މޯލްޑިވްސް ޕޯޓް ޑިވެލޮޕްމަންޓް ކުންފުނި އުފެއްދުމާއި އެ ކުންފުނީގެ މިލްކުވެރިކަމާއި ފައިނޭންސް ކުރުމާއި ގުޅޭ ކަންކަން ދިރާސާކުރުމަށް އެދި މަޖިލީހަށް ހުށަހަޅައިފި
1 އޮކްޓޯބަރު 2026 | ބުރާސްފަތި 12:40އެމްޕީއެލް، އެސްޓީއޯ އަދި އެޗްޑީސީ ގުޅިގެން އުފެއްދި ކުންފުނީގެ ގާނޫނީ އިޖުރާއަތްތަކާއި މާލީ ކަންކަން ދިރާސާކުރުމަށް މަޖިލީހުގެ އެސްއޯއީ ކޮމިޓީއަށް މާވަށު ދާއިރާގެ މެންބަރު ހުށަހަޅުއްވައިފި. މި ހުށަހެޅުމުގައި ކުންފުނި އުފެއްދުމުގައި ކޯޕަރޭޓް ގަވަނަންސް އުސޫލުތަކާ އެއްގޮތަށް އަމަލުކޮށްފައިވޭތޯ ބެލުމަށާއި، ދައުލަތުގެ މުދަލާއި ފައިސާ ހޭދަކުރުމުގައި ޖަވާބުދާރީވުމުގެ ނިޒާމުން ބޭރުވެފައިވޭތޯ ސާފުކުރުމަށް ވަނީ އެދިވަޑައިގެންފައި
މާވަށު ދާއިރާގެ މެންބަރު އަހުމަދު ޝާކިރު | ސޯޝަލް މީޑިއާ
އެމްޕީއެލް، އެސްޓީއޯ އަދި އެޗްޑީސީން ގުޅިގެން އުފައްދާފައިވާ މޯލްޑިވްސް ޕޯޓް ޑިވެލޮޕްމަންޓް ޕްރައިވެޓް ލިމިޓެޑްގެ އުފެއްދުމާއި އެ ކުންފުނީގެ މިލްކުވެރިކަމާއި ފައިނޭންސް ކުރުމާއި އަދި ހިންގުމާ ގުޅޭ ކަންކަން ދިރާސާކުރުމަށް ރައްޔިތުންގެ މަޖިލީހުގެ އެސްއޯއީ ކޮމިޓީއަށް މާވަށު ދާއިރާގެ މެންބަރު އަހުމަދު ޝާކިރު، މަޖިލީހަށް ސިޓީއެއް ހުށަހަޅައިފި އެވެ.
މެންބަރު ޝާކިރު ހުށަހެޅުއްވި މި ސިޓީގައި ވަނީ ސަރުކާރު ހިއްސާވާ ތިން ކުންފުންޏެއް އެކުވެގެން ކުންފުންޏެއް އުފެއްދުމަކީ ދައުލަތުގެ މާލިއްޔަތާއި، ކުންފުނިތައް ހިންގުމުގެ އުސޫލުތަކާއި، މަޖިލީހުގެ މުގާބަލުގައި ޒިންމާދާރުވުމާއި، ދެފުށް ފެންނަ ގޮތަށް ކަންކަން ކުރުމާ ގުޅޭ މުހިންމު ސުވާލުތަކެއް އުފެދޭ ކަމެއް ކަމަށެވެ. އަދި ކުންފުނިތަކާ ބެހޭ ގާނޫނުގައި މިފަދަ ކުންފުންޏެއް އުފެއްދޭނެ ކަމަށް ގާނޫނީ ހުއްދަ އޮތް ނަމަވެސް، މި ކަންކަމަކީ ރައްޔިތުންގެ މަޖިލީހުން ބަލަންޖެހޭ ކަންކަން ކަމަށް މެންބަރު ޝާކިރު ފާހަގަކުރެއްވި އެވެ.
މެންބަރު ޝާކިރުގެ ފޮނުއްވި ސިޓީގައި ޖުމްލަ 11 ކަމެއް ތަހުގީގު ކޮށްދިނުމަށް އެދިވަޑައިގެންފައިވެ އެވެ. އޭގެ ތެރޭގައި، އެމްޕީއެލް، އެސްޓީއޯ އަދި އެޗްޑީސީން މޯލްޑިވްސް ޕޯޓް ޑިވެލޮޕްމަންޓް ޕްރައިވެޓް ލިމިޓެޑް އުފައްދައި އިންވެސްޓްކުރުމުގައި އަމަލުކޮށްފައިވާ ގާނޫނީ އިޖުރާއަތްތަކާއި ކުންފުނިތަކުގެ ބޯޑުން ދީފައިވާ ހުއްދަތަކާއި، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އާއި، މިނިސްޓްރީ އޮފް ފައިނޭންސް ނުވަތަ ހުއްދަ ހޯދަންޖެހޭ އެހެން އިދާރާއަކުން ހުއްދަ ހޯދާފައިވޭތޯ ވަނީ ސުވާލު އުފައްދަވާފަ އެވެ.
ހަމައެއާއެކު، މި ކުންފުނި އުފެއްދުމާއި އިންވެސްޓްކުރުމަކީ ހިއްސާދާރު ތިން ކުންފުނީގެ ފާސްކޮށްފައިވާ ކޯޕަރޭޓް ޕްލޭންތަކުގައި ހިމެނޭ ކަމެއްތޯ އާއި ކޮންމެ ހިއްސާދާރު ކުންފުންޏަކުން ދީފައިވާ ނުވަތަ ދޭން އެއްބަސްވެފައިވާ ރައުސްމާލާއި މުދަލާއި ގެރެންޓީއާއި ލޯނާއި މުވައްޒަފުން އަދި އެހެނިހެން ވަސީލަތްތަކުގެ ތަފުސީލު، މި ކުންފުނި އުފެއްދުމަށް ބޯޑުތަކުން ނިންމިއިރު ބަލާފައިވާ ވިޔަފާރީގެ މަންފާއާއި ފީޒިބިލިޓީ ސްޓަޑީޒްތައް އަދި މި ކުންފުނި އުފެއްދުމުގައި ކުންފުނިތަކާ ބެހޭ ގާނޫނާއި ޕީސީބީގެ އުސޫލުތަކާއި މާލިއްޔަތު ގަވާއިދުތަކާއި ސަރުކާރު ހިއްސާވާ ކުންފުނިތަކުން އަމަލުކުރަންޖެހޭ ކޯޕަރޭޓް ގަވަނަންސް އުސޫލުތަކާ އެއްގޮތަށް އަމަލުކޮށްފައިވޭތޯ ސާފުކޮށްދިނުމަށް ވެސް އެދިވަޑައިގެންފައިވެ އެވެ.
މީގެ އިތުރުން، މެނޭޖިން ޑިރެކްޓަރާއި ބޯޑު މެންބަރުން އައްޔަނުކުރި ގޮތާއި، އެކަމުގައި މަސްލަހަތު ފުށުއަރާ އެއްވެސް ކަމެއް އޮތްތޯ އާއި އެ ކުންފުނިން މުދަލާއި ޚިދުމަތް ހޯދުމުގައި އަމަލުކުރާ އުސޫލުތަކަކީ ސަރުކާރު ހިއްސާވާ ކުންފުނިތަކެކޭ އެއްފަދަ ރައްކާތެރި އުސޫލުތަކެއްތޯ އާއި އެ ކުންފުންޏަކީ ޕީސީބީ އާއި އޮޑިޓަރ ޖެނެރަލްގެ ބެލުމުގެ ދާއިރާގެ ތެރޭގައި ހިމެނޭ ކުންފުންޏެއްތޯ އާއި މިފަދަ އޮނިގަނޑެއްގެ ދަށުން ކުންފުނި އުފެއްދުމުގެ ސަބަބުން، ދައުލަތުގެ މުދަލާއި ހޭދައާއި ދަރަންޏާއި ޕްރޮކިއުމަންޓްގެ ކަންކަން، ސަރުކާރު ކުންފުނިތަކުން ޖަވާބުދާރީވާންޖެހޭ އާންމު ނިޒާމުން ބޭރުވެފައިވޭތޯ އާއި އަދި މިހާރު ހުރި ތިން ކުންފުންޏެއް ގުޅިގެން އިތުރު ކުންފުންޏެއް އުފެއްދުމަކީ، ކުންފުނިތައް މަދުކޮށް، ހިންގުން ހަރުދަނާކުރުމަށް ސަރުކާރުން ގެންގުޅޭ ސިޔާސަތާ ފުށުއަރާ ކަމެއްތޯ ތަހުގީގު ކޮށްދިނުމަށް ވަނީ އެދިވަޑައިގެންފަ އެވެ.
ރައްޔިތުންގެ މަޖިލީހުގެ ސަރުކާރު ހިއްސާވާ ކުންފުނިތަކުގެ ކޮމިޓީ (އެސްއޯއީ ކޮމިޓީ) އަށް ފޮނުއްވައިދެއްވުމަށް އެދި ފޮނުއްވި މި ސިޓީގައި، ދައުލަތުގެ ފައިސާ ހޭދަކުރުމާ ގުޅޭ ބައިތައް މާލިއްޔަތު ކޮމިޓީން ބެލުމަށް ފޮނުއްވައިދެއްވުމަށް ވެސް މެންބަރުގެ ސިޓީގައި އެދިވަޑައިގަންނަވާފައިވެ އެވެ.
މި ތަހުގީގުން އެއްވެސް ގާނޫނަކާ ނުވަތަ މާލިއްޔަތު ގަވާއިދަކާ ނުވަތަ ކޯޕަރޭޓް ގަވަނަންސް އުސޫލަކާ ޚިލާފު ކަމެއް ފާހަގަކުރެވިއްޖެނަމަ، މަޖިލީހަށް ލިބިގެންވާ ބާރުގެ ދަށުން ފިޔަވަޅު އެޅުމަށާއި، އޮޑިޓާ ޖެނެރަލާއި އެންޓި-ކޮރަޕްޝަން ކޮމިޝަން ފަދަ އިދާރާތަކަށް ފޮނުވަންޖެހޭ ކަންކަން ފޮނުވައިދިނުމަށް ވެސް މެންބަރު ޝާކިރުގެ ސިޓީގައި އެދިވަޑައިގަންނަވާފައިވެ އެވެ.
