ގަތަރު އެއާވޭޒްއިން ރާއްޖެއަށް ހަފުތާއަކު 21 ފްލައިޓަށް އިތުރުކޮށްފި
11 ސެޕްޓެމްބަރު 2026 | ހުކުރު 15:56ވިލާތުގެ ފިނި މޫސުމާ ދިމާކޮށް އޭޝިއާގެ ބައެއް މަންޒިލްތަކަށް ކުރާ ދަތުރުތައް އިތުރުކުރުމަށް ގަތަރު އެއާވޭޒްއިން ނިންމައިފި. މި ބަދަލާއެކު އަންނަ އޮކްޓޫބަރު 25 އިން ފެށިގެން ރާއްޖެއަށް ކުރާ ދަތުރުތައް ހަފުތާއަކު 21 އަށް އިތުރުވެ، ކޮންމެ ދުވަހަކު ތިން ފްލައިޓް ދޯހާއިން މާލެއަށް ދަތުރުކުރާނެ. މީގެ އިތުރުން ތައިލެންޑް، ވިއެޓްނާމް އަދި މެލޭޝިއާއަށް ކުރާ ދަތުރުތައް ވެސް އިތުރުކުރުމަށް ވަނީ ހަމަޖެހިފައި
ކޮވިޑް-19 ގެ ބަލިމަޑުކަމާ ގުޅިގެން ރާއްޖޭގެ ބޯޑަރު ބަންދުކޮށްފައި އޮތުމަށްފަހު، އަލުން ހުޅުވާލުމާއެކު އެތައް މަސްތަކެއްގެ މެދުކެނޑުމަކަށްފަހު ރާއްޖެއަށް އައި ފުރަތަމަ ފްލައިޓް 2020 ޖުލައި 15 ވަނަ ދުވަހު ވެލާނާ އިންޓަރނޭޝަނަލް އެއާޕޯޓަށް ޖައްސަނީ | އެލަމީ
ގަތަރު އެއާވޭޒްއިން ރާއްޖެއަށް ކުރާ ދަތުރުތައް އިތުރުކޮށްފި އެވެ.
ވިލާތުގެ ފިނި މޫސުމަށް އަމާޒުކޮށް ގަތަރު އެއާވޭޒްއިން އެންމެ ބޮޑަށް ދަތުރުތައް އިތުރުކުރުމަށް ނިންމާފައިވަނީ އޭޝިއާގެ މަގުބޫލު ޗުއްޓީ ހޭދަކުރާ މަންޒިލްތަކަށެވެ. އެގޮތުން އަންނަ އޮކްޓޫބަރު މަހުގެ 25 ވަނަ ދުވަހުން ފެށިގެން ދޯހާއާއި ތައިލެންޑުގެ ފޫކެޓާ ދެމެދު ކުރާ ދަތުރުތައް ހަފުތާއަކު 14 އިން 21 އަށް އިތުރުކުރުމަށް ވަނީ ނިންމާފައެވެ. މިއީ ދުވާލަކު ތިން ފްލައިޓުގެ ހިދުމަތެވެ.
މީގެ އިތުރުން، ހަމަ އެ ތާރީޚުން ފެށިގެން ގަތަރު އެއާވޭޒްއިން ރާއްޖެއަށް ކުރާ ދަތުރުތައް ވެސް ހަފުތާއަކު 12 އިން 21 އަށް އިތުރުކުރުމަށް ވަނީ ހަމަޖެހިފަ އެވެ. މި ބަދަލާއެކު ދޯހާއިން މާލެއަށް ދުވާލަކު ތިން ފްލައިޓް ދަތުރުކުރާނެ އެވެ.
ވިއެޓްނާމްގެ ހޯޗީމިން ސިޓީއަށް ކުރާ ދަތުރުތައް އަންނަ ނޮވެމްބަރު މަހުގެ 7 ވަނަ ދުވަހުން ފެށިގެން ހަފުތާއަކު ހަތަކުން 11 އަށް އިތުރުކުރުމަށް ވަނީ ނިންމާފަ އެވެ. މިއީ ދޯހާއާއި ހޯޗީމިން ސިޓީއާ ދެމެދު އަލުން ފަށާ ހަފުތާއަކު ހަތަރު ސީދާ ދަތުރާއެކު ގެނެވޭ ބަދަލެކެވެ. މީގެ އިތުރުން މިހާރުވެސް ކުރިއަށްދާ ދޯހާ-ހޯޗީމިން ސިޓީ-ފްނޮމް ޕެން ދަތުރުތައް މެދުކެނޑުމެއްނެތި ކުރިއަށްދާނެ އެވެ.
އަންނަ އޮކްޓޫބަރު މަހުގެ 25 ވަނަ ދުވަހުން ފެށިގެން މެލޭޝިއާގެ ކުއާލަލަމްޕޫރަށް ގަތަރު އެއާވޭޒްއިން ހަފުތާއަކު 18 ދަތުރު ކުރާނެ އެވެ. މީގެ އިތުރުން 'ވަންވޯލްޑް' ޕާޓްނަރެއް ކަމަށްވާ މެލޭޝިއާ އެއާލައިންސްއިން ކުއާލަލަމްޕޫރާއި ދޯހާއާ ދެމެދު ހަފުތާއަކު ކުރާ 14 ދަތުރުވެސް ކުރިއަށްދާނެ އެވެ.
