ސަރވިސް ޗާޖު ދިވެހި ރުފިޔާއިން ދެމުންދާތީ އެކަމުގެ ކަންބޮޑުވުން ފާޅުކުރައްވާ މެންބަރު ކުޑޫގެ ސިޓީއެއް އަބްދުއްރަހީމްއަށް!
27 ސެޕްޓެމްބަރު 2026 | އާދީއްތަ 11:07ފަތުރުވެރިކަމުގެ ދާއިރާގެ މުވައްޒަފުންނަށް ސާވިސް ޗާޖު ޑޮލަރުން ދިނުން ލާޒިމުކުރުމަށް ވަޒީފާއާ ބެހޭ ގާނޫނަށް ހުށަހަޅާފައިވާ އިސްލާހުގެ މަސައްކަތް އަވަސްކޮށްދިނުމަށް މެންބަރު މުހައްމަދު އިބްރާހީމް އެދިވަޑައިގެންފި. މި ބިލު މިހާރު ކޮމިޓީ މަރުހަލާގައި އޮތްއިރު، ސަރވިސް ޗާޖު ދިވެހި ރުފިޔާއިން ދެމުންދާތީ މުވައްޒަފުންގެ ހުރި ކަންބޮޑުވުންތަކަށް ހައްލެއް ހޯދުމަށް މަޖިލީހުގެ ރައީސަށް ވަނީ ސިޓީއެއް ފޮނުއްވާފައި
ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) | ރައްޔިތުންގެ މަޖިލިސް
ސަރވިސް ޗާޖު ދިވެހި ރުފިޔާއިން ދެމުންދާތީ އެކަމުގެ ކަންބޮޑުވުން ފާޅުކުރައްވާ، ވަޒީފާއާ ބެހޭ ގާނޫނަށް ހުށަހަޅާފައިވާ އިސްލާހުގެ ބިލު ވީއެންމެ އަވަހަކަށް ނިންމަވައިދެއްވުމަށް އެދިވަޑައިގެން ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ސިޓީއެއް ފޮނުއްވައިފި އެވެ.
މެންބަރު ކުޑޫ ފޮނުއްވި މި ސިޓީގައި ވަނީ ދިވެހިރާއްޖޭގެ ފަތުރުވެރިކަމުގެ ސިނާއަތުގައި މަސައްކަތް ކުރަމުންދާ އެތައް މުވައްޒަފުންނަށް ލިބެން ޖެހޭ ސަރވިސް ޗާޖުގެ ހައްގު އެންމެ ފުރިހަމަ ގޮތުގައި ލިބިދިނުމަށް ހުރަސްއެޅޭ ގޮތަށް އަމަލުކުރަން ގަސްދުކުރާކަމުގެ ކަންބޮޑުވުން އެ ދާއިރާގައި މަސައްކަތް ކުރަމުންދާ މުވައްޒަފުން ފާޅުކުރަމުންދާ ކަމަށެވެ.
ވަޒީފާއާ ބެހޭ ގާނޫނުގައި ފަތުރުވެރިކަމުގެ ސިނާއަތުގައި ހިންގާ ވިޔަފާރިތަކުން ފޯރުކޮށްދޭ ކޮންމެ ހިދުމަތަކުން 10 އިންސައްތަ އަށްވުރެ މަދުނޫން އަދަދަކުން ސަރވިސް ޗާޖް ނަގަންވާނެ ކަމަށާއި ސަރވިސް ޗާޖު ގޮތުގައި ނަގާ ފައިސާ އެ ނެގި ބާވަތަކުން މުވައްޒަފުންނަށް ހަމަހަމަކަމާއެކު ބަހަން ޖެހޭނެކަން ގަނޫނުގައި ބަޔާންކޮށްފައިވާ ކަމާއި އަދި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު 9 ޑިސެންބަރު 2025 ގައި ވަޒީފާއާ ބެހޭ ގާނޫނަށް އިސްލާހެއް ހުށަހަޅާފައިވާކަން ފާހަގަކުރެއްވި އެވެ.
މެންބަރު ކުޑޫ ވިދާޅުވީ، މި ބިލުގެ ފުރަތަމަ ކިޔުން 10 ފެބްރުއަރީ 2026 ގައި މަޖިލީހުގައި އިއްވުމަށްފަހު 22 އެޕްރީލް 2026 ގައި ބިލުގެ ބަހުސް ކުރިއަށް ގެންގޮސް ހަމަ އެ ދުވަހު އެ ބިލު ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީއަށް ދިރިސާ ކުރުމަށް ފޮނުވާފައިވާ ކަމަށެވެ.
އެހެންކަމުން، ކޮމިޓީ މަރުހަލާގައި މި ބިލުގެ މަސައްކަތް ވީއެންމެ އަވަހަކަށް ނިންމަވައި، މަޖިލީހުގެ ތަޅުމުން މި ބިލާއި މެދު ގޮތެއް ނިންމަވައިދެއްވުމަށް މެންބަރު ކުޑޫ ފޮނުއްވި ސިޓީގައި އެދިވަޑައިގެންފައިވެ އެވެ.
