މާލެ ސިޓީ ކައުންސިލަށް ލިބޭ އުޅަނދުފަހަރުގެ ފީ ސަރުކާރުގެ ބަޖެޓަށް ލިބޭ ގޮތަށް އެއްގަމު ދަތުުރުފަތުރުގެ ބިލު މަޖިލީހުން ފާސްކޮށްފި
26 އޯގަސްޓު 2026 | ބުދަ 12:47އެއްގަމު ދަތުރުފަތުރުގެ ބިލު މަޖިލީހުން ފާސްކުރިއިރު، މާލެ ސަރަހައްދުގެ ދަތުރުފަތުރުގެ ކަންކަން ބެލެހެއްޓުމަށް ވަކި އޮފީހަކާއި ފަންޑެއް އުފެއްދުމަށް ވަނީ ލާޒިމުކޮށްފައި. މި ބިލުގެ ދަށުން އުޅަނދުތަކުގެ ފީ ބޮޑުކުރުމާއި 20 އަހަރުވީ އުޅަނދުތަކުގެ ރަޖިސްޓްރީ ބާތިލުކުރުމުގެ އިތުރުން ގަވާއިދާ ހިލާފަށް މަގު ހުރަސްކުރާ މީހުން ޖޫރިމަނާކުރުން ފަދަ އިސްލާހުތަކެއް ވަނީ ގެނެސްފައި
ދަތުރުފަތުރުގެ ގާނޫނު އަލުން އެކުލަވާލުމަށް ހުށަހެޅުއްވި ކުރެންދޫ ދާއިރާގެ މެންބަރު މުހައްމަދު ޝާމިން ހަބީބު | ރައްޔިތުންގެ މަޖިލިސް
މާލެ ސިޓީ ކައުންސިލަށް ލިބޭ އުޅަނދުފަހަރުގެ ފީ ސަރުކާރުގެ ބަޖެޓަށް ލިބޭ ގޮތަށް އެއްގަމު ދަތުުރުފަތުރުގެ ބިލު ރައްޔިތުންގެ މަޖިލީހުން ފާސްކޮށްފި އެވެ.
ސަރުކާރުގެ ފަރާތުން ކުރެންދޫ ދާއިރާގެ މެންބަރު މުހައްމަދު ޝާމިން ހަބީބު ހުށަހެޅުއްވާފައިވާ އެ ބިލު ދިރާސާ ކޮށްފައިވަނީ ޤައުމީ ތަރައްޤީއާއި ތަރިކައިގެ ކޮމިޓީންނެވެ. ކޮމިޓީ އިން އެ ބިލު ފާސްކޮށްފައި ވަނީ ބައެއް އިސްލާހުތަކާ އެކުގަ އެވެ.
އެގޮތުން މި ބިލަށް ކޮމިޓީ މަރުހަލާގައި، މާލެ ސަރަހައްދުގެ އެއްގަމު ދަތުރުފަތުރުގެ ނިޒާމާ ގުޅޭ އެންމެހާ ކަންކަން ރާވައި ހިންގުމަށް ގްރޭޓާ މާލެ ޓްރާންސްޕޯޓް އެންޑް މޮބިލިޓީ އޮފީހެއް އުފައްދަން ލާޒިމުކުރުމާއި، މާލެ ސަރަހައްދުގެ އެއްގަމު ދަތުރުފަތުރުގެ ކަންކަން ރާވައި ހިންގުމަށްޓަކައި 'ލޭންޑް ޓްރާންސްޕޯޓް މޮބިލިޓީ ފަންޑު' ގެ ނަމުގައި ފަންޑެއް އުފައްދުން ފަދަ ކަންކަން ހިމަނާފައިވެ އެވެ.
ހަމައެއާއެކު، އަމިއްލަ ފަރުދެއްގެ ނަމުގައި ނުވަތަ ރަޖިސްޓްރީކޮށްފައިވާ ގާނޫނީ ޝަހުސެއްގެ ނަމުގައި ރަޖިސްޓަރީކުރާ އެއްގަމު އިންޖީނުލީ އުޅަނދު ނުވަތަ އެއް ބާވަތެއްގެ އުޅަނދުގެ ޖުމްލަ އަދަދު 2 އަށް ވުރެ އިތުރުވާ ނަމަ އިތުރުވާ ކޮންމެ އުޅަނދެއްގެ ރަޖިސްޓަރީ ދެމެހެއްޓުމަށްޓަކާ މަލްޓިޕަލް އޯނާޝިޕް ފީއެއް ނެގުމާއި، އެއްގަމު ދަތުރުފަތުރުގައި ބޭނުންކުރާ އުޅަނދަށް 20 އަހަރުވުމުން ރަޖިސްޓްރީ ބާތިލުވާގޮތަށް އިސްލާހު ހުށަހަޅާފައިވެ އެވެ.
މި ބިލުގައި ބައެއް އުޅަނދުތަކުގެ އަހަރީ ފީތައް ބޮޑުކުރުމާއި، އުޅަނދުގައި އަމިއްލަ ނަންބަރު ޖަހާނަމަ ބޮޑު ފީއެއް ނެގުމުގެ އިތުރުން އިންޝުއަރނުކޮށް ދުއްވުމަކީ މަނާކަމެއްގެ ގޮތުގައި ކަނޑައަޅައި ޖޫރިމަނާގެ އަދަބުތަކެއް ވެސް ހިމަނާފައިވެ އެވެ. އަދި މަގުމަތީގެ ރައްކާތެރިކަމަށްޓަކައި ހެދިފައިވާ ގާނޫނުތަކާ ހިލާފުވާ އެކަމަކު ގާނޫނުގައި ވަކި އަދަބެއް ކަނޑައެޅިފައިނުވާ މީހުންނަށް ދެވޭނެ ޖޫރިމަނާގެ އަދަބުތަކެއް ކަނޑައެޅުން ހިމެނާފައިވެ އެވެ. އެގޮތުން ގަވާއިދާ ހިލާފަށް މަގު ހުރަސްކޮށްފި ނަމަ، އެ މީހަކު 100 ރުފިޔާ އިން ޖޫރިމަނާ ކުރުން ހިމެނެ އެވެ.
މީގެ އިތުރުުން، އެއްގަމު ދަތުރުފަތުރުގެ ނިޒާމު ހަރަދަނާ ގޮތެއްގައި ހިންގުމަށް މަގުފަހިކުރުމުގެ ގޮތުން އެއްގަމު ދަތުރުފަތުރުގެ ޤައުމީ ސްޓްރެޓެޖީއެއް އެކުލަވާލަން ޖެހޭނެ ކަމަށް ބިލުގައި ބުނެފައިވެ އެވެ. އަދި މި ނިޒާމު ހިންގުމުގެ މައިގަނޑު މަސްއޫލިއްޔަތު އަދާކުރަން ޖެހޭނީ، ދަތުރުފަތުރާ ގުޅުންހުރި ވުޒާރާއަކުން ކަމަށާއި ވުޒާރާއަށް ލަފާދިނުމަށް ރޯޑް ސޭފްޓީ އެންޑް ޓްރެފިކް މެނޭޖްމަންޓް އެޑްވައިޒަރީ ކޮމިޓީއެއް އެކުލަވާލަން ޖެހޭނެ ކަމަށް ވެސް ބަޔާންކޮށްފައިވެ އެވެ.
އެއްގަމު ދަތުރުފަތުރުގެ ނިޒާމުގެ ގާނޫނީ އޮނިގަނޑު ކަނޑައަޅައި، އެ ނިޒާމު ހިންގުމާ ބެހޭ ކަންކަމަށް ގިނަ ބަދަލުތަކެއް ގެނެސް ހުށަހަޅާފައިވާ މި ބިލު ފާސްކޮށްފައިވަނީ ރައްޔިތުންގެ މަޖިލީހުގެ 47 މެންބަރުންގެ ވޯޓުންނެވެ. އަދި މި ބިލާއި ދެކޮޅަށް 12 މެންބަރަކު ވޯޓު ދެއްވި އެވެ.
މި ބިލު ކޮމިޓީ މަރުހަލާގައި އޮތް އިރު، ގްރޭޓާ މާލެ ޓްރާންސްޕޯޓް އެންޑް މޮބިލިޓީ އޮފީހެއް އުފައްދަން ހުށަހަޅާފައިވަނީ މާލެ ސިޓީ ކައުންސިލަށް ލިބޭ އުޅަނދުފަހަރުގެ ފީ ސަރުކާރުގެ ބަޖެޓަށް ލިބޭނެ އިންތިޒާމެއް ހަމަޖައްސައި ދިނުމަށް މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. އަބްދުﷲ މުއްތަލިބު ރައްޔިތުންގެ މަޖިލީހުގައި އެދިވަޑައިގެންފައި ވަނިކޮށެވެ.
