ތޮލާލް ވަކިވުމުން، ސްޕޯޓްސް ކޮމިޝަނަރުގެ ޒިންމާތައް ވަގުތީ ގޮތުން ހާނިމްއާ ހަވާލުކޮށްފި
15 ސެޕްޓެމްބަރު 2026 | އަންގާރަ 05:09ހާނިމް ހުންްނެވީ ޑެޕިއުޓީ ސްޓޭޓް މިނިސްޓަރު ފެންވަރުގައި ކޮމިޝަނަރ އޮފް ސްޕޯޓްސްގެ މަޤާމުގައި. އެ މަޤާމަށް ހާނިމް އައްޔަނުކުރެއްވީ މިއަހަރުގެ އޭޕްރީލް މަހުގެ ތެރޭގައި
ސްޕޯޓްސް ކޮމިޝަނަރުގެ މަސްއޫލިއްޔަތުތައް ވަގުތީ ގޮތުން ހަވާލުކޮށްފައިވާ ހާނިމް | މިނިސްޓްރީ އޮފް ޔޫތު އެމްޕަވަމަންޓް، ސްޕޯޓްސް އެންޑް ފިޓްނަސް
ސްޕޯޓްސް ކޮމިޝަނަރުގެ މަޤާމުގައި ހުންނެވި މުހައްމަދު ތޮލާލް އެ މަޤާމުން ވަކިވެވަޑައިގެންނެވުމާ އެކު، ވަގުތީ ގޮތުން މަޤާމުގެ މަސްއޫލިއްޔަތުތައް މުހައްމަދު ހާނިމްއާ ހަވާލުކޮށްފި އެވެ.
ހާނިމް ހުންްނެވީ ޑެޕިއުޓީ ކޮމިޝަނަރ އޮފް ސްޕޯޓްސްގެ މަޤާމުގައި އެވެ. އެ މަޤާމަށް ހާނިމް އައްޔަނު ކުރެއްވީ މިއަހަރުގެ އޭޕްރީލް މަހުގެ ތެރޭގައި އެވެ. އެ މަޤާމުގައި ހާނިމް ހުންނެވީ ސްޓޭޓް މިނިސްޓަރެއްގެ ފެންވަރުގަ އެވެ.
ހޯމަ ދުވަހުގެ ހެނދުނު ތޮލާލް ވަނީ ކޮމިޝަނަރ އޮފް ސްޕޯޓްސްގެ މަޤާމުން އިސްތިއުފާ ދެއްވައިފަ އެވެ. އެއާއެކު އޭނާ ދެން އައްޔަނު ކުރައްވާފައި ވަނީ ރައީސް އޮފީހުގެ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް ފޯ ޓާޝަރީ ހެލްތު ސާވިސަސްގެ މަޤާމަށެވެ. ހޯމަ ދުވަހުގެރޭ ރައީސް އޮފީހުން ހާމަކޮށްފައިވާ ގޮތުގައި އެ މަޤާމަށް ތޮލާލް އައްޔަނުކުރެއްވީ މިނިސްޓަރުން ފެންވަރުގަ އެވެ. މީގެ ކުރިން ސްޕޯޓްސް ކޮމިޝަނަރުގެ މަޤާމުގައި ވެސް ތޮލާލް ހުންނެވީ މިނިސްޓަރުންގެ ފެންވަރުގަ އެވެ.
ކުޅިވަރުގެ ދާއިރާ އަށް ގިނަ ޚިދުމަތްތަކެއް ކުރައްވާފައިވާ ހާނިމް އަށް، ސްޕޯޓްސް ކޮމިޝަނަރުގެ ޒިންމާތައް ހަވާލުކޮށްފައި ވަނީ ވަގުތީ ގޮތުންނެވެ. ނަމަވެސް، ދެން ކޮމިޝަނަރ އޮފް ސްޕޯޓްސްގެ މަޤާމަށް ވަޑައިގަންނަވާނީ ކޮން ބޭފުޅެއްކަން ސާފުވެފައި ނުވެ އެވެ.
މީގެ ކުރިން ހާނިމް ވަނީ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އާއި އެތުލެޓިކްސް އެސޯސިއޭޝަންގެ ޖެނަރަލް ސެކްރެޓަރީގެ މަޤާމު ވެސް އަދާކުރައްވައިފަ އެވެ. އެފްއޭއެމްގެ ހިންގާ ކޮމެޓީގެ މެމްބަރުކަން ވެސް ހާނިމް ވަނީ އަދާކުރައްވައިފަ އެވެ. އަދި އޭނާ އަކީ 2008 ވަނަ އަހަރު ރާއްޖެ އިން ސާފް ޗެމްޕިއަންޝިޕް ކާމިޔާބުކުރި ޓީމުގެ މެނޭޖަރެވެ.
