އެއް ވުޒާރާއެއްގައި ދެ ވަޒީރުން؟ މިއީ ކިހިނެއްވާ ކަމެއް؟

ސަރުކާރު ބަދަލުވެ، އައު ސަރުކާރުން މިހާރު ދަނީ މަޤާމުތަކަށް ބޭފުޅުން ޢައްޔަން ކުރައްވަމުންނެވެ. ރައީސުލްޖުޙޫރިއްޔާގެ އޮފީހަށް ބޭނުންވާ މަގާމުތަކަށް ބޭފުޅުން ޢައްޔަން ކުރުމާއި، ވުޒާރާތަކަށް ބޭނުންވާ މަޤާމުތަކަށް ބޭފުޅުން ޢައްޔަން ކުރުމެވެ. ސަރުކާރުގެ ވުޒާރާތަކުގެ އެންމެ އިސް ފަރާތަކީ، އެ ވުޒާރާ އަކަށް ޢަައްޔަން ކުރައްވާ ވަޒީރެވެ. އެ ވުޒާރާގެ އެންމެހައި ކަންކަން ނިންމަވާނީ ވަޒީރުގެ ބެއްލެވުމުގެ ދަށުންނެވެ. ނަމަވެސް، އަންގާރަ ދުވަހު ޢައްޔަން ކުރެއްވި މަޤާމަކާއެކު، ގިނަ ސުވާލުތަކެއް އުފެދިއްޖެ އެވެ.

ކޮމިޝަނަރ އޮފް ސްޕޯޓްސްގެ މަޤާމަށް، އެތުލެޓިކް އެސޯސިއޭޝަންގެ ކުރީގެ ރައީސް އަދި ޕްރޮގްރެެސިވް ޕާޓީ އޮފް މޯލްޑިވްސް (ޕީޕީއެމް)ގެ ކުރީގެ ޖެނަރަލް ސެކްރެޓަރީ މުޙައްމަދު ޠަލާލް ޢައްޔަން ކުރެއްވީ ވަޒީރުންގެ ފެންވަރުގަ އެވެ. ކޮމިޝަނަރ އޮފް ސްޕޯޓްސްގެ މަޤާމަކީ ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމުގެ ވެރިކަމުގައި ތަސްދީޤުކުރެއްވި، ދިވެހިރާއްޖޭގެ ކުޅިވަރުގެ ޤާނޫނުގެ ދަށުން އުފައްދަވާފައިވާ މަޤާމެކެވެ. އެ ޤާނޫނުގެ ހަ ވަނަ މާއްދާގެ (ށ)ގައި ބަޔާންކޮށްފައިވާ ގޮތުން، ރައީސުލްޖުމްޙޫރިއްޔާ ސްޕޯޓްސް ކޮމިޝަނަރުގެ މަޤާމަށް ބޭފުޅަކު ޢައްޔަން ކުރައްވާނީ، ކުޅިވަރާ ބެހޭ ވަޒީރު އަދި ކުޅިވަރުގެ ޤައުމީ މަޖިލީހުގެ ލަފަޔާއެކު އެވެ.

އެއާ ވިދިގެން އޮތް މާއްދާ، (ނ)ގައި ބުނެފައި ވާގޮތުން، ކުޅިވަރު ޤާނޫނުގެ ދަށުން ހަދާ ޤަވާއިދުތަކުގެ ދަށުން، ސްޕޯޓްސް ކޮމިޝަނަރަށް ލިބިދޭ ބާރުތަކުގެ ބޭނުން ހިފާގޮތާ ބޭހޭ ގޮތުން އަދި، މަސްއޫލިއްޔަތު އަދާކުރާ ގޮތާމެދު ޖަވާބުދާރީ ވާން ޖެހޭ ފަރާތަކީ ކުޅިވަރު ވަޒީރު އަދި ކުޅިވަރާ ބެހޭ ޤައުމީ މަޖިލީހެވެ. މިހާތަނަށް، ސްޕޯޓްސް ކޮމިޝަނަރުގެ މަޤާމަށް ޢައްޔަން ކުރެއްވި ބޭފުޅުން ޢައްޔަން ކުރައްވަނީ ޑެޕިއުޓީ މިނިސްޓަރުންގެ ފެންވަރުގަ އެވެ.

ސުވާލު އުފެދި، މައްސަލަ ދިމާވަނީ މި ހިސާބުންނެވެ. ސްޕޯޓްސް ކޮމިޝަނަރަކީ، ކުޅިވަރު ވުޒާރާގެ ބެލުމުގެ ދަށުން ހިންގަމުން އަންނަ ކޮމިޝަނެކެވެ. އެހެން ގޮތަކަށް ދަންނަވާނަމަ، އެއީ ކުޅިވަރު ވުޒާރާގެ އެއް ޑިޕާޓުމަންޓެވެ. އެހެންކަމަށްވާއިރު، ކުޅިވަރު ވުޒާރާގައި ދެ ވަޒީރުން ތިއްބަވަނީ އެވެ. ކުޅިވަރު ވަޒީރު ޢަބްދުﷲ ރާފިޢު އާއި ސްޕޯޓްސް ކޮމިޝަނަރު ޠަލާލް އެވެ. ދެ ބޭފުޅުންނަކީ ވެސް ވަޒީރުންގެ ފެންވަރުގެ ބޭފުޅުންނެވެ.

ނަމަވެސް، މީގެ ކުރީގެ ސްޕޯޓްސް ކޮމިޝަނަރުންނަކީ ވަޒީރު ފެންވަރުގެ ބޭފުޅުންނެއް ނޫނެވެ. މިއީ، އެ މަޤާމަށް ވަޒީރު ފެންވަރުގައި ބޭފުޅަކު ޢައްޔަން ކުރެއްވި ފުރަތަމަ ފަހަރު ވެސް މެއެވެ. އެހެންކަމަށްވާއިރު، ކުޅިވަރު ވުޒާރާގެ ހިންގުމުގައި ފުށުއެރުންތަކެއް އުޅޭނެ އެވެ. އެ ވުޒާރާގެ އެންމެ އިސްވެރިޔަކީ މީގެ ކުރިން ކުޅިވަރު ވަޒީރަށް ވީ ނަމަވެސް، ވަޒީރު ފެންވަރުގެ އެހެން ބޭފުޅަކު ޢައްޔަން ކުރެއްވުމުން، އުފެދޭ ސުވާލަކީ، މިހާރު އެންމެ އިސްވެރިޔަކީ ކޮން ބޭފުޅެއްތޯ އެވެ؟ ނިންމުންތައް ނިންމަވާނީ، ކޮން ބޭފުޅެއްތޯ އެވެ؟ މިއީ އެއް އުރައެއްގައި ދެ ކަނޑި އޮތުން ކަހަލަ ކަމެކެވެ. ނޫން ނަމަ، ކުޅިވަރު ވަޒީރަށް، ސްޕޯޓްސް ކޮމިޝަނަރު ޖަވާބުދާރީ ކުރެވިދާނެ ހެއްޔެވެ؟

މިކަމުގެ އެތެރެޔަށް ފީނާލައި، ބެލި ބެލުމުން ސާފުވީ، މިއީ ސިޔާސީ ކަމެއް ކަމެވެ. އައު ސަރުކާރުން އެންމެ ފުރަތަމަ ކުޅިވަރު ވަޒީރުކަން ހުށަހެޅުއްވީ ޠަލާލަށެވެ. ނަމަވެސް، އެ ވަގުތު ޠަލާލް އެ މަޤާމާ ހަވާލުވެވަޑައިގަންނަވަން އެއްބަސްނުވީ، ރައީސުލްޖުމްޙޫރިއްޔާގެ އޮފީހުގެ މިނިސްޓަރުކަން ބޭނުންފުޅު ވާތީ އެވެ. ޠަލާލްގެ އެ ހުށަހެޅުމަށް ރައީސުލްޖުމްޙޫރިއްޔާ ޑރ މުޙައްމަދު މުޢިއްޒު އެންމެ ފުރަތަމަ އެއްބަސްވެ ވަޑައިގެންނެވި ކަމަށްވެ އެވެ. ނަމަވެސް މައްސަލަ ދިމާވީ، ފަހުން ރައީސް އޮފީހުގެ މިނިސްޓަރުކަން ޠަލާލަށް ނުދިނުމުންނެވެ. އޭގެ ބަދަލެއްގެ ގޮތުގައި، ވަޒީރު ފެންވަރުގައި ސްޕޯޓްސް ކޮމިޝަނަރުގެ މަޤާމު ޠަލާލަށް ދެއްވީ އެވެ.

އެހެންވީއިރު، މިއީ ބޮޑު ފުށުއެރުމަކަށް ވާނެ އެވެ. ވުޒާރާގެ ހިންގުމުގައި މިއީ މައްސަލަތަކެއް ދިމާވެދާނެ ފަދަ ކަމެކެވެ.