އދ ގެ ޓީމް މިޔަންމާގެ ރަޚައިން ސްޓޭޓަށް ނުވަދެވުމުން އެކަން ކުށްވެރިކޮށްފި

މިޔަންމާއިން އެގައުމުގެ ރަޚައިން ސްޓޭޓަށް އދ ގެ ޓީމް ނުވެއްދުމުން އދ އިން ކުށްވެރިކޮށްފިއެވެ.

އދ ގެ ހިއުމަނިޓޭރިއަން އޮފީހުގެ އިސްވެރިޔާ މާކް ލޯކޮކް ޖެނީވާގައި ރިޕޯޓަރުންނަށް ވިދާޅުވީ "މިޔަންމާގެ ރަޚައިން ސްޓޭޓަށް ނުވެއްދުމުން އެއީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށެެވެ."

އޭނާ ވިދާޅުވީ އޭނާ އުންމީދު ކުރެއްވީ އދ ގެ "މަތީ ފަންތީގެ" ޓީމަކަށް ރަޚައިން ސްޓޭޓަށް ކުރިއަށް އޮތް ދުވަސްތަކުގައި ޒިޔާރަތް ކުރެއްވޭނެ ކަމަށެވެ. ލޯކޮކް އިތުރަށް ވިދާޅުވީ މިޔަންމާގައި ތިބި ރޮހިންޖާ މުސްލިމުން އަދިވެސް ހުސްނުވާ ކަމަށާއި އެތައް ހާސް ބަޔަކު އަދިވެސް އެބަތިބި ކަމަށެވެ.

މިޔަންމާގެ އަސްކަރިއްޔާ އިން ވަނީ މިޔަންމާގެ ރޮހިންޖާ މުސްލިމުންނާ ދެކޮޅަށް އާ އޮޕަރޭޝަނެއް ފަށާފައެވެ. މިޔަމަންމާގެ މުސްލިމުންނާ ދެކޮޅަށް އެގައުމުގެ ސަރުކާރުން ބާރުދީގެން، އަސްކަރިއްޔާއިން ދަނީ ބާރުގެ ބޭނުންކޮށް، މުސްލިމުން ގެދޮރުން ފައްސާލައި، ބައެއް މީހުން މަރައި، އަދި އަންހެން ކުދިންގެ އިއްފަަތް ފޭރިގަންނަމުންނެވެ. މިޔަންމާގެ އަސްކަރިއްޔާ އިން ފަށާފައިވާ އޮޕަރޭޝަނާ ބެހޭގޮތުން އދ އިން ބުނެފައި ވަނީ އެއީ "ނަސްލެއް ނައްތާލުމުގެ" އޮޕަރޭޝަނެއް ކަމަށެވެ.

އޯގަސްޓް 25 އިން ފެށިގެން މިޔަންމާގެ އަސްކަރިއްޔާއިން ހިންގާ ލާއިންސާނީ އަމަލުތަކުން ސަލާމަތްވުމަށް މިހާތަނަށް 500،000 އަށް ވުރެ ގިނަ ރޮހިންޖާ މުސްލިމުން ބަންގްލަދޭޝްއަށް ހިޖުރަކޮށްފައި ވެއެވެ.

ދާދިފަހުން ބަންގްލަދޭޝް އިން ބުނެފައި ވަނީ ދުނިޔޭގައި މިހާތަނަށް ބިނާކުރާ އެންމެ ބޮޑު ރެފިއުޖީ ކޭމްޕް ބަންގްލަދޭޝްގައި ބިނާނުކުރަން ނިންމާފައިވާ ކަމަށެވެ. ބަންގްލަދޭޝް އިން ބޮޑު ރެފިއުޖީ ކޭމްޕެއް ހަދަން ނިންމާފައިވާ އިރު އެތަން ހަދަނީ ކޮކްސް ބާޒާރު ޓައުންގައި މިހާރު ހުންނަ ކުޓުޕަލަޮން ރެފިއުޖީ ކޭމްޕްގެ ޖާގަ އިތުރުކޮށްގެންނެވެ.