ރައީސް މުޢިއްޒު ގަތަރުގެ އަމީރާ ބައްދަލުކުރައްވައިފި
13 ޖުލައި 2026 | ހޯމަ 16:21ލުސައިލް ޕެލަސްގައި ބޭއްވި މި ބައްދަލުކުރެއްވުމުގައި، ރައީސް މުއިއްޒު ވަނީ މަރުޙޫމް އަމީރުގެ ފުރާނަފުޅަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން އެދި ދުޢާކުރައްވައި، ގަތަރުގެ އަމީރަށާއި ޝާހީ އާއިލާއަށް ތައުޒިޔާ ވިދާޅުވެފައި. މި ބައްދަލުކުރެއްވުމުގައި ގަތަރުގެ ނައިބު އަމީރާއި، ބޮޑުވަޒީރުގެ އިތުރުން ޝާހީ އާއިލާގެ އިސް ބޭފުޅުން ބައިވެރިވެވަޑައިގެންނެވި.
ޤަތަރުގެ ކުރީގެ އަމީރު، ޝައިޚް ޙަމަދު ބިން ޚަލީފާ އަލްޘާނީ އަވަހާރަވުމާ ގުޅިގެން، އެ ޤައުމުގެ ވެރިރަށް ދޯހާގައި ހުންނަ އަމީރީ ދީވާންގެ މައި އިދާރާގައި ނަގާފައިވާ ޤަތަރުގެ ދިދަ، 2026 ވަނަ އަހަރުގެ ޖުލައި މަހުގެ 12 ވަނަ ދުވަހު ބައިދަނޑިއަށް ތިރިކޮށްފައި. ޝައިޚް ޙަމަދު ބިން ޚަލީފާ އަލްޘާނީ އަކީ 1995 ވަނަ އަހަރުން ފެށިގެން 2013 ވަނަ އަހަރާ ހަމައަށް އެ ޤައުމުގެ ވެރިކަން ކުރެއްވި އަމީރު. | ގެޓީ އިމޭޖަސް
ގަތަރުގެ އަމީރު، ޝެއިޚް ތަމީމް ބިން ހަމަދު އައްޘާނީގެ ބައްޕާފުޅު، އަމީރު ޝެއިޚް ހަމަދު ބިން ޚަލީފާ އައްޘާނީ އަވަހާރަވުމާ ގުޅިގެން، އެމަނިކުފާނުގެ އާއިލާއަށް ތައުޒިޔާ ދެންނެވުމަށް ރައީސް ޑރ. މުޙައްމަދު މުޢިއްޒު، ގަތަރުގެ އަމީރުގެ އަރިހަށް މިއަދު ހަވީރު ޒިޔާރަތް ކުރައްވައިފި އެވެ.
ލުސައިލް ޕެލަސްގައި ބޭއްވި މި ބައްދަލުކުރެއްވުމުގައި، ރައީސް މުއިއްޒު ވަނީ މަރުޙޫމް އަމީރުގެ ފުރާނަފުޅަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން އެދި ދުޢާކުރައްވައި، އަމީރު ތަމީމް ބިން ހަމަދު އައްޘާނީއަށާއި ގަތަރުގެ ޝާހީ އާއިލާއަށް އިޚްލާޞްތެރިކަމާއެކު ތައުޒިޔާ ވިދާޅުވެފަ އެވެ.
މި ބައްދަލުކުރެއްވުމުގައި ގަތަރުގެ ނައިބު އަމީރު، ޝެއިޚް ޢަބްދުﷲ ބިން ހަމަދު އައްޘާނީއާއި، އަމީރުގެ ޕާސަނަލް ރެޕްރެޒެންޓޭޓިވް ޝެއިޚް ޖާސިމް ބިން ހަމަދު އައްޘާނީ ބައިވެރިވެވަޑައިގެންނެވި އެވެ. މީގެއިތުރުން ގަތަރުގެ ބޮޑުވަޒީރު އަދި ޚާރިޖީ ވަޒީރު ހިޒް އެކްސެލެންސީ ޝެއިޚް މުޙައްމަދު ބިން ޢަބްދުއްރަޙްމާން ބިން ޖާސިމް އައްޘާނީއާއި، އަވަހާރަވި އަމީރުގެ ބޭފުޅުންނާއި، ގަތަރުގެ ޝާހީ އާއިލާގެ އިސް ބޭފުޅުންވެސް މި ބައްދަލުކުރެއްވުމުގައި ބައިވެރިވެވަޑައިގެންނެވި ކަމަށް އަމީރީ ދީވާން އިން ނެރުނު ބަޔާނެއްގައި ބުނެފައިވެ އެވެ.
