ހަށިގަނޑުގައި ރައްކާކޮށްގެން ރާއްޖެއަށް މަސްތުވާތަކެތި އެތެރެކުރި ނޭޕާލްގެ ދެ މީހުން ހައްޔަރުކޮށްފި
28 ސެޕްޓެމްބަރު 2026 | ހޯމަ 09:53ހަށިގަނޑުގައި ފޮރުވައިގެން 1.5 ކިލޯއަށްވުރެ ގިނަ މަސްތުވާތަކެތި އެތެރެކުރި ނޭޕާލްގެ ދެ މީހަކު ފުލުހުން ވަނީ ހައްޔަރުކޮށްފައި. މި މަހުގެ 25 ވަނަ ދުވަހު އަތުލައިގަތް މި މީހުންގެ އަތުން 142 ބުލެޓް ފެނިފައިވާއިރު، ކޯޓުން ވަނީ އެ މީހުންގެ ބަންދަށް 30 ދުވަސް ޖަހާފައި. ފުލުހުން މިހާރު ދަނީ މި މައްސަލަ އިތުރަށް ތަހުގީގު ކުރަމުން
ރާއްޖެއަށް މަސްތުވާތަކެތި ސްމަގަލްކޮށް އެ ތަކެތި ޓްރެފިކްކުރާ ކަމަށް ތުހުމަތުކުރެވޭ މައްސަލައާ ގުޅިގެން ހައްޔަރުކުރި ނޭޕާލްގެ ދެ މީހުން | މޯލްޑިވްސް ޕޮލިސް ސާރވިސް
ހަށިގަނޑުގައި ރައްކާކޮށްގެން ރާއްޖެއަށް މަސްތުވާތަކެތި އެތެރެކޮށް އެ ތަކެތި ޓްރެފިކްކުރާ ކަމަށް ތުހުމަތުކުރެވޭ މައްސަލައަކާ ގުޅިގެން ނޭޕާލްއަށް ނިސްބަތްވާ ދެ މީހުން ހައްޔަރުކޮށްފި އެވެ.
ފުލުހުން ބުނީ، މި މައްސަލައާ ގުޅިގެން ނޭޕާލް އަށް ނިސްބަތްވާ އެ މީހުން ހައްޔަރުކުރީ ރާއްޖެއައި އިރު ހަށިގަނޑުގައި މަސްތުވާތަކެތި ރައްކާކޮށްފައި ހުރިކަމަށް ތުހުމަތުކުރެވޭ މައްސަލައަކާ ގުޅިގެން ކަމަށެވެ. އަދި އެމީހުން ހައްޔަރުކުރީ މި ހިނގާ ސެޕްޓެމްބަރު މަހުގެ 25 ވަނަ ދުވަހު ކަމަށް ފުލުހުން ބުނެ އެވެ.
އެއީ 47 އަހަރުގެ ނިއްކަ ތަމަންގް ނަމަކަށް ކިޔާ ފިރިހެނަކާއި، 40 އަހަރުގެ އީތްރާނީ ގަލެ ނަމަކަށް ކިޔާ އަންހެނެއް ކަމަށް ފުލުހުން ބުނެ އެވެ.
ފުލުހުން ބުނީ، އެ ދެ މީހުން ހައްޔަރުކޮށް ބަލައިފާސްކުރިއިރު 142 ބުލެޓް ފެނިފައިވާ ކަމަށެވެ. މި ތަކެތީގެ ވަގުތީ ބަރުދަން 1.5 ކިލޯއަށްވުރެ ގިނަ އެވެ.
މީގެ އިތުރުން ފުލުހުން ބުނީ، މި މައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 30 ދުވަހަށް ބަންދުކުރުމަށް އަމުރުކޮށްފައިވާ ކަމަށެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
