ނާޒިމާއި އަރީފުގެ މައްޗަށް ކުރާ ޖިނާއީ ތުހްމަތުތަކުގައި ބަޔާން ނަގައިފި
5 އޮކްޓޯބަރު 2017 | ބުރާސްފަތި 16:18ދެ މެމްބަރުންނާ ވެސް ސުވާލުކުރީ މިދިޔަ ޖުލައި 31 ވަނަ ދުވަހު މަޖިލީހުގައި ހިނގާދިޔަ ކަންތައްތަކާ ގުޅިގެން
މެމްބަރު އަރީފު ފުލުސް އޮފީހުން ނިކުމެވަޑައިގެން ރާއްޖެޓީވީއަށް އިންޓަވިއު ދެއްވަނީ
ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު މުހައްމަދު ނާޒިމާއި ނޮޅިވަރަމް ދާއިރާގެ މެންބަރު ހުސައިން އަރީފް ފުލުސް އޮފީހަށް ހާޒިރުކޮށް ބަޔާން ނަގައިފި އެވެ.
މިދިޔަ ޖުލައި 24 ވަނަ ދުވަހު ރައްޔިތުންގެ މަޖިލީހުގައި ހިނގާދިޔަ ކަންތައްތަކާ ގުޅިގެން ނާޒިމްގެ މައްޗަށް ފުލުހުން ދެ ތުހްމަތެއް ކޮށްފައިވެ އެވެ. އެއީ ފުލުހެއްގެ ގައިގަ ދަތްއަޅައި. މާރާމާރީ ހިންގިކަމުގެ ތުހްމަތާއި ފުލުހުންގެ ވާޖިބަށް ހުރަސްއެޅުމުގެ ދައުވާ އެވެ. ނާޒިމް ވިދާޅުވީ އޭނާ މައްޗަށް ކުރާ ތުހްމަތާ ގުޅިގެން ފުލުހުންނަށް ބަޔާން ދީފައިވާނެ ކަމަށެވެ.
" މިއީ އަޅުގަނޑުގެ ހަޔާތުގައި ވެސް ފުރަތަމަ ފަހަރު ފުލުސް އޮފީހަށް ހާުޒިރުކޮށް ބަޔާން ނެގި، އަޅުގަނޑު ދެންނެވިން އަޅުގަނޑު ނުވާނެއޭ އެއްވެސް ފުލުހަކާ މެދު މާރާމާރީ ހިންގާފައެއް،" އޭނާ ވިދާޅުވި އެވެ.
އޭގެ އިތުރުން މިދިޔަ ޖުލައި މަހުގެ 31 ވަނަ ދުވަހު މަޖިލިސް ތެރޭގައި ހިނގާދިޔަ ކަންތައްތަކާ ގުޅިގެން ފުލުހުންކުރާ ޖިނާއީ ތުހްމަތެއްގައި ނޮޅިވަރަމް ދާއިރާގެ މެމްބަރު ވެސް ހާޒިރުކޮށް ސުވާލުކޮށްފައިވާއިރު އޭނާގެ މައްޗަށް ވެސް ދެ ތުހްމަތެއް ކޮށްފައި ވެއެވެ. އެއީ އެ ދުވަހު ރައްޔިތުންގެ މަޖިލީހުގެ ސަލާމަތީ ކަންކަން ބަލަހައްޓަން ތިބި ސިފައިންގެ ގާނޫނީ ވާޖިބަށް ހުރަސްއަޅައި، ސިފައިންނާ މެދު މާރާމާރީ ހިންގި ކަމުގެ ތުހްމަތުގަ އެވެ.
ފުލުސް އޮފީހުން ނިކުމެވަޑައިގެން އަރީފު ވިދާޅުވީ ރައްޔިތުންގެ މަޖިލީހުގައި ހިނގާދިޔަ ކަންތަތަކާ ގުޅިގެން ފުލުހުން އެ މައްސަލަ ތަހްގީގު ކުރުމުގެ ކުރިން މަޖިލީހުން އެކަން ބަލަން ޖެހޭނެ ކަމަށެވެ. މެމްބަރުންގެ ސުލޫކީ ކޮމެޓީ ނުބަލައި ފުލުހުންނަށް މި މައްސަލަ ތަހްގީގު ނުކުރެވޭނެ ކަން އޭނާ ފާހަގަ ކުރެއްވި އެވެ.
"އަޅުގަނޑަކީ ވެސް ސުލޫކް ކޮމެޓީގެ މެމްބަރެއް. މީގެ ކުރިން މަޖިލީހުގައި މެމްބަރުންގެ ފަރާތުން ހިނގާ ކަންކަން ބަލަމުންދަނީ އެ ކޮމެޓީން. ބަލާފައި އަޅުގަނޑުމެން ގޮތް ނިންމާނީ. އެކަހަލަ އެއްވެސް ކަމެއް މި ފަހަރު ނުފެނުން،" އޭނާ ވިދާޅުވި އެވެ.
އެހެން ނަމަވެސް ފުލުހުން ކުރަމުންދާ މި ފަދަ ތަހްގީގުތަކުގެ ސަބަބުން މެމްބަރުން ފަހަތައް ނުޖެއްސޭނެ ކަމަށް އޭނާ ވިދާޅުވި އެވެ.
"އެ ދުވަހު އެހިނގާދިޔަ ކަންތައްތަކެއް ހިނގާދިޔަ ކަމެއް ހިނގާދިޔައިރު އެންމެ ބޮޑު އަނިޔާއެއް ލިބުނު އެކަކީ އަޅުގަނޑު. އަޅުގަނޑަކީ ވެސް ދައުލަތުން އިއްޒަތް އަރުވާފައިވާ ރައްޔިތުންގެ މަޖިލީހުގެ އިއްޒަތްތެރި މެމްބަރެއް. އަޅުގަނޑަކީ ވެސް އުއްތަމަ ފަނޑިޔާރުކުރިމަތީ ހުވައެއް ކޮށްގެން ހުރި މީހެއް. އެކަމަކު އަޅުގަނޑު ބިންމައްޗަށް ވައްޓާލާ ވެއްޔާ މޮޑެލާ ބަހައްޓާފައި އަނެއްކާ އަޅުގަނޑަށް މި ތަހްގީގު ހިންގަނީ. މިއީ ސަދޫމުގައި އެއްކަލަ ހިމާރުގެ ޝަރީއަތާ އެއް ގޮތެއް ނޫންތޯ،" އޭނާ ވިދާޅުވި އެވެ.
މި ދެ މެމްބަރުން އިތުރުން މެދު ހެންވޭރު ދާއިރާގެ މެމްބަރު އަލީ ވެސް ބުރާސްފަތި ދުވަހު ފުލުސް އޮފީހަށް ހާޒިރުކޮށް ސުވާލު ކުރައްވާފައި އެވެ. އޭނާގެ މައްޗަށް ވެސް ތުހްމަތުކޮށްފައި ވަނީ ފުލުހުންގެ ވާޖިބަށް ހުރަސްއެޅި ކަމުގެ ކުށުގެ ތުހުމަތެވެ.
