ދުނިޔޭގެ ފުޓުބޯޅައިގެ މައި އިދާރާ (ފީފާ) އަދި ސަރަހައްދީ ފުޓުބޯޅަ އިދާރާ (އޭއެފްސީ) އިން ކުލަބުތަކަށް ދީފައިވާ ފައިސާގެ އަދަދާއި، އެ ފައިސާ ބޭނުންކޮށްފައިވާ ގޮތުގެ މައުލޫމާތު ހިއްސާ ކުރުމަށް ކޮމިޝަނަރ އޮފް ސްޕޯޓްސް އިން އެދިއްޖެ އެވެ.

ސްޕޯޓްސް ކޮމިޝަނުން ވަނީ އެކަމަށް އެދި، ކުލަބުތަކަށް ވަކި ވަކިން ސިޓީ ފޮނުވައިފަ އެވެ. އެ ސިޓީގައި ބުނެފައި ވަނީ، ފީފާ އަދި އޭއެފްސީގެ ފަރާތުން، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) މެދުވެރިކޮށް ކުލަބުތަކަށް ފައިސާ ލިބެމުންދާ ކަމުގެ މައުލޫމާތު ލިބިފައިވާ ކަމަށެވެ. އަދި އެ ފައިސާ ޚަރަދު ކުރެވޭ ގޮތުގެ މައުލޫމާތު ފީފާ އާއި އޭއެފްސީގެ ޕޯޓަލަކަށް އަޕްލޯޑުކޮށް، އެފްއޭއެމް ލިބެމުންދާ ކަމުގެ މައުލޫމާތު ވެސް ލިބޭ ކަމަށް ބުނެފައިވެ އެވެ. ހަމައެހެންމެ، ކުލަބުތަކުން އެ ފައިސާ ބޭނުން ކުރާ ގޮތުގެ ރިޕޯޓެއް، ފީފާ އަދި އޭއެފްސީގެ ޕޯޓަލަކަށް އަޕްލޯޑު ކުރަމުން ދާ ކަމުގެ މައުލޫމާތު ލިބިފައިވާ ކަަމަށް ކޮމިޝަނުން ވަނީ ބުނެފަ އެވެ.

އެހެންކަމުން، ފީފާ އަދި އޭއެފްސީން، އެފްއޭއެމް މެދުވެރިކޮށް 2020 ވަނަ އަހަރުން ފެށިގެން ލިބިފައިވާ ފައިސާގެ އަދަދާއި، އެ ފައިސާ ޚަރަދުކޮށްފައިވާ ގޮތުގެ ތަފްސީލް އަންނަ އާދީއްތަ ދުވަހުގެ 14:00ގެ ކުރިން ކޮމިޝަނަށް ހިއްސާ ކުރުމަށް ވެސް ވަނީ އަންގައިފަ އެވެ.

އެފްއޭއެމަށް އެކި ގޮތްގޮތަށް ލިބެމުން އަންނަ ފައިސާ އަށް، އެ އިދާާރާގެ އިސްވެރިން ޚިޔާނާތްތެރިވާ ކަމުގެ ތުހުމަތު ވަނީ މީގެ ކުރިން ކޮށްފަ އެވެ. އެފްއޭއެމްގެ މާލީ މައްސަލަ މިފަހުން އިންތިހާ އަށް ބޮޑުވެފައިވާއިރު، ހިންގުމުގައި ވެސް ވަނީ ބޮޑެތި މައްސަލަތަކެއް ކުރިމަތިވެފަ އެވެ.