އީގަލްސް ހިލްސް މަޝްރޫއާ ގުޅިގެން ނުރުހުން ފާޅުކުރާ ދިވެހިން ބްލެކްލިސްޓް ކުރުމުގެ މަސައްކަތް މުއިއްޒު ސަރުކާރާ ގުޅިގެން ޔޫއޭއީން ފަށައިފި

އަބޫދާބީގެ ކުންފުންޏެއް ކަމަށްވާ އީގަލް ހިލްސް އާއެކު ރައީސް ޑރ. މުހައްމަދު މުއިއްޒުގެ ސަރުކާރުން ސިއްރުން ހެދި ޑީލުގެ އިންވެސްޓްމަންޓާ ބެހޭ ގޮތުން މީސް މީޑިއާގައި ނުހުރުން ފާޅުކުރާ ދިވެހިރައްޔިތުން ބްލެކްލިސްޓް ކުރުމުގެ މަސައްކަތް ޔޫއޭއީން ފަށައިފި އެވެ.

އިތުބާރު ހުރި މަސްދަރަކުން މި ނޫހަށް މައުލޫމާތު ދިން ގޮތުގައި ޔޫއޭއީން ވަނީ 15 ދިވެއްސެއްގެ މައުލޫމާތު ހިއްސާކުރުމަށް މުއިއްޒު ސަރުކާރުގައި އެދިފަ އެވެ.

Advertisement

"އެމީހުން (ޔޫއޭއީ) ވަނީ 15 ދިވެއްސެއްގެ އިތުރު މައުލޫމާތު ހޯދުމަށް ދިވެހި ސަރުކާރުގައި އެދިފައި،" ނަން ނުޖެހުމަށް ޝަރުތުކޮށް މައުލޫމާތު ދިން ފަރާތުން ބުންޏެވެ.

ދިވެހި ރައްޔިތުންގެ ބޯހިޔާވަހި ކަމުގެ މައްސަލަ ހައްލުކުރަން ކަމަށް ބުނެ، ރައްޔިތުންގެ ޓެކްސް ފައިސާއިން ހިއްކި ރަސްމާލޭގެ 500 ހެކްޓަރުގެ ބިޔަ ސަރަހައްދެއް އަބޫދާބީގެ ކުންފުންޏަކަށް ދިން ޚަބަރު ކުއްލި ގޮތަކަށް ފެންމަތިވުމާ ގުޅިގެން ދިވެހި ރައްޔިތުންގެ މެދުގައިވަނީ ބޮޑު ނުތަނަވަސް ކަމެއް އުފެދިފަ އެވެ. އެއާއެކު މީސް މީޑިއާގައި ގިނަ ބަޔަކު ގެންދަނީ ވަރަށް ބޮޑަށް ނުރުހުން ފާޅުކުރަމުންނެވެ. ނުރުހުން ފާޅުކުރަމުން ގެންދާ ފަރާތްތަކުގެ ތެރޭގައި ސިޔާސީ ދާއިރާގެ ފަރާތްތަކާއި، ދީނީ އިލްމްވެރިންނާއި، ރައްޔިތުންގެ މަޖިލީހުގެ މެމްބަރުންނާއި، އަދި ގިނަ އަދަދެއްގެ އާންމުން ހިމެނެ އެވެ.

މި މަޝްރޫއާ ގުޅޭ ގޮތުން އަބޫދާބީގެ ކުންފުނިން އިންވެސްޓް ކުރާ އަދަދަކީ  12 ބިލިއަން ޑޮލަރު ކަމަށް އެ ކުންފުންޏާ ހަވާލާދީ ބޭރުގެ އެތައް މީޑިއާއެއްގައި ރިޕޯޓުކޮށްފައިވެ އެވެ.

ވެރިރަށް މާލެއާ ގާތްގަނޑަކަށް 20 މިނެޓުގެ ދުރުމިނުގައި އޮތް ރަސްމާލޭގެ 5.2 މިލިއަން އަކަމީޓަރުގެ ސަރަހައްދެއްގައި ހިންގާ މި މަޝްރޫއަކީ އެކި ބޭނުންތަކަށް ބޭނުންކުރެވޭ ގޮތަށް ފަރުމާކޮށްފައިވާ މަޝްރޫއެއް ކަމަށް އެ ކުންފުނިން ވަނީ ބުނެފަ އެވެ.

އަޑި ނޭނގޭ މި ޑީލްގެ ދަށުން އީގަލް ހިލްސްގެ އިތުރުން ދުބާއީގެ އީމާރު ޕްރޮޕަޓީޒްގެ ވެސް އިސްވެރިޔާ މުހައްމަދު އަލައްބާރު ވިދާޅުވި ގޮތުގައި، މި މަޝްރޫއުގައި އީމާރު ކުންފުނިން ބައިވެރިވުމުގެ ފުރުސަތު އެބައޮތެވެ. ފަސް އަވަށަކަށް ބަހާލައިގެން ކުރިއަށްގެންދާ މި މަޝްރޫއުގެ ދަށުން އެތައް ހާސް ރެސިޑެންޝަލް ޔުނިޓްތަކާއި، ހޮޓާތަކާއި، ރިސޯޓުތަކާއި، ފިހާރަތަކުގެ އިތުރުން ސްކޫލްތަކާއި، ކްލިނިކްތަކާއި، ވޯޓާ ޕާކެއް އަދި މެރީނާއެއް ތަރައްގީކުރާނެ ކަމަށް ބުނެ އެވެ. މި ޕްރޮޕަޓީތަކަކީ ބޭރުގެ ފަރާތްތަކަށް މިލްކުކުރެވޭ ޕްރޮޕަޓީތަކެއް ކަމަށް ވެސް ކުންފުނިން ބުނެފައިވެ އެވެ.

މި މަޝްރޫއަށް އަބޫދާބީ ކުންފުނިން އިންވެސްޓް ކުރަނީ 12 ބިލިއަން ޑޮލަރު ކަމަށް ބުނާއިރު، މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް ޑރ. އަބްދުﷲ މުއްތަލިބު އާއި ފިނޭންސް މިނިސްޓަރ ހަސަން ޒަރީރު ވިދާޅުވަނީ މިއީ 20 ބިލިއަން ޑޮލަރުގެ މަޝްރޫއެއް ކަމަށެވެ. ދެ ފަރާތުން ހާމަކުރާ އަދަދުގައި 8 ބިލިއަން ޑޮލަރުގެ ބޮޑު ފަރަގެއް ހުރިކަން ވަނީ ފާހަގަކުރެވިފަ އެވެ.

ރަސްމާލޭ ގައި ހިންގާ މި މަޝްރޫއުގެ މައިގަނޑު މަގްސަދަކީ ރާއްޖޭގެ ފަތުރުވެރިކަމުގެ މޮޑެލް ބަދަލުކޮށްލުން ކަމަށާއި، އެގޮތުން އެންމެ ރިސޯޓެއްގައި މަދު ދުވަސްކޮޅަކު މަޑުކުރުމުގެ ބަދަލުގައި، ގަލްފު ގައުމުތަކާއި، ޔޫރަޕް އަދި އިންޑިއާގެ މުއްސަނދި އާއިލާތަކާއި ރިޓަޔާކޮށްފައިވާ ފަރާތްތަކުން ގިނަ ހަފުތާތަކެއް ނުވަތަ މަސްތަކެއް ވަންދެން ރާއްޖޭގައި މަޑުކުރާނެ މާހައުލެއް ގާއިމުކުރުން ހިމެނޭ ކަމަށް އީގަލް ހިލްސް އިން ބުނެފައިވެ އެވެ.

މިނިސްޓަރު ޑރ. އަބްދުﷲ މުއްތަލިބު ވިދާޅުވި ގޮތުގައި، ހުރިހާ ފޭސްތަކެއް ނިމޭއިރު 20 ބިލިއަން ޑޮލަރަށް އަރާނެ މި މަޝްރޫއުގެ ސަބަބުން، އަހަރަކު އިތުރު އެއް މިލިއަން ފަތުރުވެރިން ރާއްޖެއަށް ޒިޔާރަތްކޮށް، އަހަރަކު 2 ބިލިއަން ޑޮލަރުގެ އާމްދަނީއެއް ފަތުރުވެރިކަމުން ލިބޭނެ އެވެ. މި މަޝްރޫއަށް ދިވެހި ސަރުކާރުން ބިން ފޯރުކޮށްދީފައިވާއިރު، މުއްތަލިބު ވިދާޅުވެފައިވަނީ މަޝްރޫއުގައި ސޮއިކުރި އިރު އެއްވެސް ފައިސާ އެއް ދައުލަތައް ނުލިބޭ ކަމުގަ އެވެ.

މި މަޝްރޫއުގެ ދަށުން އީގަލް ހިލްސް އިން ވަނީ ފުރަތަމަ މަރުހަލާގައި 5,000 ސޯޝަލް ހައުސިންގ ޔުނިޓް ބިނާކުރުމަށް 500 މިލިޔަން ޑޮލަރު ޚަރަދުވާނެ ކަމަށް ބުނެފަ އެވެ. އަދި މިއީ މަޝްރޫއުން ސަރުކާރަށް ކުރިމަގުގައި ލިބޭ ފައިސާ އިން އުނިކުރާ ގޮތަށް ޚަރަދު ކުރާ އެއްޗެއް ކަމަށް ރިޕޯޓުތައް ބުނެ އެވެ.

މި މަޝްރޫއުގެ ސަބަބުން 40,000 އަށްވުރެ ގިނަ ވަޒީފާ އުފެދޭނެ ކަމަށް ބެލެވޭ ކަމަށް އަބޫދާބީ ކުންފުނިން ބުނެފައިވާއިރު ސަރުކާރުން ބުނެފައިވަނީ 54،000 ވަޒީފާ އުފެދޭނެ ކަމަށެވެ. މި އަދަދުތަކުގައި ވެސް ބޮޑެތި ތަފާތުތައް ހުރި އިރު، މީގެ އިތުރުން މިއީ ރާއްޖޭގެ ޓެކްސްގެ ނިޒާމަށް ވެސް ބޮޑު ކުރިއެރުމެއް ލިބޭނެ ކަމެއް ކަމަށް ވަނީ ބުނެފަ އެވެ. އަލައްބާރު ވިދާޅުވި ގޮތުގައި މަޝްރޫއުގެ މަސައްކަތްތައް ކުރިއަށްދާނީ މާކެޓުގެ ޑިމާންޑަށް ބަލައި މަރުހަލާތަކަކަށް ބަހާލައިގެންނެވެ. އެހެން ކަމުން މަޝްރޫއުގެ ސަބަބުން ލިބޭނެ ކަމަށް ސަރުކާރުން ބުނާ ފައިދާ އަކީ ކޮން ދުވަހަކުން ލިބޭނެ އެއްޗެއް ކަމެއްވެސް ސާފެއް ނުވެ އެވެ.

މަޝްރޫއާ މެދު ކަންބޮޑުވާ ފަރާތްތަކުން ބުނަމުންދަނީ މިއީ އަޑިނޭނގޭ މަޝްރޫއުއެއް ކަމަށާއި، މި މަޝްރޫއުގެ ސަބަބުން ނިމުމެއް ނެތް ގޮތަށް ބޭރު ބައެއްގެ އަތްމައްޗަށް ދިވެހިރާއްޖޭގެ ބޮޑު ސަރަހައްދެއް ދާނެ ކަމުގަ އެވެ. އަދި ބޭރުގެ ގައުމުތަކުގެ މީހުންނަށް މި މަޝްރޫއުގެ ސަބަބުން ރާއްޖޭގައި ވަޒަންވެރިވުމުގެ ފުރުސަތު ލިބޭތީ ރާއްޖޭގައި އެހެން ދީންތަކަށް ފުރުސަތު ހުޅުވިގެންދާނެ ކަމުގެ ކަންބޮޑުވުންވެސް ދަނީ ފާޅު ކުރަމުންނެވެ.

މަޝްރޫއާ ބެހޭ ގޮތުން ކަންބޮޑުވުން ފާޅުކުރާ ދިވެހި ރައްޔިތުން، މުއިއްޒު ސަރުކާރާ ގުޅިގެން ބްލެކްލިސްޓް ކުރާ ޚަބަރު ފެތުރުމާ ގުޅިގެން ފޮރިން މިނިސްޓްރީގެ ބަހެއް ހޯދުމަށް ކުރި މަސައްކަތް އަދި ވަނީ ކާމިޔާބު ނުވެފަ އެވެ.