ބޮޑެތި ޖޫރިމަނާތަކެއް ކަނޑައަޅާފައިވާ އެއްގަމު ދަތުރުފަތުރުގެ އައު ގާނޫނަށް މިއަދު އަމަލުކުރަން ފަށައިފި

އެއްގަމު ދަތުރުފަތުރުގެ އައު ގާނޫނަށް އަމަލުކުރަން ފަށައިފި އެވެ. 

މި ގާނޫނުގެ ދަށުން، މާލެ ސަރަހައްދުގެ އެއްގަމު ދަތުރުފަތުރުގެ ނިޒާމާ ގުޅޭ އެންމެހާ ކަންކަން ރާވައި ހިންގުމަށް ގްރޭޓާ މާލެ ޓްރާންސްޕޯޓް އެންޑް މޮބިލިޓީ އޮފީހެއް އުފައްދާފައިވެ އެވެ. އަދި މާލެ ސަރަހައްދުގެ އެއްގަމު ދަތުރުފަތުރުގެ ކަންކަން ރާވައި ހިންގުމަށްޓަކައި 'ލޭންޑް ޓްރާންސްޕޯޓް މޮބިލިޓީ ފަންޑު' ގެ ނަމުގައި ފަންޑެއް އުފެއްދުން މި ގާނޫނުގެ ދަށުން ލާޒިމްވެ އެވެ. 

Advertisement

ހަމައެއާއެކު، އަމިއްލަ ފަރުދެއްގެ ނަމުގައި ނުވަތަ ރަޖިސްޓްރީކޮށްފައިވާ ގާނޫނީ ޝަހުސެއްގެ ނަމުގައި ރަޖިސްޓަރީކުރާ އެއްގަމު އިންޖީނުލީ އުޅަނދު ނުވަތަ އެއް ބާވަތެއްގެ އުޅަނދުގެ ޖުމްލަ އަދަދު 2 އަށް ވުރެ އިތުރުވާނަމަ އިތުރުވާ ކޮންމެ އުޅަނދެއްގެ ރަޖިސްޓަރީ ދެމެހެއްޓުމަށްޓަކައި މަލްޓިޕަލް އޯނާޝިޕް ފީއެއް ނެގުމާއި، އެއްގަމު ދަތުރުފަތުރުގައި ބޭނުންކުރާ އުޅަނދަށް 20 އަހަރުވުމުން ރަޖިސްޓްރީ ބާތިލުވާނެ އެވެ.

މި ގާނޫނުގައި ބައެއް އުޅަނދުތަކުގެ އަހަރީ ފީތައް ބޮޑުކުރުމާއި، އުޅަނދުގައި އަމިއްލަ ނަންބަރު ޖަހާނަމަ ބޮޑު ފީއެއް ނެގުމުގެ އިތުރުން އިންޝުއަރނުކޮށް ދުއްވުމަކީ މަނާކަމެއްގެ ގޮތުގައި ކަނޑައަޅައި ޖޫރިމަނާގެ އަދަބުތަކެއް ވެސް ހިމަނާފައިވެ އެވެ.

އެގޮތުން، އެއްގަމު ދަތުރުފަތުރުގެ ނިޒާމުގެ ތެރޭގައި، ފަރުވާކުޑަކޮށް ނުވަތަ ނުރައްކާތެރިކޮށް އުޅަނދެއް ދުއްވައިފި ނަމަ އެ ކުށުގެ އަދަބަކީ، ފަންސަވީސްހާސް ރުފިޔާ އާއި އެއްލައްކަ ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ. އަދި އެ އަމަލުގެ ސަބަބުން މީހަކަށް އަނިޔާއެއް ލިބިއްޖެނަމަ އަދަބަކީ، އެއްލައްކަ ރުފިޔާ އާއި ފަސްލައްކަ ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ. އަދި ޖިނާއީ ދައުވާ އުފުލޭނެ ކަމަށް ވެސް ބުނެފައިވެ އެވެ.

އެއްގަމު އުޅަނދު ދުއްވަމުންދާ ފަރާތަކުން، އުޅަނދުގެ ކޮންޓްރޯލް، ކުޑަ ކުއްޖަކާ ނުވަތަ އެއްގަމު އުޅަނދު ދުއްވުމުގެ ލައިސަންސް ލިބިފައި ނުވާ ފަރާތަކާ ހަވާލުކުރުން، ނުވަތަ އުޅަނދުގެ ކޮންޓްރޯލް، ފަސިންޖަރުންގެ ސީޓެއްގައިވާ ފަރާތަކާ ހަވާލު ކޮށްފިނަމަ ފަންސަވީސްހާސް ރުފިޔާ އާއި ފަންސާސްހާސް ރުފިޔާއާ ދެމެދުގެ އަދަދަކުން ޖޫރިމަނާ ކުރާނެ އެވެ. 

ހަމައެއާއެކު، ގަވާއިދާ ހިލާފަށް އުޅަނދެއް ޕާކުކުރުމުގެ ސަބަބުން ކުރެވޭ ޖޫރިމަނާގެ އަދަދު ފަސްހާސް ރުފިޔާ ނުވަތަ އެއަށްވުރެ ބޮޑުވެއްޖެނަމަ، ޖޫރިމަނާ ފައިސާ ދައްކައި ހަލާސް ކުރަންދެން އެ ޖޫރިމަނާއެއް ނިސްބަތްވާ އުޅަނދެއް ޓްރެފިކް ފުލުހުންނަށް ބޫޓުކުރެވިދާނެ ކަމަށް ވެސް ގާނޫނުގައި ބުނެފައިވެ އެވެ.

އަދި މަގުމަތީގެ ރައްކާތެރިކަމަށްޓަކައި ހެދިފައިވާ ގާނޫނުތަކާ ހިލާފުވާ އެކަމަކު ގާނޫނުގައި ވަކި އަދަބެއް ކަނޑައެޅިފައިނުވާ މީހުންނަށް ދެވޭނެ ޖޫރިމަނާގެ އަދަބުތަކެއް ކަނޑައެޅުން ހިމެނާފައިވެ އެވެ. އެގޮތުން ގަވާއިދާ ހިލާފަށް މަގު ހުރަސްކޮށްފި ނަމަ، އެ މީހަކު 100 ރުފިޔާ އިން ޖޫރިމަނާ ކުރުން ހިމެނެ އެވެ.

މީގެ އިތުރުުން، އެއްގަމު ދަތުރުފަތުރުގެ ނިޒާމު ހަރަދަނާ ގޮތެއްގައި ހިންގުމަށް މަގުފަހިކުރުމުގެ ގޮތުން އެއްގަމު ދަތުރުފަތުރުގެ ޤައުމީ ސްޓްރެޓެޖީއެއް އެކުލަވާލަން ގާނޫނުން ލާޒިމް ކުރެ އެވެ. އަދި މި ނިޒާމު ހިންގުމުގެ މައިގަނޑު މަސްއޫލިއްޔަތު އަދާކުރަން ޖެހޭނީ، ދަތުރުފަތުރާ ގުޅުންހުރި ވުޒާރާއަކުން ކަމަށާއި ވުޒާރާއަށް ލަފާދިނުމަށް ރޯޑް ސޭފްޓީ އެންޑް ޓްރެފިކް މެނޭޖްމަންޓް އެޑްވައިޒަރީ ކޮމިޓީއެއް އެކުލަވާލަން ޖެހޭނެ ކަމަށް ވެސް ބަޔާންކޮށްފައިވެ އެވެ.