ހިންމަފުށީ ރިހެބިލިޓޭޝަން ސެންޓަރުގެ ހާލަތު ދަށްވެ، ފަރުވާގެ ފެންވަރާއި ވަސީލަތްތަކާ ގުޅޭގޮތުން މިނިސްޓަރު އިހުސާންއާ ސުވާލުކޮށްފި
8 އޯގަސްޓު 2026 | ހޮނިހިރު 06:08ހިންމަފުށީ ރިހެބިލިޓޭޝަން ސެންޓަރުގެ ހާލަތު ދަށްވެ، އެތަނުން ދޭ ފަރުވާގެ ފެންވަރާއި ވަސީލަތްތަކާ ގުޅޭގޮތުން ހޯމް މިނިސްޓަރާ ސުވާލުކުރުމަށް މަޖިލީހަށް ވަނީ ހުށަހަޅާފައި. އެގޮތުން މަރުކަޒުގެ ސާފުތާހިރުކަމާއި ކާބޯތަކެތީގެ ފެންވަރާއި ބައިނަލްއަގުވާމީ މިންގަނޑުތަކަށް ފެތޭ ފަރުވާގެ ނިޒާމެއް އޮތްތޯ ސާފުކުރުމަށް މެންބަރު މުހައްމަދު އިބްރާހީމް ވަނީ އެދިވަޑައިގެންފައި
މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން މަޖިލީހުގައި | މަޖިލިސް
ކ. ހިންމަފުށީގައި ހުންނަ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރުގެ ހާލަތު ގޯސްވެ، އެތަނުން ފަރުވާ ހޯދާ ފަރާތްތަކުގެ އިންސާނީ ކަރާމާތަށް އުނިކަން އަންނަ ކަމަށް ބުނެ، މިނިސްޓަރ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޮލޮޖީ އަލީ އިޙްސާންއާ ސުވާލުތަކެއް ކުރިމަތިކޮށްފި އެވެ.
މިކަމާ ގުޅިގެން ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ) ވަނީ މިނިސްޓަރާ ކުރިމަތިކުރައްވާނެ ސުވާލުތައް ހިމެނޭ ސިޓީއެއް މަޖިލީހުގެ އިދާރާއަށް ހޮނިހިރު ދުވަހު ފޮނުއްވާފަ އެވެ.
މެންބަރު ކުޑޫ މިނިސްޓަރާ ކުރައްވާ ސުވާލުތަކުގެ ތެރޭގައި، ރާއްޖޭގައި ގާއިމްކޮށްފައިވާ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރުތަކުގެ އިމާރާތްތަކާއި ވަސީލަތްތަކުގެ ހާލަތު ހުރި ގޮތް ސާފުކުރުން ހިމެނެ އެވެ. ޚާއްސަކޮށް ބަލިމީހުން ބޭތިއްބުމަށް އެކަށީގެންވާ ސާފުތާހިރު މާހައުލެއް އެ ތަންތަނުގައި އޮތްތޯއާއި މިހާރު ދެމުންދާ ފަރުވާގެ ޕްރޮގްރާމްތަކަކީ އެކަށީގެންވާ ފެންވަރެއްގެ ޕްރޮގްރާމްތަކެއްތޯ މެންބަރު ވަނީ ސުވާލު އުފައްދަވާފަ އެވެ. މީގެ އިތުރުން، އެ ސެންޓަރުތަކުގައި މަސައްކަތްކުރާ މެޑިކަލް ސްޓާފުންނާއި ކައުންސިލަރުންގެ އަދަދު އެކަށީގެންވާ މިންވަރަށް އެބަތިއްބެވިތޯ ވެސް ސާފުކުރެއްވުމަށް ވަނީ ހުށަހަޅުއްވާފަ އެވެ.
މަރުކަޒުތަކުގައި ފަރުވާ ހޯދަމުންދާ ފަރާތްތަކަށް ފޯރުކޮށްދޭ ކާބޯތަކެތީގެ ފެންވަރާއި ފާހަނާ އަދި ނިދާ ކޮޓަރިތަކުގެ ހާލަތު ރަނގަޅު ކުރުމަށް ކުރެވެމުންދާ މަސައްކަތްތަކާ ގުޅޭގޮތުން ވެސް މިނިސްޓަރާ ސުވާލު ކުރެއްވުމަށް ވަނީ ނިންމަވާފަ އެވެ. އަދި ސެންޓަރުތަކުގެ ހާލަތު ރަނގަޅު ކުރުމަށް އެއްވެސް އައު މަޝްރޫއެއް ރޭވިފައިވޭތޯ ނުވަތަ މިހާރު ކުރިއަށްދޭތޯ ބެއްލެވުމަކީ ވެސް މެންބަރުގެ ސުވާލުތަކުގެ ތެރޭގައި ހިމެނޭ ކަމެކެވެ.
މެންބަރުގެ ސިޓީގައި ފާހަގަކުރައްވާފައިވާ ގޮތުގައި، މިހާރު ދެމުންދާ ފަރުވާއަކީ ޒަމާނީ ސައިންސްގެ އަލީގައި ބިނާވެފައިވާ ފަރުވާއެއް ނޫން ކަމަށާއި، މިކަމުގެ ސަބަބުން ބަލިމީހުންނަށް ލިބެންޖެހޭ ހައްގުތަކަށް އުނިކަން އަންނަ ކަމުގެ ޝަކުވާތައް ލިބެމުންދެ އެވެ. އެހެންކަމުން، ބައިނަލްއަގުވާމީ މިންގަނޑުތަކަށް ފެތޭ، ނަފްސާނީ ފަރުވާ އާއި އިޖުތިމާއީ ދިރިއުޅުމަށް އަހުލުވެރިކުރުވުން ހިމެނޭ ފަރުވާގެ ނިޒާމެއް ގާއިމްކުރުމަށް ކުރެވޭ މަސައްކަތްތަކާ ގުޅޭގޮތުން މިނިސްޓަރު ޖަވާބުދާރީވާން ޖެހޭނެ ކަމަށް މެންބަރު ވިދާޅުވެފައިވެ އެވެ.
މީގެ އިތުރުން، މަރުކަޒުތަކުގައި މަސައްކަތްކުރާ މުވައްޒަފުންނަށް ބޭނުންވާ ތަމްރީނާއި ގާބިލްކަން އިތުރުކުރުމަށް ކުރެވޭ މަސައްކަތްތަކާއި، ފަރުވާ ދިނުމުގައި ބޭނުންކުރާ އުސޫލުތައް ލިޔުމުން ފެންނަން ހުރިތޯ ވެސް މެންބަރު ވަނީ ސުވާލު ކުރައްވާފަ އެވެ. މަސްތުވާތަކެއްޗާ ބެހޭ ގާނޫނާއި ބައިނަލްއަގުވާމީ އިންސާނީ ހައްގުތަކުގެ މިންގަނޑުތަކަށް ފެތޭ ގޮތަށް ފަރުވާގެ ކަންކަން ކުރިއަށް ގެންދިއުމަކީ ކޮންމެ މީހަކަށްމެ ލިބިގެންވާ ހައްގެއްކަން މެންބަރު ފާހަގަކުރައްވާފައިވެ އެވެ.
މިނިސްޓަރާ ސުވާލުކުރުމަށް ހުށަހަޅާފައިވާ މި މައްސަލައަކީ އަވަސް ހައްލެއް ބޭނުންވާ މުހިންމު ކަމެއް ކަމަށް މެންބަރު ކުޑޫ ވިދާޅުވި އެވެ.
