުން މަޖިލީހަށް ޖަވާބުދާރީވުމަށް ހުރަސްއަޅުއްވާ ކަމަށް ބުނެ މިނިސްޓަރު ސައީދުގެ މައްޗަށް ބޮޑެތި ތުހުމަތުތަކެއް އެމްޑީޕީން ވަނީ ކޮށްފައި. މީގެ އިތުރުން ތަރައްގީގެ މަޝްރޫއުތައް ހުއްޓި، ގައުމުގެ އިސްތިގުލާލަށް ގެއްލުންވާ ގޮތަށް ގާނޫނުތަކަށް ބަދަލު ގެނެސްފައިވާތީ މިނިސްޓަރުގެ އިތުބާރު ނެތްކަމަށް އެ ޕާޓީން ބުނޭ
މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް، މުހައްމަދު ސައީދު | ރައީސް އޮފީސް
މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް، މުހައްމަދު ސައީދުގެ އިތުބާރު ނެތްކަމުގެ ވޯޓު ނެގުމަށް އިދިކޮޅު އެމްޑީޕީގެ 13 މެންބަރުންގެ ސޮޔާއެކު ރައްޔިތުންގެ މަޖިލީހަށް މައްސަލައެއް ހުށަހަޅައިފި އެވެ.
އެމްޑީޕީގެ ފަރާތުން ހުށަހަޅާފައިވާ މައްސަލައިގައި ބުނީ މިނިސްޓަރު ސައީދު، ގާނޫނު އަސާސީގެ 132 ވަނަ މާއްދާގެ ދަށުން ވަޒީރުންގެ މަޖިލީހުގެ މެންބަރުންނާ ހަވާލުކޮށްފައިވާ މަސްއޫލިއްޔަތުތައް އަދާކުރުމުގައި ގާނޫނު އަސާސީއާ ކަނޑައެޅިގެން ޚިލާފުވެފައިވާ އިރު، ގާނޫނު އަސާސީގެ 134 ވަނަ މާއްދާގެ ދަށުން ރައްޔިތުންގެ މަޖިލީހަށް ޖަވާބުދާރީވުމުގެ ވާޖިބު އަދާކުރުމުގައި އިހުމާލުވެފައިވާ ކަމަށެވެ. އަދި ގާނޫނު އަސާސީގެ 136 ވަނަ މާއްދާގެ ދަށުން ވަޒީރުންގެ މަޖިލީހުގެ މެންބަރުން ކުރުން މަނާކޮށްފައިވާ އަމަލުތަކެއް ހިންގާފައިވާތީ މިނިސްޓަރުގެ މައްޗަށް މަޖިލީހުގެ އިތުބާރު ގެއްލިގައިވާ ކަމަށެވެ.
އެ މައްސަލައިގައި އެ ޕާޓީ އިން ވަނީ 6 ކަމެއް ހުށަހަޅާފަ އެވެ.
އެގޮތުން ޑޮލަރުގެ އަގު ކަޅުބާޒާރުގައި ހުއްޓުމެއްނެތި މައްޗަށް ގޮސް، ތަކެތީގެ އަގު އިންތިހާ އަށް އުފުލިފައިވާ ކަން ފާހަގަކޮށް އެމްޑީޕީ އިން ބުނީ އިގްތިސާދީ ރިފޯމްތައް ގެނައުމަށް އެދެވޭ އެއްވެސް ސިޔާސަތެއް އަމަލީގޮތުން މިއަދާ ހަމައަށް ވެސް ތަންފީޒުކޮށްފައި ނުވުމުގެ ސަބަބުން ބޭރު ފައިސާގެ ބާޒާރުގައި ޑޮލަރު ލިބުން ދަތިވެ، ކަޅު ބާޒާރުގައި ޑޮލަރުގެ ރޭޓު 21 ރުފިޔާ އަށް ވުރެ ވެސް މައްޗަށް ގޮސްފައިވާ ކަމަށެވެ. އެހެން ނަމަވެސް މިނިސްޓަރު ވަނީ މިކަމުގެ ސީރިއަސްކަން ކަނޑުވާލާފައި ކަމަށް އެމްޑީޕީ އިން ވަނީ ބުނެފަ އެވެ.
އަދި ދައުލަތުގެ މުދަލާއި ފައިސާ އަމާނާތްތެރިކަމާއެކު މިނިސްޓަރު ސައީދު ބަލަހައްޓައިފައި ނުވާ ކަން ފާހަގަކޮށް މައްސަލައިގައި ބުނީ ދައުލަތުގެ މާލީ ހާލަތު ގޯސް ދަނޑިވަޅެއްގައި ރާއްޖޭން ބޭރުގައި ބޭއްވި އިންވެސްޓަރު ފޯރަމްތަކަށާއި މަޝްރޫއުތައް އިފުތިތާހުކުރުމުގެ ރަސްމިއްޔާތުތަކަށް ދައުލަތުގެ ގިނަ އަދަދެއްގެ ފައިސާއާއި ވަސީލަތްތައް ބޭނުންކޮށްފައިވާ ކަމަށެވެ.
އެގޮތުން ޑިވެލޮޕްމަންޓް ބޭންކް ހުޅުވައި ޚިދުމަތް ދޭން ފަށާނެ ކަމަށް ވައުދުވެވަޑައިގެންފައިވީ ނަމަވެސް އެ ބޭންކުގެ ޚިދުމަތްތައް ނުފެށި މިދިޔަ އަހަރުގެ މާރިޗު މަހުގެ ނިޔަލަށް 6.56 މިލިއަން ރުފިޔާ އެ ބޭންކަށް ޚަރަދުކޮށްފައިވާ ކަން އެ މައްސަލައިގައި ފާހަގަކޮށްފައިވެ އެވެ.
އޭގެ އިތުރުން ރައްޔިތުންގެ މަޖިލީހަށް ޖަވާބުދާރީވުމަށް ވެސް މިނިސްޓަރު ހުރަސްއަޅުއްވާފައިވާ ކަމަށާއ އެގޮތުން މަޖިލީހަށް ހާޒިރު ވުމަށްފަހު މެންބަރުންގެ ސުވާލުތަކަށް ޖަވާބު ދެއްވުމުގެ ބަދަލުގައި، ސުވާލާ ނުގުޅޭ ސިޔާސީ ވާހަކަ ދައްކަވާކަން ވަނީ ފާހަގަ ކޮށްފަ އެވެ. އަދި އަމިއްލަ ވިޔަފާރިތައް ހިމާޔަތް ކުރުމުގައި ވެސް މިނިސްޓަރު ފެއިލްވެވަޑައިގެންފައިވާ ކަމަށާއި، ކުދި އަދި މެދު ފަންތީގެ ވިޔަފާރިތަކަށް ޚިދުމަތް ދޭން ބިޒްނަސް ސެންޓަރު ބަންދުކޮށް، އެ ދާއިރާގެ ކުރިއެރުމަށް ހުރަސްއަޅައި، ކާމިޔާބު ކަމާއެކު ހިންގަމުން ދިޔަ އެސްޑީއެފްސީގެ މަސައްކަތް މިނިސްޓަރުގެ އިހުމާލުން މަޑުޖެހިފައިވާ ކަމަށް ވެސް މައްސަލައިގައިވެ އެވެ.
އެ މައްސަލައިގައި އެމްޑީޕީ އިން އިތުރަށް ބުނެފައި ވަނީ، ސްޕެޝަލް އިކޮނޮމިކް ޒޯނުގެ ގާނޫނުގެ އެއް މަގުސަދަކީ ރާއްޖޭގެ އިގުތިސާދު ފަތުރުވެރިކަމަށް ބަރޯސާވާ މިންވަރު ކުޑަކޮށް އިގުތިސާދީ ދާއިރާތައް ސިންދަފާތުކުރުން ކަމަށް ވީ ނަމަވެސް މި ސަރުކާރުން އެ ގާނޫނު އިސްލާހުކުރީ ދައުލަތަށް ގެއްލުންވާ ގޮތަށް ކަމަށެވެ. އެގޮތުން ޓައުންޝިޕް ތައާރަފުކޮށް ދައުލަތުގެ ބާރު ކެނޑޭ ގޮތަށް ރާއްޖޭގެ ބައެއް ސަރަހައްދުތަކެއް ބޭރުގެ އަތް މައްޗަށް ދޫކޮށް އެ ފަރާތްތަކަށް ބޮޑެތި ލުއިތައް ދީފައިވާ ކަމަށް، މައްސަލައިގައި ބުނެފައިވެ އެވެ. އޭގެ ސަބަބުން ދިވެހި ދައުލަތުގެ ސަރަހައްދެއް ގެއްލި، ދައުލަތަށް ލިބެންޖެހޭ ފައިސާ ނުލިބުން އެކަށީގެންވާ ކަމަށް ވެސް ވެ އެވެ.
ފަހު ކަމެއްގެ ގޮތުގައި އެ ޕާޓީ އިން ފާހަގަކޮށްފައި ވަނީ ރާއްޖޭގެ އިގްތިސާދީ މަލަމަތި ބަދަލުކޮށްލާނެ ކަމަށް ބުނެ ސަރުކާރުގެ ފަރާތުން މިނިސްޓަރު ތަފާތު އެކި މުނާސަބަތުތަކުގައި ބިޔަ މަޝްރޫއުތަކެއް އިއުލާނު ކުރައްވަމުން ގެންދެވި ނަމަވެސް ގިނަ މަޝްރޫއުތައް ހުއްޓިފައިވާ ކަމެވެ. އެގޮތުން ބަންކަރިންގެ ޚިދުމަތާއި، ޑިވެލޮޕްމަންޓް ބޭންކް އޮފް މޯލްޑިވްސްގެ އިތުރުން މޯލްޑިވްސް އިންޓަރނޭޝަނަލް ފައިނޭންޝަލް ސެންޓަރު އެ މައްސަލައިގައި ފާހަގަކޮށްފައިވެ އެވެ.
އެހެންކަމުން މި ހުރިހާ ކަމަކާއެކު މިނިސްޓަރުގެ މައްޗަށް މަޖިލީހުގެ އިތުބާރު ގެއްލިގައިވާތީ ގާނޫނު އަސާސީގެ 101 ވަނަ މާއްދާގެ (ހ) އާއި ރައްޔިތުންގެ މަޖިލީހުގެ ގަވާއިދުގެ 229 ވަނަ މާއްދާގެ (ހ) ގެ ދަށުން އެ މިނިސްޓަރު ސައީދަށް އިތުބާރު ނެތް ކަމުގެ ވޯޓު ނެގުމަށް އެމްޑީޕީ އިން ވަނީ ހުށަހަޅާފަ އެވެ.
