ސިނަމާލެ ބްރިޖަށް އުރުނު ދެ ބޯޓުގެ މައްސަލަ ބަލާ ފިޔަވަޅު އަޅައިދިނުމަށް މެންބަރު ކުޑޫގެ ސިޓީއެއް އަބްދުއްރަހީމްއަށް
12 ސެޕްޓެމްބަރު 2026 | ހޮނިހިރު 09:05ސިނަމާލެ ބްރިޖަށް ދެ އުޅަނދެއް އުރުނު މައްސަލައިގައި ކަމާބެހޭ އިދާރާތައް މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއަށް ހާޒިރުކޮށްދިނުމަށް މެންބަރު މުހައްމަދު އިބްރާހީމް އެދިވަޑައިގެންފި. މި މައްސަލައިގައި ގައުމީ ސަލާމަތަށް ނުރައްކާވާ ފަދަ ކަންތައްތަކެއް ހުރިކަން ފާހަގަކުރައްވައި، އުޅަނދުތައް ރާއްޖެ އެތެރެވުމުގައި އިހުމާލުވި ފަރާތްތަކާއި ބްރިޖަށް ލިބުނު ގެއްލުމުގެ ބަދަލު ހޯދުމާ ގުޅޭގޮތުން ސުވާލުކުރުމަށް ވަނީ ހުށަހަޅާފައި
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) | ރައްޔިތުންގެ މަޖިލިސް
ސިނަމާލެ ބްރިޖަށް އުރުނު ދެ ބޯޓުގެ މައްސަލަ ބަލާ ފިޔަވަޅު އަޅުއްވައިދެއްވުމަށް އެދިވަޑައިގެން ރައްޔިތުންގެ މަޖިލީހުގެ ގަލޮޅު އުތުުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ފޮނުއްވައިފި އެވެ.
މެންބަރު ކުޑޫ ފޮނުއްވި މި ސިޓީގައި ވަނީ 11 ސެޕްޓެމްބަރުގެ ރޭގެ ވަގުތެއްގައި، މާލެ ކައިރިން އޮޔާ ގޮސް ސިނަމާލެ ބްރިޖަށް އުރުނު ދެ ބޯޓުގެ މައްސަލައަކީ ދިވެހިރާއްޖޭގެ ގައުމީ ސަލާމަތާއި ރައްކާތެރިކަމާ މެދު ބޮޑެތި ސުވާލުތަކާއި ކަންބޮޑުވުންތަކެއް އުފެދޭ ކަމެއް ކަމަށް ބުނެ، މި މައްސަލައާ ގުޅިގެން ސަރުކާރުގެ ކަމާބެހޭ އިދާރާތައް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއަށް ހާޒިރުކޮށް ކަންކަން ސާފުކޮށްދިނުމަށް އެދިވަޑައިގެންފަ އެވެ.
އެގޮތުން މި ދެ ބޯޓު ރާއްޖޭގެ ސަރަހައްދަށް އޭޕްރީލް 26 ވަނަ ދުވަހު ވަދެފައިވަނީ ސަރުކާރުގެ އެއްވެސް އިދާރާއެއްގެ ހުއްދައަކާ ނުލާ ކަމަށް މައުލޫމާތު ލިބޭ ކަމަށާއި މި އުޅަނދުތައް ކަމާބެހޭ ފަރާތްތަކަށް ފާހަގަކުރެވިފައިވަނީ މެއި މަހުގެ 3 ވަަނަ ދުވަހު ކަަމަށް ވުމުން، މިފަދަ ނުރައްކާތެރި ހާލަތެއް މެދުވެރިވާން ދިމާވި ސަބަބުތަކާއި އިހުމާލުވި ފަރާތްތަކަކީ ކޮބައި ކަމާއި އެފަރާތްތަކަށް ފިޔަވަޅު އެޅިފައިވޭތޯ ސާފުކުރުމަށް މެންބަރު ކުޑޫ ވަނީ އެދިވަޑައިގެންފައި އެވެ.
ހަމައެއާއެކު ދެ ބޯޓުގެ ފަޅުވެރިން ހާލުގައި ޖެހިފައިވާތާ 5 މަސް ދުވަސް ވެފައިވާ ކަމަށާއި، އެ ފަރާތްތަކުގެ ކަންބޮޑުވުންތައް ސޯޝަލް މީޑިއާ މެދުވެރިކޮށް ހާމަކޮށްފައިވާއިރު، މިހާތަނަށް ހައްލެއް ހޯދިފައި ނުވަނީ ކީއްވެގެންތޯ އަދި އުޅަނދުތަކުގެ ސަލާމަތީ ހާލަތު ދެނެގަތުމަށް ކަމާ ބެހޭ އިދާރާތަކުން މަސައްކަތެއް ކޮށްފައިވޭތޯ ސާފުކުރުމަށް މެންބަރު ކުޑޫ އެދިވަޑައިގެންފައިވެ އެވެ.
މީގެ އިތުރުން، ސިނަމާލެ ބްރިޖަކީ އެކަށީގެންވާ ގޮތެއްގައި އިންޝުއަރ ކުރެވިފައިވާ ތަނެއް ތޯ އަދި މި ހާދިސާގެ ސަބަބުން ލިބުނު ގެއްލުންތަކަށް ބަދަލު ހޯދުމުގެ އިންތިޒާމުތައް ހަމަޖެހިފައިވާ މިންވަރު ސާފުކޮށްދިނުމަށް ވަނީ އެދިވަޑައިގެންފަ އެވެ.
މި ހާދިސާއަކީ ބުރާސްފަތި ދުވަހުގެރޭ މާލެއަށް ކުރި ގަދަ ވިއްސާރައިގައި ތެޔޮ އުފުލާ ބާޖަކާއި ޓަގު ބޯޓެއް އޮޔާގޮސް ސިނަމާލެ ބްރިޖުގެ ތަނބެއްގައި ޖެހިގެން ހިނގި ހާދިސާއެކެވެ. މި ދެ އުޅަނދު އޮޔާދިޔައީ މާލެ ސަރަހައްދަށް ކުރި ވިއްސާރައިގައި އައި ބާރުގަދަ ކޮޅިގަނޑެއްގައި ނަގިލި ކަނޑައިގެން ދިއުމުގެ ސަބަބުން ކަމަށް މައުލޫމާތު ލިބެ އެވެ.
