ގޫގުލްގެ ޖެމިނައި އޭއައި އަމިއްލައަށް ތިން ކުންފުނި ހެކުކޮށްފި

ގޫގުލްގެ އާޓިފިޝަލް އިންޓެލިޖެންސް (އޭއައި) މޮޑެލް "ޖެމިނައި" ގެ ސައިބަރ ސެކިއުރިޓީ ގާބިލުކަން ދެނެގަތުމަށް ހެދި ޓެސްޓެއްގެ ތެރެއިން، އެއްވެސް އިންސާނެއްގެ އެހީތެރިކަމާ ނުލައި އަމިއްލައަށް ތިން ކުންފުންޏެއްގެ ސިސްޓަމްތައް ހެކުކޮށްފައިވާ ކަމަށް އެ ކުންފުނިން ބުނެފި އެވެ.

މިއީ އޭއައި މޮޑެލްއަކުން މިފަދަ އަމަލެއް ހިންގިކަން އެނގުނު ފުރަތަމަ ފަހަރު ކަމަށް ބެލެވެ އެވެ.

ބީބީސީއަށް މައުލޫމާތު ދެއްވަމުން ގޫގުލްގެ އޮފިޝަލަކު ވިދާޅުވީ، އިންޓަނެޓުގައި ހުރި އާންމު މައުލޫމާތުތައް ބޭނުންކޮށްގެން، ޓެސްޓުގެ ބައެއް ކަމަށް ޖެމިނައިއަށް ހީވި ވެބްސައިޓްތަކަކަށް ވަނުމަށް ބޭނުންވާ ކްރެޑެންޝަލްތައް ނުވަތަ ޕާސްވޯޑްތައް އެ މޮޑެލްއިން އަމިއްލައަށް އަންދާޒާކޮށްފައިވާ ކަމަށެވެ. އަދި ކޮންމެ ފަހަރަކު ވެސް އެ މޮޑެލްގެ މަސައްކަތް އަމިއްލައަށް ހުއްޓާލާފައިވާ ކަމަށް އޭނާ ފާހަގަކުރެއްވި އެވެ.

މިދިޔަ މޭ މަހުގެ ތެރޭގައި ހިނގި މި ހެކުކުރުމުގެ ހާދިސާތަކާ ގުޅިގެން، އޭގެ އަސަރު ފޯރި ކުންފުނިތަކަށް މިހާރު ވަނީ އެކަން އަންގާފަ އެވެ.

މި ހާދިސާ ފެންމަތިވެފައި މިވަނީ، އޭއައި ކުރިއަރަމުންދާ ހަލުވިމިނާ މެދު އާންމުންގެ ފާޑުކިޔުންތައް އިތުރުވެފައިވާ ދަނޑިވަޅެއްގަ އެވެ. ބައެއް ޓެކްނޮލޮޖީ ކުންފުނިތަކުން އިންސާނިއްޔަތަށް ކުރިމަތިވެދާނެ ނުރައްކަލަކަށްޓަކައި އޭއައި ތަރައްގީކުރުން މަޑުޖައްސާލުމަށް ގޮވާލަމުންދާއިރު، ބައެއް ކުންފުނިތަކުގެ މާހިރުން މިކަމަށް އެއްބަހެއްނުވެ އެވެ.

ވޯލް ސްޓްރީޓް ޖާނަލްއިން އެންމެ ފުރަތަމަ ރިޕޯޓްކުރި މި ހެކުކުރުމުގެ ހާދިސާތައް ހިނގާފައިވަނީ މޭ މަހުގެ ތެރޭގައި، ސައިބަރ ސެކިއުރިޓީ ވަޒަންކުރާ މިނިވަން ކުންފުންޏެއް ކަމަށްވާ "އިރެގިއުލަރ" އިން ހެދި ޓެސްޓެއްގެ ތެރެއިންނެވެ.

ހޮނިހިރު ދުވަހު ބީބީސީއަށް ދިން ބަޔާނެއްގައި އިރެގިއުލަރ ކުންފުނިން ބުނީ، އެ ކުންފުނިން ހިންގި ތަހުގީގުގެ ބައެއްގެ ގޮތުގައި، މިދިޔަ ޖުލައި މަހު ގޫގުލްއަށާއި މިކަމުގެ އަސަރު ފޯރި ހުރިހާ ފަރާތްތަކަށް އެކަން އަންގާފައިވާ ކަމަށެވެ.

އަދި އެ ކުންފުނިން ވަގުތުން ފިޔަވަޅު އަޅައި، އެ ފަރާތުން ފާހަގަވި ހުރިހާ މައްސަލަތަކެއް މީގެ ހަފުތާތަކެއް ކުރިން ހައްލުކޮށްފައިވާ ކަމަށް ވެސް އެ ބަޔާނުގައިވެ އެވެ.

ވޯލް ސްޓްރީޓް ޖާނަލްއިން ރިޕޯޓްކޮށްފައިވާ ގޮތުގައި، އެއް ހާދިސާއެއްގައި ޖެމިނައި މޮޑެލްއިން ވަނީ ރައްކާތެރިކޮށްފައިވާ ސިސްޓަމަކަށް ވަދެވެންދެން ތަކުރާރުކޮށް ޕާސްވޯޑްތައް އަންދާޒާކޮށްފަ އެވެ.

ގޫގުލްގެ ސެކިއުރިޓީ އިންޖިނިއަރިންގެ ވައިސް ޕްރެޒިޑެންޓް ހެދަރ އެޑްކިންސް ބީބީސީއަށް ދެއްވި ބަޔާނެއްގައި ވިދާޅުވީ، މިކަމުގެ އަސަރު ފޯރި ތިން ކުންފުންޏަށް އެކަން އެންގުމަށްފަހު، ޓެސްޓްކުރުމުގެ މަރުހަލާތަކަށް ގެންނަންޖެހޭ ބަދަލުތައް ގެނައުމަށް ތަމްރީނުދޭ ބައިވެރިންނާއެކު މަސައްކަތް ކޮށްފައިވާ ކަމަށެވެ.

މީގެ އިތުރުން، ބާރުގަދަ އޭއައި މޮޑެލްތަކަކީ ޒިންމާދާރުކަމާއެކު މަސައްކަތްކުރާ އެއްޗަކަށް ހެދުމަށް ތަމްރީނު ދިނުމުގެ މުހިންމުކަން މި ހާދިސާތަކުން ހާމަވާ ކަމަށް އޭނާ ވިދާޅުވި އެވެ.

އެހެން ބައެއް އޭއައި ސިސްޓަމްތަކުން ވެސް މިފަދަ ހެކުކުރުމުގެ ހާދިސާތައް ދާދި ފަހުން ވަނީ ރިޕޯޓުކޮށްފަ އެވެ.

އޯޕަން އޭއައިގެ މޮޑެލްތަކުން އާންމުކޮށް ލިބެން ހުންނަ ބައެއް ޚިދުމަތްތަކަށް ސައިބަރ ހަމަލާތަކެއް ދީފައިވާ ކަމަށް އެ ކުންފުނިން ބުނިތާ މަދު ދުވަސްކޮޅެއްގެ ތެރޭގައި، މިދިޔަ ޖުލައި މަހު އެންތްރޮޕިކް ކުންފުނީގެ "ކްލޯޑް" އޭއައި މޮޑެލް ވެސް ވަނީ ޓެސްޓު މަރުހަލާގެ ތެރެއިން އަމިއްލައަށް ތިން އިދާރާއެއް ހެކްކޮށްފަ އެވެ.

މައިކްރޯސޮފްޓްގެ އޭއައިގެ އިސްވެރިޔާ މުސްތަފާ ސުލައިމާން މި ހަފުތާގައި ވިދާޅުވީ، ވާދަވެރި އެންތްރޮޕިކް ކުންފުނިން އޭއައިއާ މެދު އަމަލުކުރަނީ އިންސާނަކާ މެދު އަމަލުކުރާ ފަދަ ގޮތަކަށް ކަމަށާއި، މިއީ އިންސާނުންގެ ކޮންޓްރޯލުން ނެއްޓިދާނެ ފަދަ ޓެކްނޮލޮޖީއެއް އުފެދުމަށް މަގުފަހިވެދާނެ ނުބައި މިސްރާބެއް ކަމަށެވެ.

މި ޓެކްނޮލޮޖީ ތަރައްގީކުރުމުގެ ރައްކާތެރިކަމާ މެދު އާންމުންގެ މެދުގައި ބަހުސްތައް އިތުރުވަމުންދާއިރު، މިކަން ރެގިއުލޭޓް ކުރުމާ ގުޅޭގޮތުން ވެސް ދަނީ ވާހަކަދެކެވެމުންނެވެ.

އަންނަ ހުކުރު ދުވަހު ޗައިނާގެ ރައީސް ޝީ ޖިންޕިންއާއެކު ވައިޓް ހައުސްގައި ބާއްވާ ރަސްމީ ފަރިއްކޮޅެއްގައި އެންވީޑިއާގެ ސީއީއޯ ޖެންސަން ހުއާންގް އަދި އޯޕަން އޭއައިގެ ސީއީއޯ ސޭމް އޮލްޓްމަން ބައިވެރިވެވަޑައިގަންނަވާނެ ކަމަށް ބެލެވެ އެވެ. އަދި އޭގެ ފަހުން އަންނަ ހަފުތާގައި އޮލްޓްމަން އދ. ގެ ސަލާމަތީ މަޖިލީހަށް މައުލޫމާތު ދެއްވުމަށް ވަނީ ހަމަޖެހިފަ އެވެ.