ލެގޫންސް ކުލަބުގެ އިންތިޚާބާ ގުޅިގެން، ތޮލާލްގެ މައްސަލައެއް ސްޕޯޓްސް ކައުންސިލް އަށް ހުށަހަޅައިފި

ލެގޫންސް ސްޕޯޓްސް ކުލަބުގެ ހިންގާ ކޮމެޓީ ހޮވަން ބޭއްވި އިންތިޚާބާ ގުޅިގެން، ސިވިލް ކޯޓު އަދި ހައި ކޯޓުން ނެރެފައިވާ ހުކުމްތަކާއި، އުމުރުތަކާ ޚިލާފުވެފައިވާ ކަމަށް ބުނެ، ކޮމިޝަނަރ އޮފް ސްޕޯޓްސް މުހައްމަދު ތޮލާާލްގެ މައްސަލައެއް ސްޕޯޓްސް ކައުންސިލް އަށް ހުށަހަޅައިފި އެވެ. 

މި މައްސަލަ ސްޕޯޓްސް ކައުންސިލް އަށް ހުށަހަޅާފައި ވަނީ އެ ކުލަބުގެ ދެ މެންބަރުން ކަމަށްވާ، ޢަބްދުލް ވާހިދު އާއި، އަހުމަދު އަލީ އެވެ. ސްޕޯޓްސް ކައުންސިލް އަށް ހުށަހަޅާފައިވާ މައްސަލައިގައި ބުނެފައި ވަނީ، ކޮމިޝަނަރު ތޮލާލް ވަނީ ކޯޓުގެ ހުކުމާ ޚިލާފަށް އަމަލު ކޮށްފައި ކަމަށެވެ. 

އެގޮތުން އެ މައްސަލައިގައި ބުނެފައި ވަނީ، އެ ކުލަބުގެ ހިންގާ ކޮމެޓީގެ މެންބަރުން ވަކި ކުރަން ނިންމި ނިންމުމަކީ، ބާތިލު ނިންމުމެއް ކަމަށް މިއަހަރުގެ ޖޫން މަހު ސިވިލް ކޯޓުން ކަނޑައަޅާފައިވާ ކަމަށެވެ. އެގޮތުން ހިންގާ ކޮމެޓީގެ ދައުރު މިއަހަރުގެ މާޗު މަހުގެ 11 ވަނަ ދުވަހަށް ހަމަވެފައިވާ ކަމަށާއި، އިންތިޚާބު ބާއްވައި މެންބަރުން އިންތިޚާބު ކޮށްފައި ވަނީ، އަދި މެންބަރުން ވަކި ކޮށްފައި ވަނީ ވައިބާ ގުރޫޕު މެދުވެރިކޮށް ކަމަށް ވެސް ބުނެފައިވެ އެވެ. 

މީގެ އިތުރުން ސްޕޯޓްސް ކޮމިޝަނަރުގެ މައްޗަށް އަމުރު ކޮށްފައި ވަނީ، 227 މެންބަރުން ހިމެނޭ ޞައްހަ ދަފުތަރެއްގެ މައްޗަށް ބިނާކޮށް ކަމަށް ވެސް ވަނީ ފާހަގަ ކޮށްފައި އެވެ. ސިވިލް ކޯޓުގެ އެ ހުކުމް ބާތިލު ކުރުމަށް ލެގޫންސް ކުލަބުގެ ކުރީގެ ހިންގާ ކޮމެޓީ އިން ހައި ކޯޓަށް މައްސަލަ ހުށަހެޅި އެވެ. ނަމަވެސް، އޮގަސްޓު މަހުގެ 12 ވަނަ ދުވަހު ހައި ކޯޓުން ވެސް ނިންމާފައި ވަނީ، އެ ކުލަބުގައި މިހާރު އޮތީ ޤާނޫނީ ގޮތުން ޞައްހަ ހިންގާ ކޮމެޓީއެއް ނޫން ކަަމަށް، ވާހިދު އަދި އަލީގެ ސިޓީގައި ވަނީ ފާހަގަ ކޮށްފައި އެވެ. 

އެހެން ނަމަވެސް، ލެގޫންސްގެ ދައުރު ހަމަވެފައިވާ ހިންގާ ކޮމެޓީ އިން ވަނީ، އަމިއްލަ އަށް އެކުލަވާލި ލިސްޓަކަށް ދާދި ފަހުން އިންތިޚާބު ބާއްވާފައި ކަމަށް އެ ސިޓީގައި ބުނެފައިވެ އެވެ. އަދި އެއީ ކޮމިޝަނަރުގެ އެއްވެސް ބައިވެރިވުމެއް ނެތި ބޭއްވި އިންތިޚާބެއް ކަމަށް ވެސް ފާހަގަކޮށްފައިވެ އެވެ. ނަމަވެސް، އެ އިންތިޚާބުގެ ނަތީޖާ ކޮމިޝަނަރުގެ ފަރާތުން ފަހުން ޤަބޫލުކޮށް، އެންޑޯސްކޮށްފައިވާ ކަމަށާއި، ކުލަބުގެ ދަފުތަރު ވެސް އަދާހަމަ ކޮށްފައިވާ ކަމަށް ބުނެފައިވެ އެވެ. 

އެހެންވެ ކޮމިޝަނަރު ތޮލާލްގެ އެ އަމަލަކީ ކޯޓުގެ ހުކުމް ތަންފީޒު ކުރުމަށް ހުރަސް އަޅައި، ކޯޓުގެ ހުރުމަތް ކެނޑޭ ގޮތަށް ކޮށްފައިވާ އަމަލެއް ކަމަށްވާތީ، ތޮލާލްއާ މެދު ޤާނޫނުގައިވާ ގޮތުގެ މަތިން އަޅަން ޖެހޭ ފިޔަވަޅު އަޅައި ދިނުމަށް އެ ދެ މެންބަރުން ވަނީ އެދިފައި އެވެ.