ކޮމިޝަނަރަށް ދައުވަތު ދީގެން ވެލެންސިއާގެ ހިންގާ ކޮމެޓީގެ ޖަލްސާއެއް ބާއްވަނީ!

ކޮމިޝަނަރ އޮފް ސްޕޯޓްސް، މުޙައްމަދު ޠަލާލް (ޠަލާ) އަށް ދައުވަތު ދެއްވައިގެން ކުލަބު ވެލެންސިއާގެ ހިންގާ ކޮމެޓީގެ ޖަލްސާއެއް ބާއްވަން ނިންމައިފި އެވެ.

މިކަން ހާމަކުރެއްވި ވެލެންސިއާގެ ނައިބު ރައީސް އިލްމާއު ޙުސެއިން އިބްރާހީމް (މައު) އަދި ޑައިރެކްޓަރ އޮފް ފައިނޭންސް ޙަސަން ވަޙީދު (ދޮނާ) އެވެ. އެ ދެ ބޭފުޅުން ވިދާޅުވި ގޮތުގައި މިއީ ވެލެންސިއާ އަށް މިހާރު ކުރިމަތިވެފައިވާ ޙާލަތުގެ ސަބަބުން، ކުލަބަށް ސަސްޕެންޝަނެއް އަތުވެދާނެ ކަމުގެ ބިރު އޮތުމުން، ކުލަބުގެ ކުރިމަގާއި ސަޕޯޓަރުންގެ ޙައްގުގައި ނިންމި ނިންމުމެއް ކަމަށެވެ.

މީގެ ކުރިން ވެެލެންސިއާގެ ހިންގާ ކޮމެޓީން ވަނީ، އެ ކުލަބުގެ ޗެއާމަން ޢަބްދުﷲ އަޒްމީންގެ އިތުބާރު ނެތް ކަމަށް ވެސް ފާސްކޮށްފަ އެވެ. އަޒްމީންގެ އިތުބާރު ނެތް ކަމަށް ހިންގާ ކޮމެޓީގެ ފަސް މެމްބަރަކު ވަނީ ވޯޓު ދެއްވައިފަ އެވެ. ނަމަވެސް، އެ ނިންމުމުގެ ޞައްޙަކަމާމެދު ކޮމިޝަނަރު ވަނީ ސުވާލު އުފައްދަވައިފަ އެވެ. އެގޮތުން، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ކޮމިޝަނަރު ފޮނުއްވި ސިޓީއެއްގައި ވިދާޅުވެފައި އޮތީ، ވެެލެންސިއާގެ ޗެއާމަނަކީ އަޒްމީންކަމަށެވެ. އަދި އަޒްމީންގެ އިތުބާރު ނެތްކަމަށް ނިންމި ޖަލްސާގައި ފުށޫ އަރާ ކަންތައްތަކެއް ހުރިކަމަށް ވެސް ވަނީ ފާހަގަކޮށްފަ އެވެ.

މައު އަދި ދޮނާ ވިދާޅުވީ، އެ ބައްދަލުވުމުގެ ޞައްޙަކަމާމެދު ކޮމިޝަނަރު ސުވާލު އުފައްދާތީ، ކޮމިޝަނަރަށް ދައުވަތު ދެއްވައިގެން އިތުރު ބައްދަލުވުމެއް މި ހަފުތާގައި ބާއްވާނެ ކަމަށެވެ. އެ ބައްދަލުވުމުގައި ކުލަބުގެ ހިންގުމާއި، ކުރިމަގާ ގުޅޭ ކަންކަން ނިންމާނެ ކަމަށް ވެސް ދެ ބޭފުޅުން ވިދާޅުވި އެވެ. މީގެ އިތުރުން އެ ބައްދަލުވުން އޮބްޒާވް ކުރުމުގެ ފުރުސަތު ކޮމިޝަނަށް ދެއްވާނެ ކަމުގައި ވެސް ވިދާޅުވި އެވެ.

ކުލަބު ވެލެންސިއާގެ އެތެރޭގައި މައްސަލަ ބޮޑުވެ، ދެ ފެކްޝަނެއް ވަނީ އުފެދިފަ އެވެ. މައްސަލަ އުފެދުނީ ކުލަބުގެ ތާއީދު ސިޓީ އިންތިޚާބުގައި ވާދަކުރައްވާ ދެ ކެންޑިޑޭޓުންގެ އަތުގައި ވެސް އޮތް ހިސާބުންނެވެ. އެގޮތުން، ޤައުމީ ޓީމުގެ ކުރީގެ ފޯވާޑް އަޙުމަދު ޠާރިޤް (ޓޮމް) އަދި ކުލަބު އީގަލްސްގެ ވައިސް ޗެއާމަން މުފާވިޒް ހާޝިމް (މުފާ) އަތުގައި ވެސް ވެލެންސިއާގެ ތާއިދު ސިޓީ އޮތެވެ.

އެ މައްސަލަ ބޮޑުވެފައި ވަނިކޮށް، އެފްއޭއެމްގެ އިލެކްޓޯރަލް ކޮމެޓީން ނިންމީ، ދެ ކެންޑިޑޭޓުންނަށް ވެސް ވެލެންސިއާ އިން ދީފައިވާ ސިޓީ އަކީ ޞައްޙަ ދެ ސިޓީ ކަމަށެވެ. ނަމަވެސް، އެއް ކުލަބަކަށް ދެ ކެންޑިޑޭޓުންނަށް ތާއީދު ނުދެވޭތީ، ކޮމެޓީން ނިންމީ ވެލެންސިއާގެ ދެ ސިޓީ ވެސް ބާތިލު ކުރުމަށެވެ. އެއާއެކު، ޓޮމްގެ ޝަރުތު ފުރިހަމަ ނުވާ ކަމަށް ކޮމެޓީން ނިންމި އެވެ. އެއީ އޭނާގެ އަތުގައި ފުރަތަމަ ޑިވިޝަންގެ ދެ ކުލަބުގެ ތާއީދު ސިޓީ އޮތުމުންނެެވެ. ވެލެންސިއާގެ ސިޓީ ބާތިލު ކުރުމުން ވެސް، މުފާ އަތުގައި ފަސް ކުލަބުގެ ތާއީދު ސިޓީ އޮވެ އެވެ.