ރައީސް ޔާމީން ފުލުހަށް ހާޒިރުކުރުމަށް ޗިޓު ހަވާލުކުރަން މަސައްކަތްކޮށްފި
8 ސެޕްޓެމްބަރު 2026 | އަންގާރަ 05:13އިތުބާރުހުރި މަސްދަރަކުން ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި ރައީސް ޔާމީން ފުލުހަށް ހާޒިރުކުރުމަށް ޗިޓު ހަވާލު ކުރުމަށް މަސައްކަތްކޮށްފައި ވަނީ ހޯމަ ދުވަހުގެ ރޭގެ ވަގުތެއްގައި. އެގޮތުން ފުލުހުން ވަނީ ރައީސް ޔާމީން އަށް ގުޅުއްވައި، ޗިޓު ހަވާލު ކުރުމަށް މަސައްކަތްކޮށްފައި. ނަމަވެސް، ރައީސް ޔާމީން ޗިޓާ ހަވާލުވެވަޑައިގަންނަވާފައި ނުވާ ކަމަށް މައުމޫލާތު ލިބިފައިވޭ
މީގެ ކުރިން ޖަލު ހުކުމެއްގައި ހުންނެވި ދުވަސްވަރު، ރައީސް ޔާާމީން ފުލުހުންގެ ބެލުމުގެ ދަށުން ވަޑައިގަންނަވަނީ | ސަން އޮންލައިން
ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ފުލުހަށް ހާޒިރުކުރުމަށް، އެމަނިކުފާނަށް ޗިޓު ހަވާލު ކުރުމަށް މަސައްކަތްކޮށްފި އެވެ.
އިތުބާރުހުރި މަސްދަރަކުން ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި ރައީސް ޔާމީން ފުލުހަށް ހާޒިރުކުރުމަށް ޗިޓު ހަވާލުކުރުމަށް މަސައްކަތްކޮށްފައި ވަނީ ހޯމަ ދުވަހުގެރޭގެ ވަގުތެއްގަ އެވެ. އެގޮތުން ފުލުހުން ވަނީ ރައީސް ޔާމީން އަށް ގުޅުއްވައި، ޗިޓު ހަވާލު ކުރުމަށް މަސައްކަތްކޮށްފަ އެވެ. ނަމަވެސް، ރައީސް ޔާމީން ޗިޓާ ހަވާލުވެވަޑައިގަންނަވާފައި ނުވާ ކަމަށް މައުމޫލާތު ލިބިފައިވެ އެވެ.
ފުލުހުން ރައީސް ޔާމީން އަށް ޗިޓު ހަވާލު ކުރަން މަސައްކަތްކޮށްފައި ވަނީ ހައުސިން މިނިސްޓްރީ ހިމެނޭހެން، ސަރުކާރުގެ ތިން އިދާރާއެއް ހިންގަމުން އައި އިމާރާތުގައި އަލިފާން ރޯވި މައްސަލައިގައި ރައީސް ޔާމީން ދެއްކެވި ވާހަކަފުޅެއްގެ ސަބަބުންނެވެ. އެގޮތުން ޕީއެންއެފް އިން ބޭއްވި ޖަލްސާއެއްގައި ރައީސް ޔާމީން ވިދާޅުވެފައި ވަނީ، ހައުސިން މިނިސްޓްރީގައި އަލިފާން ރޯކޮށްލީ ކަމަށާއި، އެކަން ކުރެއްވީ ރައީސް މުއިއްޒުއާ ގާތް ނުވަތަ އަރިސް ބޭފުޅެއްކަން ފުލުހުންނަށް އެނގޭނެ ކަމަށެވެ.
ރައީސް ޔާމީންގެ އެ ތުހުމަތުތަކާ ގުޅިގެން އެމަނިކުފާނަށް އެނގިވަޑައިގަންނަވާ މައުލޫމާތު ސާފުކުރެއްވުމާއި، ތަހުގީގުގައި އިތުރަށް ބަލަން ޖެހޭ ކަމެއް ހުރި ނަމަ، އެކަން ބެއްލެވުމަށް ހޯމް މިނިސްޓަރު އަލީ އިހުސާން ވަނީ ފުލުހުންނަށް އަންގަވައިފަ އެވެ. އަދި ފުލުހުންގެ މައްޗަށް ރައީސް ޔާމީން ކުރައްވާފައިވާ ތުހުމަތު ތަހުގީގުކޮށް ދިނުމަށް ނޭޝަނަލް އިންޓެގްރިޓީ ކޮމިޝަން އަށް ދަންނަވާފައިވާ ކަމަށް އިހުސާން ވިދާޅުވެފައިވެ އެވެ.
ހައުސިން މިނިސްޓްރީގައި ރޯކޮށްލީ ރައީސް މުއިއްޒުގެ އަރިސް ބޭފުޅެއްކަން ފުލުހުންނަށް އެނގޭނެ ކަމަށް ރައީސް ޔާމީން ވިދާޅުވެފައިވާއިރު، ހޯމަ ދުވަހު އޮތް ނޫސްވެރިންގެ ބައްދަލުވުމުގައި ރައީސް މުއިއްޒު ވަނީ އެކަން ދޮގު ކުރައްވައިފަ އެވެ. އެއީ ކަނޑައެޅިގެން ދޮގެއް ކަމަށާއި އެއީ އެއްވެސް ހަގީގަތެއް ނެތް ވާހަކައެއް ކަމަށް ރައީސް މުއިއްޒު ވަނީ ވިދާޅުވެފަ އެވެ.
އަލިފާން ރޯވާން ދިމާވި މައްސަލަ ދެނެގަތުމަށްޓަކައި ދިވެހި ފުލުހުންނާއި، އެކުވެރި ޤައުމުތަކުގެ ތަޖުރިބާާކާރުން ގުޅިގެން ތަހުގީގެއް ކޮށްފައިވާ ކަމަށް މިނިސްޓަރު އިހުސާން ވިދާޅުވީ ރައްޔިތުންގެ މަޖިލީހުގަ އެވެ. އަދި އެ ތަހުގީގުން ހާާމަވީ އަލިފާާން ރޯވީ މީހަކި ގަސްތުގައި ރޯކޮށްލައިގެން ނޫން ކަމަށާއި އެއީ ކަރަންޓު ނަރަކަށް ދިމާވި މައްސަލައެއްގެ ސަބަބުން ހިނގި ހާދިސާއެއް ކަމަަށް އެ ދުވަހު މިނިސްޓަރު އިހުސާން ވިދާޅުވެފައިވެ އެވެ.
ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ ހިންގަމުން އައި އިމާރާތުގައި އަލިފާން ރޯވީ 2024 ވަނަ އަހަރުގެ ޑިސެމްބަރު މަހުގެ ތެރޭގަ އެވެ. އެ ހާދިސާގައި އެ ތިން މިނިސްޓްރީ ހިންގަމުން އައި އިމާރާތް ވަނީ އެއްކޮށް އަނދާ ހުލިވެފަ އެވެ.
