މަސްތުވާތަކެތީގެ މައްސަލައެއްގައި އުމުރަށް ޖަލަށް ލާފައި ހުރި މީހަކު ސަލާމަތްވެއްޖެ
އޭނާއާއި އިތުރު މީހަކު އުމުރަށް ޖަލަށް ލުމަށް ހުކުމް ކޮށްފަ
ފުލުހުން ހިންގި އޮަޕަރޭޝަނެއްގައި އަތުލައިގަތް މަސްތުވާތަކެތި
މަސްތުވާތަކެތީގެ މައްސަލައެއްގައި މީހަކު އަމުރު ދުވަހަށް ޖަލަށް ލުމަށް ދަށު ކޯޓުން ކޮށްފައިވާ ހުކުމެއް ހައި ކޯޓުން ބާތިލް ކަމަށް ކަނޑައަޅައިފި އެވެ.
ސ. ހިތަދޫ، އަބީރީގޭ، އިބްރާހިމް މުހައްމަދު، އެއްލައްކަ ރުފިޔާއިން ޖޫރިމަނާކޮށް އުމުރު ދުވަހަށް ޖަލަށް ލުމަށް ކްރިމިނަލް ކޯޓުން ހުކުމް ކޮށްފައި ވަނީ 30 އޯގަސްޓް 2015 ވަނަ ދުވަހު އެވެ.
އެ ހުކުމް އޭނާގެ މައްޗަށް ކޮށްފައިވަނީ މާލެއިން ފުރައިގެން ހިތަދޫއަށް ދިޔަ ބޯޓަކުން ގެންދިޔަ މަސްތުވާތަކެތި އަޅާފައި ހުރި ފޮށިގަނޑެއްގެ މައްސަލައިގަ އެވެ. އެ ބޯޓުން ގެންދިޔަ ފޮށިގަނޑާ ހަވާލުވާން ދަނީ ކޮންބައެއްތޯ ބަލަން ފުލުހުން ތިއްބާ އިބްރާހިމް މުހައްމަދާއި، އެރަށު ހަވާސާ، މުހައްމަދު މަމްދޫދު ސައިކަލުގައި އެ ފޮށިގަނޑު ބޯޓުން ނެގި ކަމަށާއި އެ ފޮށިގަނޑު ކަނޑައިގެން ބެލިއިރު، ޑީވީޑީ ކަވަރެއްގެ ތެރެއިން ފެނުނު 44 ޕެކެޓުގައި ޖުމްލަ 85.4 ގްރާމް ހެރޮއިން ހުރި ކަމަށް ތަހުލީލު ރިޕޯޓްތަކުން ދައްކާ ކަމަށް އުފުލި ދައުވާގައި ބުނެފައިވެއެވެ.
ކްރިމިނަލް ކޯޓުން ކުރި ހުކުމުގައި ބުނެފައި ވަނީ އެ ދެ މީހުންގެ އަމަލުތައް ހުރިގޮތުން އެއީ އެމީހުންގެ ތަކެތި ނޫން ކަމަށް ބެލެވޭނެ އެއްވެސް ސަބަބެއް ނެތީތީވެ، ޑައިމޯފިން ޓްރެފިކް ކުރުމުގެ ކުށުން ދެ މީހުން ކުށްވެރިވެއްޖެ ކަމަށް ކަނޑައަޅައި އެއްލައްކަ ރުފިޔާއިން ޖޫރިމަނާކޮށް އުމުރަށް ޖަލަށްލުމަށް ހުކުމް ކުރާ ކަމަށެވެ.
އިބްރާހިމް މުހައްމަދުގެ މައްޗަށް އިއްވި ހުކުމް އޭނާގެ ފަރާތުން ހައިކޯޓުގައި އިސްތިއުނާފް ކުރީ 2 ޑިސެމްބަރު 2015 ގަ އެވެ. އެ މައްސަލައިގައި ހައިކޯޓުން ކުރި ހުކުމުގައި ބުނެފައި ވަނީ އެ ހާދިސާގައި އަތުލައިގަތް މަސްތުވާތަކެއްޗާ އިބްރާހިމް މުހައްމަދާ ގުޅުން އޮތް ކަން އެއްވެސް ޝައްކެތް ނެތް މިންވަރަށް ސާބިތުނުވާ ކަމަށެވެ.
އެ ނުކުތާ ފާހަގަކޮށް، ހައިކޯޓުން ވަނީ ދަށު ކޯޓުން އިއްވި ހުކުމް ބާތިލް ކަމަށް ކަނޑައަޅާފަ އެވެ. ހުކުމް ބާތިލް ކަމަށް ކަނޑައެޅި އިރު، ދެ އަހަރަށް ވުރެ ގިނަ ދުވަސް ވަންދެން މުހައްމަދު އިބްރާހިމް ޖަލު ހުކުމް ތަންފީޒް ކޮށްފައިވެއެވެ.
